Bakıdan dünyaya qlobal çağırışlar ediləcək

COP29 Azərbaycan üçün yeni fürsətlər yaradacaq

Bu ilin noyabrında Azərbaycanda BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası baş tutacaq.

COP29-un ölkəmizdə keçirilməsi bir çox cəhətdən böyük əhəmiyyət daşıyır. Belə mühüm tədbirə evsahibliyi etmək ölkəmizin nüfuzunu artırır. Digər tərəfdən, onun üzərinə konvensiyadan irəli gələn öhdəliklərlə yanaşı, iqlim dəyişikliklərinin gələcək mənfi təsirlərini minimuma endirmək üçün lazımi tədbirlər görmək vəzifəsi düşür.

Mövzu ilə bağlı "Azərbaycan" qəzetinə danışan Sosial Tədqiqatlar Mərkəzinin departament rəhbəri Seymur Əliyev bildirib ki, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına Azərbaycanın evsahibliyi etməsi hadisəsini yalnız ölkə imici perspektivindən dəyərləndirmək məqbul olsa da, yetərli deyil: "Belə ki, tədbirin ölkəmizdə həyata keçirilməsinin verə biləcəyi əsas üstünlüklərdən biri heç şübhəsiz Azərbaycanın qlobal iqlim gündəliyinə sadiqliyi və aktiv rol alma təşəbbüsünün açıq demonstrasiyasıdır. Digər tərəfdən, COP29 çərçivəsində iqlim dəyişikliyi müzakirələri dövlət siyasətinin formulasiyası baxımından da çox önəmlidir. "Azərbaycan 2030: sosial-iqtisadi inkişafa dair Milli Prioritetlər" sənədində təmiz ətraf mühit və "yaşıl artım" ölkəsinin əsas prioritetlərdən biri kimi müəyyənləşdirildiyini nəzərə alsaq, belə olan halda tədbirə evsahibliyi strateji çərçivənin optimallaşdırılması baxımından da xüsusi önəm daşıyır".

Tədbirin Azərbaycan üçün bir sıra fürsətlər yaratdığını qeyd edən S.Əliyev deyib ki, ilk növbədə sənayenin yenidən transformasiyası kontekstində ekoloji təmizliyə nail olmaq, təbii resurslardan dayanıqlı və davamlı istifadənin təmin olunması istiqamətində müvafiq siyasət transferlərinin tətbiqini dəyərləndirmək lazımdır. "Nəhayət, beynəlxalq iqlim dəyişikliyi sazişlərindən irəli gələn tələbləri qarşılamaq, eləcə də müvafiq təşəbbüslər ilə çıxış etmək önəmlidir. Burada xüsusilə qlobal istiləşmə və iqlim dəyişikliyi ilə mübarizədə istifadə edilən üsul və alətlərin nəzərdən keçirilməsini xüsusilə vurğulamaq yerinə düşər", - deyə o əlavə edib.

Departament rəhbəri vurğulayıb ki, problemlə mübarizə siyasətinin palitrasının zənginləşdirilməsi və sözügedən neqativ trendin inkişaf proyeksiyalarının müzakirə ediləcəyi bir platformanın ölkəmizdə keçirilməsi olduqca əhəmiyyətlidir. Eyni zamanda COP29 çərçivəsində Bakıdan dünyaya qlobal çağırışlar ediləcək. Bununla yanaşı, pozitiv elm vasitəsilə aşkar edilən tutarlı, qərəzsiz və danılmaz faktların dataya əsaslanan rasional siyasətlərin inkişafına təsiri qəbul edilsə də, bu funksiyanın qərar qəbul edənlərə müxtəlif aspektlərdən təsir göstərə biləcəyi də nəzərdən qaçmamalıdır.

Ə.QARDAŞXANOVA,

Azərbaycan.-2024.- 7 mart, № 52.- S.7.