Əsassız ittihamlarla bizi yolumuzdan çəkindirə bilməzlər

"Toplum TV"nin ofisində axtarış-əməliyyat tədbirlərinin həyata keçirilməsi xarici mediada ölkəmizə qarşı aparılan qarayaxma kampaniyasının yeni mərhələsinin başlanmasına səbəb olub. Gözlənilən idi ki, ölkəmizə qarşı gündəlik əsassız ittihamlar yağdıran Qərb mediası və bəzi siyasi dairələr nədənsə istifadə edib ondan "faydalanmağa"çalışırlar...

"Hadisə" ilə bağlı dərc olunan yazılara, səsləndirilən fikirlərə diqqət yetirsək, görərik ki, dəyişən heç nə yoxdur. Ənənəvi "dost"larımız köhnə melodiyaları yeni aranjimanda səsləndirirlər.

Məsələnin maraqlı tərəfi budur ki, polisin "Toplum TV"nin ofisində keçirdiyi tədbir başa çatar-çatmaz ABŞ Dövlət Departamentinin sözçüsü Metyu Miller olduqca "operativ" şəkildə Birləşmiş Ştatların "dərin narahat olduğunu" bildirib. İş burasındadır ki, baş verən olaylardan ölkə mediası hələ xəbərsiz olduğu bir vaxtda Metyu Millerin çox keçmədən ABŞ-nin "mövqeyi"ni ifadə etməsinə təəccüblənməmək olmur. Sanki ABŞ Dövlət Departamentinin sözçüsü Metyu Miller "Toplum TV"nin ofisinə müşahidə kamerası quraşdırıb, polisin keçirdiyi tədbirin başa çatmasını həsrətlə gözləyirmiş.

İşin maraqlı tərəfi budur ki, Azərbaycana qarşı təşkil olunan kampaniyaların arxasında xarici agent statusundan geniş yararlanmaqla xarici dəstək almaqda və ya xarici təsir altında olmaqda şübhəli bilinən şəxslərə qarşı tədbir görən ABŞ dayanır. Öz daxilində hər hansı xarici təsiri qadağan edən, buna görə vətəndaşlarını məsuliyyətə cəlb edən ABŞ digər ölkələrdə, o cümlədən Azərbaycanda bu işləri böyük həvəslə həyata keçirir. Müxtəlif ölkələrdə bu əməllərə qarşı tədbir görüləndə isə xarici mediada həmin ölkəyə qarşı çirkin kampaniyalar təşkil edilir. Dərhal "fundamental azadlıqlarından istifadə edənlərə qarşı" tədbir ifadəsi işə düşür. Əslində, bu gün Azərbaycanı ittiham edənlər nəyin necə olduğunu yaxşı bilirlər. Heç də sirr deyil ki, Qərb institutları Azərbaycan qanunlarına zidd şəkildə onların sifarişləri ilə işləyən, proqramlarını icra edən media qurumlarını, jurnalistləri və ayrı-ayrı şəxsləri Azərbaycanda qarışıqlıq salıb öz planlarını həyata keçirmək məqsədilə maliyyələşdirirlər.

Xüsusilə bəzi Qərb dairələri Şərqdə terror təşkilatlarını maliyyələşdirdikləri mexanizmdən istifadə edib "öz adamlarına" adsız kartlar verirlər. Qanunsuz maliyyə vəsaitləri Qərb institutları tərəfindən Gürcüstan vasitəsilə həmin şəbəkəyə ötürülür.

Necə deyərlər, Qərb bir güllə ilə iki dovşan vurur. Həm ölkəmizdə özünün casus şəbəkəsini yaradır, həm də qanunsuz maliyyə maxinasiyalarını həyata keçirərək çirkli pullarını yuyur...

Məlum məsələdir ki, istər ABŞ-ni, istərsə də Qərbi dünyanın hər bir yerində olduğu kimi, ölkəmizdə də insan haqlarının vəziyyəti maraqlandırmır. Dünyada insanlara qarşı ən böyük haqsızlıq və ədalətsizliklərin adları çəkilən dairələrdən gəldiyi məlumdur və bu, təzə mövzu deyil. Bu gün Azərbaycanda "azad söz", "fundamental insan azadlıqları"nı "müdafiə" edənlər bu terminlərdən istifadə edərək öz maraqlarını həyata keçirməyə çalışırlar. Qərb mediasının və institutlarının bu gün səsləndirdikləri "ittihamlar" sözsüz ki, birinci olmadığı kimi, heç sonuncu da deyil. "Abzas Media" ilə əlaqədar analoji tədbirlər həyata keçirilən zaman da Qərbin bu "hərəkətliliyinin" şahidi olmuşuq. Xatırladaq ki, məlum istiqamət üzrə aparılan istintaq tədbirləri zamanı da inkarolunmaz çoxsaylı qanun pozuntuları müəyyən edilmişdi.

İş burasındadır ki, Azərbaycanda qarışıqlıq yaratmaq üçün bütün mümkün vasitələrdən istifadə etməyə çalışan Qərb öz fəaliyyətini səngitmək əvəzinə yeni "donor"lar axtarışını davam etdirir. Nə yazıq ki, özlərini "media qurumu", "azad jurnalist" kimi təqdim edən bəzi "vətəndaşlar"ımız da asanlıqla şirnikləndirici tora düşürlər. Öz ölkəsinə, Vətəninə qarşı xəyanət yolu tutanların və qanunsuz fəaliyyətlərdə iştirak edənlərin yolu sözsüz ki, dəmir barmaqlıqlar arxasından keçməlidir.

"Toplum TV" ilə bağlı görülən tədbirlərdən sonra xarici mediada, hüquq-müdafiə təşkilatlarında, eləcə də Qərb rəsmiləri tərəfindən ardıcıl ittihamların səsləndirilməsi dövlətimizin təhlükəsizliyi naminə Azərbaycanı öz daxili məkanını təxribat və qeyri-qanuni fəaliyyətdən qorumaqdan çəkindirə bilməz.

Elşən QƏNİYEV,

Azərbaycan.-2024.- 10 mart, № 54.- S.8.