Xaricdən maliyyələşən media mənsubları...

Onların yeganə məqsədi cəmiyyətdə Azərbaycan əleyhinə ideyalar yaymaqdır

"Azərbaycan hüquq-mühafizə orqanlarının "Toplum TV" və "Abzas Media" ilə bağlı qərarları tamamilə qanunauyğundur. Azərbaycan qanunlarına görə, KİV-in maliyyə fəaliyyəti şəffaf olmalı, digər bütün işəgötürənlər kimi vergi ödəməli və Sosial Müdafiə Fonduna ödənişlər etməlidirlər".

Bu sözləri "Azərbaycan" qəzetinə açıqlamasında Milli Məclisin deputatı Aydın Mirzəzadə deyib. Deputat bildirib ki, bu iki mətbuat orqanı xaricdən mənbəyi bilinməyən, qeyri-qanuni yolla Azərbaycana maliyyə gətirir, həmin çirkin vəsaitlə fəaliyyət göstərirlər. Aydın məsələdir ki, xaricdən bu KİV-i maliyyələşdirən mənbələr Azərbaycanda gedən proseslərin obyektiv işıqlanmasına heç cür imkan verə bilməzlər. Bu iki media orqanı tərəfindən yayılan materiallar göstərir ki, dövlətin suveren hüquqlarının qorunması, beynəlxalq aləmdə milli maraqlarımıza uyğun fəaliyyət göstərməsi, işğaldan azad olunmuş ərazilərdə gedən quruculuq işləri, şəhid ailələri və qazilərə göstərilən dövlət qayğısının işıqlandırılması onların marağında deyil. Onların məqsədləri Azərbaycan əleyhinə müəyyən ideyaların cəmiyyətdə yayılmasıdır.

Deputat qeyd edib ki, xaricdəki maliyyə mərkəzləri adlarının açılmasında maraqlı deyillər: "Xaricdən maliyyələşən media mənsubları isə onlardan aldıqları tapşırıqları yerinə yetirməlidirlər. Bu baxımdan Azərbaycan hakimiyyət orqanlarının atdığı addımlar ilk növbədə daxildə qanunun yerinə yetirilməsinin hər kəs üçün vacibliyini ortaya qoyur. Qərb institutlarının bu məsələ ilə bağlı irad bildirməyə hər hansı əsası yoxdur. Məgər Avropa dövlətləri razı olardımı, xaricdən hansısa mənbələr onların ölkələrində mətbuat orqanı yaratsın, həmin KİV-də dövlətin maraqlarına zidd olan, eyni zamanda ölkədəki vəziyyəti qeyri-obyektiv işıqlandıran materialar verilsin? Əlbbətə ki, Qərb institutları buna heç vaxt razı olmazlar, amma nədənsə, Azərbaycana gəldikdə buna əks mövqe tuturlar".

A.Mirzəzadə hesab edir ki, Azərbaycan suveren hüquqlarını, milli maraqlarını qorumaqda düzgün addım atır və bu, heç də əlahiddə hadisə deyil, bütün dövlətlərin etdikləri hərəkəti təkrarlayır.

Əsmər QARDAŞXANOVA,

Azərbaycan.-2024.- 12 mart, № 55.- S.10.