Milli maraqlara zidd olan əməllərin qarşısı qətiyyətlə alınır

Artıq bütün dünyaya məlumdur ki, ABŞ və bir sıra Qərb dövlətləri özlərinin hədəflərində olan ölkələri nəzarətdə saxlamaq üçün fərqli metod və vasitələrdən istifadə edirlər. Ən optimal metodlardan biri də bu ölkələrdəki müxalifət təşkilatlarını qanunsuz maliyyələşdirmək və onların fəaliyyəti üçün şərait yaratmaqdır. ABŞ və Qərb ölkələri məqsədlərinə çatmaq üçün uzun illərdir icra mexanizmi formalaşdırıblar.

Əsas məqsədlərinin üstünü ört-basdır etmək üçün xeyli sayda və müxtəlif adlarda donor institutları, yardım fondları yaradıblar. USAID, NED, Marşal Fondu, IREX və digər onlarla "beynəlxalq institutlar" məhz bu cür proqramların icraçıları kimi meydana çıxıblar. Onlar üzdə "demokratik inkişafa dəstək vermək" adı altında fəaliyyət göstərirlər, gizlində isə maraqlarına xidmət edən işlər görürlər. Bu məqsədlə yüksək məbləğdə qrantlar ayırır, pullar xərcləyirlər. Yerli icmaları maddi vəsaitlə şirnikləşdirərək legitim hakimiyyətlərə qarşı ictimai etimadsızlığa sövq edirlər. Bundan ötrü dəridən-qabıqdan çıxırlar.

Xarici təşkilatların dəstəklədiyi müxalifət qrupları deyəndə, təkcə müxalifətdə olan siyasi partiyalar nəzərdə tutulmur. Düzdür, əvvəllər metodologiya fərqli olub. Ayrı-ayrı ölkələrdə təxribatçı əməllər törədilməsi üçün konkret siyasi təşkilatlarla əməkdaşlıq edilib. Siyasi partiyalara kənardan maddi vəsait göstərilməsi qanunla qadağan edildiyi üçün onların ətrafında yedək kimi "QHT və KİV" cəmləşdirilib. Həmin "QHT" və "KİV"ə külli miqdarda "qrant vəsaiti" ayırmaqla, mərkəzdə dayanan siyasi partiyanın maliyyələşdirilməsi həyata keçirilib.

Son zamanlardakı əməllərindən hiss olunur ki, adlarını çəkdiyimiz təşklatlar məqsədlərinə daha tez çatmaq üçün əvvəlki variantları dəyişiblər. İndi daha müasir hesab etdikləri yeni variantların tətbiqinə çalışırlar. Bu gün əsas hesab olunan işlər təkcə siyasi partiyaların və siyasi fiqurların üzərində fokuslaşmır, "QHT" və "KİV"i hansısa siyasi partiyanın ətrafında cəmləyib onun vasitəsilə koordinasiya etmirlər. Həm də onlar milli düşüncəyə zidd olan, cəmiyyətin ab-havasını pozan marginal qrupları dəstəkləyirlər. Məsələn, ABŞ və Qərb ölkələri Azərbaycanda "radikal feminizm"in təşkilatlandırılıb aktivləşdirilməsində birbaşa iştirak edirlər. Bu işi daim diqqət mərkəzində saxlayır, maliyyələşdirirlər.

Radikal feministlər ailə institutuna qarşı çıxırlar, qeyri-ənənəvi münasibətləri təbliğ edirlər, illərdən bəri yaranmış milli mənlik şüurunu "geri zehniyyət" adlandırırlar. Qərb institutları radikal feministləri dəstəkləməklə, əxlaqdan, ənənədən kənar, milli mənliyini unutmuş cəmiyyət və o cəmiyyətdə yaşayacaq "insanlar" formalaşdırmağa çalışırlar. Qərb institutları radikal feminizmi dəstəkləyib təşkilatlandırmaqla, ölkədə ictimai-siyasi proseslərə müdaxilə etmək üçün yeni mexanizm hazırlayırlar. Bir sözlə, "milli feministlər" adı altında elə "çevik və işgüzar qrup" formalaşdırırlar ki, anti-Azərbaycan təyinatlı istənilən məsələdə bir işə yarıya bilsinlər. Artıq son zamanlar eyni modelin digər sahələrdə də tətbiq edildiyi müşahidə olunur.

