Azərbaycanın xarici iqtisadi əlaqələri kəmiyyətdən keyfiyyətə keçir

Məlumdur ki, xarici iqtisadi əlaqələrin inkişafını şərtləndirən əsas amil uzaq və yaxın ölkələrlə münasibətləri genişləndirməkdir. Bu baxımdan, İqtisadiyyat Nazirliyinin atdığı addımlar intensivliyi və dinamikliyi ilə seçilir.

Bu yaxınlarda iqtisadiyyat nazirinin birinci müavini, Azərbaycan Respublikası Hökuməti və Braziliya Federativ Respublikası Hökuməti arasında Ticarət və İnvestisiya Əməkdaşlığı üzrə Birgə İşçi Qrupunun həmsədri Elnur Əliyev Braziliyanın Kənd Təsərrüfatı və Heyvandarlıq Nazirliyinin ticarət və beynəlxalq əlaqələr üzrə katibi Roberto Perosa ilə görüşmüşdür. Ölkələrimiz arasında ticarət dövriyyəsinin genişləndirilməsi və iqtisadiyyatın müxtəlif istiqamətləri üzrə əlaqələrin inkişafı üçün imkanların olduğu nəzərə çatdırılmış, Azərbaycanda sahibkarlar üçün yaradılmış əlverişli biznes və investisiya mühiti, sənaye zonalarında investorlar üçün nəzərdə tutulan güzəştlər və stimullar barədə danışılmışdır. Bundan başqa, COP29 çərçivəsində birgə fəaliyyət imkanları və "yaşıl" maliyyələşmə üzrə əməkdaşlıq məsələləri də nəzərdən keçirilmişdir.

Tərəflər həmçinin qarşılıqlı investisiya qoyuluşu, dövlət-özəl tərəfdaşlığı çərçivəsində əməkdaşlıq, aqrar sahədə əlaqələrin perspektivləri, o cümlədən Azərbaycanın kənd təsərrüfatı məhsullarının Braziliyaya ixracının genişləndirilməsi, ərzaq təhlükəsizliyi, aqroparklara müasir texnologiyaların cəlbi istiqamətində fikir mübadiləsi aparmışlar.

Elnur Əliyevin Moldovanın energetika naziri Viktor Parlikov arasında keçirilən görüşdə isə Azərbaycan Respublikası ilə Moldova Respublikası arasında iqtisadi əməkdaşlıq üzrə birgə Hökumətlərarası Komissiyanın əməkdaşlığımızın gücləndirilməsində və biznes dairələrinin səylərinin əlaqələndirilməsində səmərəli platforma olduğu vurğulanmışdır. Qeyd olunmuşdur ki, "yaşıl enerji" sahəsində qarşılıqlı faydalı əməkdaşlıq üçün ciddi perspektivlər mövcuddur.

Birləşmiş Ərəb Əmirliklərinin (BƏƏ) energetika və infrastruktur naziri ilə görüşdə də iqtisadi əlaqələr, "yaşıl enerji" layihələrinin icrası, birgə fəaliyyətin genişləndirilməsi üçün investisiya imkanları və COP29 çərçivəsində əməkdaşlıq istiqamətləri müzakirə edilmişdir. İqtisadiyyat naziri Mikayıl Cabbarov, SOCAR-ın prezidenti Rövşən Nəcəf və Birləşmiş Ərəb Əmirliklərinin energetika və infrastruktur naziri Suhail Məhəmməd Al Mazrui arasında keçirilən həmin görüşdə iqtisadi-ticarət, qarşılıqlı investisiya qoyuluşu, logistika və s. sahələrdə tərəfdaşlığın genişləndiyi qeyd olunmuşdur. Bildirilmişdir ki, BƏƏ-nin "Masdar" şirkəti ilə "yaşıl enerji" sahəsində həyata keçirilən uğurlu əməkdaşlıq enerji təhlükəsizliyinin təmin edilməsi baxımından xüsusi əhəmiyyətə malikdir. Ölkəmizin əlverişli coğrafi mövqeyinin, mühüm nəqliyyat dəhlizlərinin kəsişməsində yerləşməsinin, tranzit imkanlarının artmasının investorların fəaliyyəti üçün geniş imkanlar açdığının vurğulandığı görüşdə bu imkanlardan yararlanan BƏƏ iş adamları ilə birgə layihələrin icrasının regional əməkdaşlığı daha da genişləndirəcəyi diqqətə çatdırılmışdır.

Azərbaycanın iqtisadi əlaqələrinin inkişafında önə çıxan amillərdən biri də Avropa İttifaqı ilə əməkdaşlığın inkişafıdır. Artıq bu çərçivədə Avropa İttifaqı investisiyalarının müəyyən edilməsi və prioritetləşdirilməsi üçün yaradılan yüksəksəviyyəli işçi qrupunun 2-ci iclasında mühüm məsələlər müzakirə olunmuşdur. Tədbirdə iqtisadiyyat nazirinin birinci müavini Elnur Əliyev, Avropa Komissiyasının Şərq Qonşuluğu və İnstitusional Quruculuq üzrə direktoru Adrienn Kirali, Avropa İttifaqının Azərbaycan Respublikasındakı Nümayəndəliyinin rəhbəri Peter Mixalko, xarici işlər və maliyyə nazirliklərinin, Avropa Yenidənqurma və İnkişaf Bankının, Avropa İnvestisiya Bankının nümayəndələri iştirak etmişlər. Avropa Komissiyası tərəfindən irəli sürülən flaqman təşəbbüslərin ölkəmizin növbəti onillikdə sosial-iqtisadi inkişafının milli prioritetləri ilə üst-üstə düşdüyünün qeyd olunduğu tədbirdə ölkəmizin beynəlxalq maliyyə institutları və Avropa İttifaqı ilə tərəfdaşlığa verdiyi önəm xüsusi vurğulanmışdır. Diqqətə çatdırılmışdır ki, Azərbaycanın 2030-cu ilədək sosial-iqtisadi inkişafına dair milli prioritetləri üzrə tədbirlərin həyata keçirilməsi, xüsusilə rəqabətqabiliyyətli iqtisadiyyatın təmini və digər məqsədlərə çatması beynəlxalq maliyyə institutları ilə əməkdaşlığı zəruri edir.

Bahadur İMANQULİYEV,

Azərbaycan.-2024.- 7 mart, № 52.- S.11.