Haqlı və güclü olan Azərbaycandır

Ermənistanın buqələmunluğunun heç bir faydası olmayacaq

Ermənistanın və ona havadarlıq edən bəzi Qərb dairələrinin, eləcə də "xristian klubu"na çevrilən Avropa Parlamentinin ikili oyunları, məkrli planları tükənmək bilmir. Bütün cəhdlərində, bütün çirkinliklərində hədəf ərazi bütövlüyünü, suverenliyini öz gücünə təmin edən Azərbaycandır.

44 günlük İkinci Qarabağ müharibəsinin başa çatmasından ötən 3 ildən artıq zamanda Ermənistan bütün danışıqlarda sülhə hazır olduğunu bildirsə də, əməldə köhnə peşəsini davam etdirir. İşğal dövründə 30 il Azərbaycanın sülh istəyinə qarşı heç bir reaksiya verməyən beynəlxalq təşkilatlar, bəzi böyük dövlətlər indi Ermənistanın xeyrinə hansısa iş görməyə çalışırlar. 30 il ərzində işğalçıya, uşaq qatillərinə qarşı heç bir sanksiya tətbiq etməyən Avropa təşkilatları, 2020-ci ilin noyabrından Azərbaycanı hədəfə alıblar. Bütün istiqamətlərdə qarayaxma, iftira və böhtan kampaniyası apararaq erməni lobbisinə yarınmaq istəyirlər.

Qəbul etdikləri qərəzli bəyanatların, hansısa uydurma qərarların Azərbaycana zərrə qədər də təsir göstərmədiyini gördükdə isə son həftələrdə gücü media orqanlarına ötürüblər. İndi də Qərb mediası yeni iftiralar, uydurmalarla beynəlxalq ictimaiyyəti çaşdırmaq istəyir. Dərc edilən məqalələrin hər birinin süjet xətti eynidir - guya Azərbaycan Ermənistana qarşı hücuma hazırlaşır və Qafqazda yeni savaş ocağının yaranma təhlükəsi var.

Amma, özləri də yaxşı anlayırlar ki, bu, sadəcə Azərbaycanı təxribata çəkmək məqsədi güdür. Çünki Azərbaycanın yeganə məqsədi sülh müqaviləsinin bağlanması, regionda təhlükəsizliyin bərqərar olunmasıdır. Əgər Azərbaycanın Ermənistana qarşı ərazi iddiası olsaydı, ya 44 günlük savaşda, ya da 23 saatlıq antiterror tədbirlərində bunu reallaşdıra bilərdi. Çünki Azərbaycan Ordusunun qarşısında dayana biləcək güc yox idi. Elə indi də yoxdur!

Fransanın bu ölkəni silahlandırması, ordusundan bir neçə hərbçisini Hayastana təlim adı ilə gətirməsi o demək deyil ki, Azərbaycanın nədənsə çəkinəcəyi var. Əslində, Azərbaycan Ordusu bu gün 2020-ci ildəkindən qat-qat güclüdür. Həm yüksək döyüş əzmli şəxsi heyət, həm də müasir hərbi texnika, silah-sursat baxımından...

Əgər Azərbaycan sülh istəməsəydi, onun şərtlərini də hazırlayıb Ermənistana təqdim etməzdi.

Əgər Azərbaycan savaş istəsəydi, işğaldan azad etdiyi əraziləri bərpa edib yurdundan-yuvasından didərgin düşən vətəndaşlarını yenidən atəş altına salmazdı.

Qalib Ali Baş Komandan kimi İlham Əliyev dəfələrlə bəyan edib ki, Azərbaycan sülh prosesinə sadiqdir. Məhz Azərbaycan İkinci Qarabağ müharibəsi başa çatdıqdan sonra sülh danışıqları təşəbbüsü ilə çıxış edib. Lakin məğlub Ermənistan son zamanlarda sadəcə olaraq dondan-dona girməklə oyunpozanlıq edir.

Bunun səbəbi təbii ki, bəllidir. Hayastan rəhbərliyi hər zaman buyruq qulu olduğu Rusiyadan üz çevirərək Qərbin diktəsi altına düşdüyünü göstərir. Kollektiv Təhlükəsizlik Müqaviləsi Təşkilatındakı fəaliyyətini "dondurması" isə vəziyyəti daha da gərginləşdirib. Bunu artıq ölkə əhalisi də anlayır və Hayastanın yeni təhlükə ilə üz-üzə qaldığını vurğulayır.

Elə dünən Ermənistanın sabiq prezidenti Robert Koçaryanın müxalif "Ermənistan" parlament fraksiyasının katibi Artsvik Minasyan jurnalistlər üçün təşkil olunan brifinqdə deyib ki, Hayastan hakimiyyətinin Rusiya və Kollektiv Təhlükəsizlik Müqaviləsi Təşkilatı (KTMT) ilə bağlı siyasəti respublikanın təhlükəsizlik sisteminin sıradan çıxmasına və fəlakətə gətirib çıxaracaq: "Ermənistanın təhlükəsizliyi elə bir vəziyyətdədir ki, hər an bütün tərəflərdən bizə hücum edilə bilər. Onlar bizim müttəfiqimizi düşmənə çevirdilər. Bu, rüsvayçılıqdır", - deyə Artsvik Minasyan bildirib. Onun sözlərinə görə, İrəvan mövcud təhlükəsizlik sistemini daha effektiv etmək üçün yol tapmalı, tərəfdaşlarla "ultimatum dilində" danışmamalıdır.

Göründüyü kimi, sülh müqaviləsinin imzalanma tarixinin uzanmasının daha çox təhlükəli olduğunu İrəvanda artıq yaxşı başa düşürlər. Amma bəzi dairələr hesab edirlər ki, onların arxasında dayananların Azərbaycana təsir etmək mexanizmləri hələ bitməyib və bu təzyiqlər nəticəsində sülh müqaviləsi imzalanarkən Ermənistan üçün daha uyğun şərait əldə etmək olar. Lakin Ermənistan və onun havadarları unudurlar ki, vaxt keçdikcə Azərbaycanın şərtləri də dəyişir.

Böyük erməni diasporuna malik Fransa isə Ermənistana dəstəyini davam etdirməklə yanaşı, Azərbaycana qarşı qarayaxma kampaniyasını da davam etdirir. Prezident Emmanuel Makron hökuməti açıq-aşkar ermənipərəst mövqe sərgiləyərək, Fransanı Hayastanın faşizm siyasətinin əsirinə çevirib. İndi də Ermənistanın Fransa vassallığı dövrü başlayıb.

Əminliklə deyə bilərik ki, istənilən buqələmunluğun Ermənistan üçün heç bir faydası olmayacaq. Regionda diktəni edən tərəf Azərbaycandır. Çünki Azərbaycan həm haqlı, həm də güclü olan tərəfdir.

Rəşad BAXŞƏLİYEV,

Azərbaycan.-2024.- 7 mart, № 52.- S.6.