Azərbaycanın kifayət qədər enerji ehtiyatları var

Avropa ölkələri bu reallığı nəzərə almalıdırlar

"Azərbaycan hazırda çoxşaxəli enerji siyasəti yürütməklə Avropanın enerji təhlükəsizliyinin təmin edilməsində mühüm rol oynayır. Ötən illər ərzində ölkəmiz Avropa bazarında mühüm neft təchizatçısı kimi etibarlı tərəfdaşa çevrilib".

Bu sözləri "Azərbaycan" qəzetinə açıqlamasında Milli Məclisin deputatı Aydın Hüseynov deyib. Deputat bildirib ki, Azərbaycan regionda ən nəhəng qaz marşrutlarının yaradılmasına nail olub. TANAP və TAP kəmərlərinin qısa müddət ərzində başa çatdırılması böyük iradənin nəticəsi idi. 2020-ci ilin sonundan etibarən ölkəmiz Avropa İttifaqına qaz ixracını təmin etməkdədir və hər il qaz ixracı artır. Ötən il Azərbaycan Aİ ölkələrinə 12 milyard kubmetr qaz nəql edib ki, bu da kifayət qədər böyük göstəricidir, ixracın yarısı deməkdir.

Aydın Hüseynov qeyd edib ki, Azərbaycan hazırda Avropa bazarına enerji ixracının çoxşaxəliliyini təmin etmək üçün müzakirələr aparır. İxracın yaxın illərdə 20 milyard kubmetrə çatdırılması nəzərdə tutulur. Azərbaycanın qaz ehtiyatları zəngindir. Ölkəmizdə kifayət qədər dayanıqlı enerji mənbələri mövcuddur. Bunu nəzərə alan Aİ Azərbaycandan daha çox qaz almaq istəyir. "Ölkəmizin təsdiq edilmiş qaz ehtiyatlarının həcmi 2,6 trilyon kubmetrdir. Belə həcm öz istehlakımız və ixrac üçün ən azı 100 il kifayət edər. Hazırda yeni yataqların kəşf edilməsi ilə bağlı işlər davam etdirilir. Bu, xarici şirkətlərin və Avropa ölkələrinin də marağının artmasına səbəb olmaqdadır. Avropa ölkələri mövcud perspektiv qaz mənbələrini nəzərə alaraq Azərbaycanla əməkdaşlığı genişləndirməyə çalışırlar. "Şahdəniz" yatağı ilə yanaşı, "Babək", "Naxçıvan", "Zəfər-Məşəl", "Şəfəq-Asiman" perspektiv strukturlarında böyük ehtiyatlar var", - deyə o əlavə edib.

Deputat vurğulayıb ki, proqnozlara əsasən, 2025-2030-ci illərdə ölkəmizin qaz istehsalı 40 faiz artacaq və Avropaya qaz nəql edən TAP kəmərinin illik gücü 20 milyard kubmetrə çatacaq. Gələcəkdə qaz təchizatı coğrafiyasının Avropada Balkanlara və Şərqi Avropanın bir sıra digər ölkələrinə qədər genişləndirilməsi nəzərdə tutulur.

Aydın Hüseynov Azərbaycanın Aİ ilə enerjinin digər sahələrində, o cümlədən alternativ və bərpaolunan enerji layihələrində yaxından əməkdaşlıq planlarının da gerçəkləşməsi üçün səmərəli müzakirələrin aparıldığını bildirib: "Azərbaycan bərpaolunan enerji mənbələri üzrə yüksək potensiala malik olan ölkələrdəndir. Belə ki, ölkəmizin bərpaolunan enerji mənbələrinin texniki potensialı quruda 135 qiqavat, dənizdə 157 qiqavatdır. Bərpaolunan enerji mənbələrinin iqtisadi potensialı 27 qiqavat, o cümlədən külək enerjisi üzrə 3000 meqavat, günəş enerjisi üzrə 23000 meqavat, bioenerji potensialı 380 meqavat, dağ çaylarının potensialı 520 meqavat həcmində qiymətləndirilir".

Deputat qeyd edib ki, bu baxımdan Aİ bu həcmdə resursların istehsalı və nəqlində Azərbaycanla əməkdaşlığa xüsusi önəm verir.

Əsmər QARDAŞXANOVA,

Azərbaycan.-2024.- 7 mart, № 52.- S.7.