"Mən arzuma çatmasam da, oğlum istəyinə yetişdi"

Nicat dünyaya gələndə ermənilər ata yurdu Kəlbəcəri işğal edib dinc əhaliyə amansız divan tutmuşdular. Qarabağ işğal altında idi. Yurdumuzu xarabazara çevirən düşmən yeni ərazilər işğal etmək iddiasından da əl çəkməmişdi…

Birinci Qarabağ müharibəsi qazisi Habil kişi hər gün oğluna ermənilərin xalqımızın başına gətirdiyi müsibətlərdən danışar, söhbətini "bu qan yerdə qalmamalıdır" nidası ilə tamamlayardı.

Məktəbdə müəllimlərinin, evdə valideynlərinin Qarabağ haqqında, erməni vandalizmi haqqında söhbətlərini dinləyən Nicatın böyüdükcə içində bir qəzəb püskürürdü. Ürəyində işğalda olan Vətən torpaqlarını azad etmək arzusu böyüyürdü. Atasının söhbətlərini dinləyən Nicat deyərmiş ki, "sizin həll edə bilmədiyiniz problemi biz həll edəcəyik. Bu işi gələcək nəsillərə saxlamaq olmaz".

Atası deyir ki, illər keçdikcə o torpaqların azad olunması haqqında söhbətlər bizə xəyal kimi görünürdü. Yurdu, yuvası viran olmuş bir insan kimi torpaqlarımızın azad olunmasını çox istəyirdim. Ata kimi isə arzum oğlumu evləndirmək, baba olmaq, övladımın xoşbəxt həyat sürməsini görmək idi. Nicatın təkcə arzusu yox, həm də məqsədi torpaqlarımızı azad görmək, torpaq uğrunda savaşmaq idi. Bu yolu özü seçmişdi. Təsəllim odur ki, mən arzuma çatmasam da, oğlum məqsədinə çatdı. İndi torpaqlarımız işğaldan azaddır. Cənab Prezidentimizin birbaşa rəhbərliyi ilə azadlığına qovuşmuş torpaqlarımızda əsl cənnət yaradılır. Oğlumun ruhu da bu gözəlliyi görüb şad olur.

Azərbaycan Ordusunun leytenantı Nicat Habil oğlu Atayev 1994-cü il martın 5-də Mingəçevir şəhərində dünyaya göz açıb. Nicat Gəncə şəhərində 55 saylı Kəlbəcər orta məktəbini bitirib.

2011-ci ildə həqiqi hərbi xidmətə gedən Nicat Atayev Naxçıvan şəhərində yerləşən "N" saylı hərbi hissədə qulluq edib. 2013-cü ildə hərbi xidməti başa vurduqdan sonra Gəncə Dövlət Universitetinin Fiziki hazırlıq fakültəsinə qəbul olunub.

Atası deyir ki, Nicatın uşaqlıqdan arzusu hərbçi olmaq idi. Hərbi xidmətini başa vurduqdan sonra da bütün sözü, söhbəti torpaqlarımızın işğaldan azad olunması ilə bağlı idi. Nicat ordumuzun gücünə çox inanırdı. Deyirdi ki, müharibə başlasa, biz qələbə çalacağıq. Ali təhsilini başa vurduqdan sonra zabit kimi orduda xidmət etmək üçün Müdafiə Nazirliyinə müraciət etdi. 2019-cu ildə üçaylıq zabitlik kursunu keçdikdən sonra oğlumu xidmət üçün Füzuli rayonundakı "N" saylı hərbi hissəyə göndərdilər.

2020-ci il sentyabrın 27-də Vətən müharibəsi başlayanda düşmənin qarşısına çıxan igidlərimizdən biri də ön cəbhədə xidmət edən leytenant Nicat Atayev idi. Döyüş yolu qısa olsa da, göstərdiyi qəhrəmanlıqlar böyük olub. O, Füzuli rayonunun Yuxarı Əbdürrəhmanlı istiqamətində düşmənin hücumunun qarşısını alarkən qəhrəmancasına şəhid olub. Vətən müharibəsinin ilk şəhidlərindən olan Nicat Habil oğlu Atayev Bakıda İkinci Fəxri xiyabanda dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarında qəhrəmanlıq göstərən leytenant Nicat Atayev Azərbaycan Prezidenti İlham Əliyevin sərəncamı ilə ölümündən sonra "Vətən uğrunda", "İgidliyə görə", "Xocavəndin azad olunmasına görə" və "Füzulinin azad olunmasına görə" medalları ilə təltif olunub.

Anası Rəsmiyyə xanım Nicatla son telefon danışığını yada salır: "Sentyabrın 26-sı axşam saat 10-da zəng vurmuşdu. Atasını, qardaşlarını soruşdu. Müharibə olacağı haqqında heç eyham da vurmadı. Əhvalı çox yaxşı idi. Telefon danışığı bitəndən sonra ürəyimdən qəribə bir hiss keçdi. İçimdəki hiss deyirdi ki, bu sənin Nicatla son danışığındır. Oğlum xalqımızın üzünü ağ, torpaqlarımızı işğaldan azad edən qəhrəmanlardandır. Hər bir anaya belə bir igid övlad böyütmək nəsib olmur. Oğlumla fəxr edirəm".

Elşən QƏNİYEV,

Azərbaycan.-2024.- 7 mart, № 52.- S.10.