Xankəndidə separatçılığın və terrorçuluğun izləri aradan qaldırılır

"Ermənilərin işğal dövründə Xankəndidə Azərbaycana düşmən münasibətlərini təbliğ etmək məqsədilə tikdikləri binaları sökmək tamamilə düzgün addımdır. Nəzərə almaq lazımdır ki, Xankəndi neytral şəhər deyil və başqa dövlət tərəfindən idarə edilmir. Xankəndi əzəli və əbədi Azərbaycan ərazisi olduğuna görə orada nəyi necə inşa etmək ölkəmizin daxili işidir. Əlbəttə ki, qanunsuz tikililər sökülməlidir".

Bu fikirləri "Azərbaycan" qəzetinə açıqlamasında Milli Məclisin deputatı Anar İsgəndərov deyib. Deputat qeyd edib ki, Vətən müharibəsindən sonra Qarabağ və Şərqi Zəngəzurda aparılan bərpa və quruculuq işləri o qədər sürətli və keyfiyyətlidir ki, hamının diqqətini cəlb edir. Bu uğura sevinənlər, eləcə də bunu qəbul etməyənlər və özünə dərd edənlər məlumdur.

Deputat söyləyib ki, Qarabağ və Şərqi Zəngəzur tarixi Azərbaycan torpaqlarıdır: "Azərbaycan tarixi torpaqlarını düşmən işğalından azad etdi. Bu gün artıq həmin ərazilərdə hansı şəhərin və kəndin necə inşa ediləcəyi, su anbarlarının harada tikiləcəyi, abidələrin necə bərpa olunacağı Azərbaycanın öz işidir. Xankəndidə o binalar ki, sökülür, deməli, doğrudan da, sökülməli imiş. Vaxtilə Azərbaycan xalqına qarşı soyqırımı planları hazırlayanların yuvasına çevrilən binalar bizə lazım deyil. Azərbaycan dövləti kəndlərimizi, şəhərlərimizi oda-alova vermək üçün planlar hazırlanan şeytan yuvalarını niyə qoruyub saxlamalıdır?! Ermənilərin 30 illik işğalı dövründə separatizmin simvoluna çevrilən binalar, ucaldılan heykəllər, bütün obyektlər, əlbəttə ki, dağıdılacaq".

Anar İsgəndərovun sözlərinə görə, Vətən müharibəsində Azərbaycan öz torpaqlarını işğaldan azad etdi. Müharibədən dərhal sonra isə həmin ərazilərimizdən yenidənqurma işlərinə başlanıldı. İndi bunu gözü götürməyən ermənilər guya onlara məxsus binaların, heykəllərin sökülməsini uydurub bar-bar bağırırlar.

"Yüz illər boyu erməni xislətini başa düşməmişdik, bizə bu barədə heç nə deməmişdilər. Sovet hökumətinin xalqlar dostluğu siyasəti bizə başqa ideoloji xətti təlqin edirdi. Ancaq biz, nəhayət, dərk etdik ki, erməni bizə qonşu olsa da, həm də düşməndir. Bu mənada Azərbaycan xalqı erməni xislətinə artıq yaxşı bələddir. Əslində, onların bina, abidə, heykəl dərdi yoxdur, sadəcə olaraq işğalçılıq və separatçılıq ruhu hayları dinc oturmağa qoymur. Azərbaycan dövləti isə ermənilərin xalqımıza qarşı törətdikləri vəhşilikləri, işgəncələri heç vaxt yaddan çıxarmayacaq. Ermənistan və havadarları nə oyundan çıxırlarsa- çıxsınlar, bizi öz haqq yolumuzdan döndərə bilməyəcəklər", - deyə müsahibimiz əlavə edib.

Deputat yekunda qeyd edib ki, Ermənistanın Xankəndidəki qanunsuz tikililərin sökülməsinə siyasi don geydirməyə çalışması tamamilə əsassız və qəbuledilməzdir. Onların riyakar cəhdlərinə baxmayaraq, işğal dövründə tikilən belə binalar söküləcək.

Nəzrin QAFARZADƏ,

Azərbaycan.-2024.- 10 mart, № 54.- S.9.