Düşmənçiliyi heykəllə aparan Fransa

Natəvanın abidəsinə qarşı edilən vandallıq Makron hakimiyyətinin çirkin simasından xəbər verir

"...Bu, deyə bilərəm ki, artıq kin, gücsüzlük və isterikanın özünü heykəldə göstərdiyi mənəvi deqradasiyanın dibidir. Yəni burada onlar praktik olaraq ermənilərdən az fərqlənirlər. Çünki ermənilər Natəvanın Ağdamdakı məzarını qazıblar, heykəlini məhv ediblər. ... Fransa isə Natəvanın həmin ölkədə heykəlini təhqir edir. Göründüyü kimi, burada bir oxşarlıq var".

Prezident İlham Əliyevin yanvarın 10-da yerli televiziya kanallarına müsahibəsi zamanı səsləndirdiyi kimi, özünü dünyaya "mədəniyyət beşiyi" kimi təqdim edən Fransa Azərbaycanın görkəmli şairi Xurşidbanu Natəvanın heykəlinə qarşı törətdiyi vandallıq aktı ilə əsl çirkin simasını sərgiləmiş oldu. Həm də işğal müddətində ərazilərimizdəki maddi-mədəni irsi vəhşicəsinə dağıdan Ermənistandan heç nə ilə fərqlənmədiyini, özünün də mədəniyyət düşməni olduğunu göstərdi.

Mədəniyyət düşməni

Belə ki, martın əvvəlində Natəvanın Fransanın Evian lö Bən şəhərindəki heykəlinin Parisə gətirilməsi və səfirliyin nəzdindəki Mədəniyyət Mərkəzinin bağında ucaldılması zamanı müəyyən olunub ki, üzərinə qırmızı boya atılmaqla yanaşı, heykəlin gözləri, adının və Azərbaycan yazısının yazıldığı hissələrinə də qırmızı boya çəkilib, abidəyə zərər verilib. Belə ki, heykəlin burnu və barmaqları qırılıb.

Bu gün dünyada birnömrəli islamofob ölkə kimi tanınan Fransanın anti-Azərbaycan fəaliyyəti tüğyan edir. Erməni lobbisinin pul hərisinə çevrilən Makron hökuməti bütün platformalarda ölkəmizə qarşı qərəz siyasəti həyata keçirir. Gah Avropa Parlamentində "qətnamə" adı altında kağız-kuğuz parçaları qəbul etdirir, Ermənistanı silahlandırıraraq savaşa qızışdırır, gah da Natəvanın heykəlinin timsalında mədəniyyətimizə hücum edir. Bütün bunlar, əslində, Azərbaycanın Fransanın yürütdüyü istər neokolonialist, istər şovinizm, ksenofobiya və digər mədəniyyətlərə qarşı dözümsüzlük siyasətini ifşa etməsinin fonunda baş verir. Dünyadakı müstəmləkələrindən bir-bir qovulan Parisin Qafqaza yerləşmək planının Bakı tərəfindən suya salınması, casus şəbəkəsinin çökdürülməsi isə Makron hökumətini olduqca qəzəbləndirib. Buna görə də sülhün, dostluğun, incəsənətin, mədəniyyətin azərbaycanlı rəmzi olan şair Xurşidbanu Natəvanın heykəlinə əl uzadır.

Natəvanın Dümanı şahmatda mat etməsi...

O Natəvan ki, hələ indi özünü müasir, demokratik dəyərlərə sahib kimi qələmə verən Avropada qadınlar azad sözə, hüquqa malik olmadığı XIX əsrdə Azərbaycanda siyasətdə də, sosial həyatda da, incəsənətdə də, mədəniyyətdə də öz sözünü deyib. Xan qızı Natəvanın 1858-ci ildə məşhur fransız yazıçısı Aleksandr Dümanı şahmatda mat etməsi isə hələ də dillərdə dastandır...

Əslində, Fransanın başqa xalqlara məxsus tarixi və mədəniyyət sərvətlərini müsadirə etmiş ölkə olması gerçəkliyini, Ermənistan tərəfindən 30 il müddətində xalqımıza məxsus tarixi, mədəni və dini abidələrin tamamilə dağıdılmasına görə UNESCO çərçivəsində heç vaxt narahatlığını ifadə etməməsini və bu kimi əməllərini göz önünə gətirdikdə Parisin mədəniyyətə qarşı münasibətinin hansı murdar səviyyədə olduğunu aydın təsəvvür etmək mümkündür.

Bu baxımdan Fransanın Natəvanın heykəlinə qarşı vandallıq aktı sadəcə özünün acizliyini və bundan əvvəl ermənilərin törətdiyi mədəni soyqırımını davam etdirdiklərini göstərir. İşğal zamanı mənfur ermənilər Xan qızının Şuşada ucaldılmış büstünü güllələyərək zədələmiş, sonra isə tamahkarlıqla bu mədəniyyət nümunəsini əritmək, ondan qazanc əldə etmək istəmişdilər. Amma bu iyrənc əməllərinə çata bilməmişdilər, Natəvanın "yaralı" büstü Ulu Öndər Heydər Əliyev tərəfindən vandallardan xilas edilərək, bir gün mütləq Şuşaya qaytarılacağı qətiyyəti ilə Bakıya gətirilmiş və müvəqqəti olaraq İncəsənət Muzeyinin həyətində yerləşdirilmişdi.

Parlaq Zəfərimizdən sonra isə Xurşidbanu Natəvanın həmin heykəli Şuşaya, öz əvvəlki yerinə qaytarılıb.

Bütün bunlar da göstərir ki, mənfur düşmənlər nə qədər çalışsa da, xalqımızın mənəvi, mədəni ruhunu sındıra, məhv edə bilməz.

Yasəmən MUSAYEVA,

Azərbaycan.-2024.- 10 mart, № 54.- S.9.