Qərbin antiazərbaycançı şəbəkəsi ifşa olunur

"Ölkəmizdə fəaliyyət göstərən bəzi media qurumlarının Qərb siyasi dairələri tərəfindən maliyyələşdirilməsində məqsəd Azərbaycanda qarışıqlıq yaratmaqdır. Ona görə də Toplum TV-nin fəaliyyətinə hüquqi müstəvidə qiymət verilməsi ilə bağlı müvafiq tədbirlərin həyata keçirilməsindən sonra Qərbin bəzi siyasi dairələrinin köhnə ab-havada danışacaqları, Azərbaycanı insan haqlarının və demokratik dəyərlərin pozulmasında ittiham edəcəkləri istisna edilmirdi".

Bu fikirləri "Azərbaycan" qəzetinə açıqlamasında Milli Məclisin deputatı Elman Nəsirov deyib. Deputat bildirib ki, Qərb institutları və onların maliyyələşdirdiyi qurumlar Azərbaycana qarşı yenə qarayaxma kampaniyasına başlayıblar: "Azərbaycanı guya insan hüquq və azadlıqlarının pozulması, mediaya qarşı təqib siyasətinin həyata keçirilməsi və digər bu kimi məsələlərdə ittiham edirlər. Lakin gün kimi aydındır ki, bu ittihamların heç bir əsası yoxdur. Əvvəla ona görə ki, demokratik inkişaf yolunu seçmiş və bu yolda inamlı addımlarla irəliləyən Azərbaycan belə ucuz vasitələrə ehtiyac duymur. İkincisi isə, demokratiya bir prosesdir, yəni orada son nöqtə yoxdur. Demokratiyanın zirvəsində olduğunu iddia edən dövlətlər birmənalı olaraq yanılır və dünya ictimaiyyətini də yanıltmağa çalışırlar. Sadəcə, demokratiya yolunu seçən dövlətlər hər dəfə növbəti mərhələyə keçid edir və prosesi davam etdirirlər. Azərbaycan da demokratik inkişaf yolu ilə gedir və bu istiqamətdə çox ciddi islahatlar həyata keçirir".

Elman Nəsirovun sözlərinə görə, ayrı-ayrı şəxslər və yaxud hansısa media qurumu ilə bağlı hüquq-mühafizə orqanlarının hərəkətə keçməsinə gəlincə isə, burada günahkar onların elə özləridir: "Ölkəmizdə media qurumları və ya jurnalistlər heç bir halda siyasi mövqelərinə görə təqib olunmurlar. Toplum TV-nin bir neçə əməkdaşının saxlanılmasının səbəbi isə axtarış zamanı aşkarlanan cinayət əməlləridir. Məhkəmə həmin şəxslərlə bağlı müvafiq qərarlar qəbul edəcək. Ortada cinayət əməli varsa, bu əməli törədənlərin siyasi baxışları, onların əqidəsi və sairə kimi amillərin məsələyə heç bir aidiyyəti yoxdur. Cinayət törədilirsə, cinayətkar cəzalandırılmalıdır".

Deputat vurğulayıb ki, heç kim qanunun fövqündə dayana bilməz və heç kimin toxunulmazlıq hüququ yoxdur: "Demokratik inkişaf yolunu seçmiş bütün hüquqi dövlətlərdə cinayət faktı aşkarlandığı halda, onu törədən mütləq cəzalandırılır. Əksinə, cinayətkarların cəzasız qalması dövlətin sütunlarına çox ciddi zərbə vurar və ictimaiyyətdə dövlətə inamsızlıq yaranar. Bu gün xalqımız dövlət siyasətini birmənalı müdafiə edir. Çünki bizim işimiz haqq işidir və heç kim daxili işlərimizə qarışa bilməz. Bu nöqteyi-nəzərdən Qərbin bəzi siyasi dairələri təzyiqlərini dayandırmalıdırlar və baş verənlərdən dərs almalıdırlar".

Elman Nəsirov yekunda deyib ki, Qərbin maliyyələşdirdiyi növbəti media qurumunun ifşa olunması ilə xarici mediada ölkəmizə qarşı aparılan qarayaxma kampaniyası genişlənib. Lakin ölkəmizi hədəfə alan əsassız ittihamlarla dolu materiallar dərc edən, bizə qarşı təzyiqlərini artıran Qərb siyasi dairələri belə cəhdləri ilə Azərbaycanı öz daxili məkanını qeyri-qanuni fəaliyyətlərdən qorumaqdan çəkindirə bilməz.

Nəzrin QAFARZADƏ,

Azərbaycan.-2024.- 8 mart, № 53.- S.9.