Azərbaycan Prezidentinin qətiyyəti ilə reallaşan layihə

Bakıda keçirilən "Cənub Qaz Dəhlizi" Məşvərət Şurası çərçivəsində nazirlərin 10-cu və "Yaşıl Enerji" Məşvərət Şurası çərçivısində nazirlərin 2-ci iclası Azərbaycanın uğurlu enerji strategiyasından xəbər verir. Bu bir daha sübuta yetirir ki, "Cənub qaz dəhlizi" bütövlükdə region üçün uğur hekayəsidir.

Mövzu ilə bağlı "Azərbaycan" qəzetinə danışan Milli Məclisin deputatı Vüqar Bayramov söyləyib ki, "Cənub qaz dəhlizi"nin reallaşması regionun enerji təhlükəsizliyinə mühüm töhfə verib: "Xüsusilə də son geosiyasi, regional və iqtisadi dəyişikliklər fonunda "Cənub qaz dəhlizi" nəinki Avropa İttifaqının, bütövlükdə regionun enerji təhlükəsizliyinin güclənməsində həlledici rol oynayıb. Etiraf etmək lazımdır ki, "Cənub qaz dəhlizi"nin reallaşması Prezident İlham Əliyevin siyasi iradəsi nəticəsində mümkün olub. Nəzərə almaq lazımdır ki, bu layihənin müzakirəsi zamanı fərqli yanaşmalar sərgilənirdi, hətta bəzi ölkələr, o cümlədən Avropa İttifaqı layihənin smetasına görə ona tərəddüdlə yanaşırdılar. Amma dövlətimizin mövqeyi, Azərbaycan Prezidentinin siyasi iradəsi bu layihənin reallaşmasına imkan yaratdı. Daha sonra baş verən geosiyasi hadisələr, Rusiya-Ukrayna müharibəsi, eləcə də Avropa İttifaqının enerji mənbələrinin şaxələndirilməsi və digər işlər bir daha təsdiqlədi ki, Azərbaycanın bu məsələdə mövqeyi strateji əhəmiyyət daşıyırdı".

Deputatın sözlərinə görə, "Cənub qaz dəhlizi" layihəsinin reallaşması bütövlükdə region üçün kifayət qədər böyük hadisədir: "Cənub Qaz Dəhlizi" Məşvərət Şurası çərçivəsində nazirlərin 10-cu və "Yaşıl Enerji" Məşvərət Şurası çərçivəsində nazirlərin 2-ci iclaslarında səsləndirilən fikirlər də bunu təsdiq edir. Açıq-aydın ortadadır ki, yeni dövrdə artıq yeni çağırışlar var. Azərbaycanda "yaşıl enerji"yə keçid müşahidə olunur. Ümumiyyətlə, regionda alternativ mənbələrdən enerji istehsalına ən çox sərmayə yönəldən ölkələrdən biri olaraq Azərbaycanın qısa zamanda "yaşıl enerji" hasilatını artırması və ixracını təşkil etməsi gözləniləndir.

"Azərbaycanla Avropa İttifaqı arasındakı anlaşmaya əsasən, 2026-cı ildən sonra ölkəmizdə istehsal edilən "yaşıl enerji" Gürcüstan, eləcə də Qara Dəniz vasitəsilə Avropaya çatdırılacaq. Bu isə ondan xəbər verir ki, Azərbaycan Avropaya yalnız ənənəvi enerji resursları məhsulları ilə deyil, həm də innovativ "yaşıl enerji"si ilə daxil ola biləcək. Azərbaycan hətta 2026-cı ildən sonra Avropa İttifaqına nəql etdiyi mavi qazın həcmini 20 milyard kubmetrə qədər artırmağı nəzərdə tutub. Bu, bir daha göstərir ki, Azərbaycan həm öhdəliklərinə və strateji əməkdaşlığa sadiqdir, həm də enerji keçidi prosesini dəstəkləyir və ona töhfə verir. Son iclas da bir daha təsdiqlədi ki, "Cənub qaz dəhlizi" region üçün nəinki əhəmiyyətini qoruyub saxlayıb, hətta davamlı bir layihəyə çevrilib. Deməli, Azərbaycan hələ uzun müddət regionun enerji təhlükəsizliyinə töhfə verməyə davam edəcək", - deyə müsahibimiz əlavə edib.

Nəzrin QAFARZADƏ,

Azərbaycan.-2024.- 7 mart, № 52.- S.7.