Qərbin Azərbaycana qarşı qarayaxma kampaniyası apardığı ünvanlardan biri də "Toplum TV"dir. Toplum TV"nin redaksiyası "Demokratik Təşəbbüslər İnstitutu"nun (DTİ) ofisində yerləşdirilib. "Toplum TV"nin məqsədi guya insan hüquq və azadlıqlarını, ifadə sərbəstliyini ön planda tutaraq cəmiyyətin obyektiv informasiya ilə təmin olunmasına xidmət etməkdir. Bu şəbəkələr ayrı-ayrılıqda qurulmuş kimi görünsələr də, sonda eyni nöqtədən idarə olunduqları üzə çıxır. Ən maraqlısı isə odur ki, ayrı-ayrı göründüyü ehtimal edilən bu şəbəkələr arasında əlaqələndirici bağların necə qurulmasıdır. Həmin bağlar nəzərdən keçiriləndə, bu şəbəkələrin nə məqsədlə yaradıldığı və haradan idarə edildiyi bəlli olur.

Təbiidir ki, belə halların qarşısı qətiyyətlə alınmalıdır. Elə alınır da! DİN Mətbuat xidmətinin verdiyi məlumata görə, paytaxtın Nərimanov rayonu Y.V.Çəmənzəminli, ev 98 B ünvanında yerləşən ofisdə və əlavə digər ünvanlarda bir qrup şəxsin fəaliyyəti ilə bağlı daxil olan məlumat üzrə polis əməkdaşları tərəfindən əməliyyat-axtarış tədbirləri keçirilib.

Qeyd edək ki, ABŞ və Qərb ölkələrinin bu əməlləri siyasi qarayaxma kampaniyasından başqa bir şey deyil. Bu prosesdə USAİD və Samanta Pauer başda olmaqla Qərb fondlarının, hüquq-müdafiə təşkilatlarının, mediasının rolu xüsusilə diqqəti cəlb edir. Şəbəkələrin qurulması və onların vasitəsilə ölkələrin daxilində qarışıqlıq yaradılması, sonra isə mövzunun Qərb mediası və QHT-ləri, daha sonra isə rəsmi müstəviyə keçirilməsi yalnız və yalnız çirkin məqsəd daşıyır.

Uzun illər ərzində xarici qüvvələrin Azərbaycanda qurduqları şəbəkə vasitəsilə qarışıqlıq yaratmaq cəhdləri uğursuzluğa düçar olub. Belə çirkin metodlarla daxili sabitliyə xələl gətirmək cəhdlərinin qarşısının vaxtında alınması ölkəmizin daim artan gücünün, qüdrətinin müsbət göstəricisidir.

Azərbaycan xalqının milli maraqlarına, Azərbaycan dövlətinin əleyhinə qarşı fəaliyyət göstərən "Toplum TV" kimi şəbəkələrin müəyyən edilməsi və neytrallaşdırılması olduqca vaxtında atılmış bir addımdır. Bundan sonra da ölkə daxilində sabitliyi, əmin-amanlığı pozmağa yönələn bütün cəhdlərin qarşısı qətiyyətlə alınacaq. Xalqımızın milli maraqlarına zidd olan pozuculuq əməlləri törədənlər kimliyindən asılı olmadan layiqli cəzalarını almalıdırlar.

Vahid MƏHƏRRƏMOV,

Azərbaycan.-2024.- 8 mart, № 53.- S.9.