Separatçı ünsürlərin avantüraları Ermənistana baha başa gələcək

2020-ci ilin Vətən müharibəsində torpaqlarımız işğaldan azad edildi. 30 ilə yaxın davam edən işğala cəmi 44 gün ərzində son qoyuldu. Ötən ilin 19-20 sentyabr tarixlərində isə cəmi 23 saata Qarabağdakı erməni separatizmi məhv edildi və bununla da bütün torpaqlarımız üzərində milli suverenliyimiz tam təmin olundu.

Qeyd edək ki, Vətən müharibəsindən sonra Ermənistan dövləti imzalanan 10 noyabr üçtərəfli Bəyanat ilə üzərinə götürdüyü öhdəlikdən irəli gələrək qoşunlarının qalıqlarını Rusiya sülhməramlılarının müvəqqəti yerləşdikləri Azərbaycan ərazilərindən çıxarmadı. Qarabağdakı separatçı rejim isə təxribatlarını, ərazilərin minalanmasını, Ermənistandan silah-sursat daşınmasını davam etdirdi. Təxminən 3 ilə yaxın müddətdə Ermənistan rəhbərliyi, Qarabağdakı separatçılar nə Vətən müharibəsinin nəticələrindən, nə də Azərbaycanın xəbərdarlıqlarından nəticə çıxardılar. Azərbaycan isə necə demişdisə, elə də etdi. Separatçılar Azərbaycanın başlatdığı antiterror tədbirlərinin qarşısında heç bir sutka tab gətirə bilmədilər.

Antiterror tədbirləri nəticəsində Azərbaycanın hüquq-mühafizə orqanları Qarabağdakı qondarma rejimin başçıları olmuş Arkadi Qukasyan, Bako Saakyan, Arayik Harutyunyan, habelə "sabiq xarici işlər naziri" David Babayan, "parlament sədri" David İşxanyan, "generallar" Lyova Mnatsakanyan, David Manukyan və "keçmiş dövlət naziri" Ruben Vardanyan qandallanaraq Bakıya gətirildilər. Vaxtilə Azərbaycanı təhdid edən, Gəncənin raket atəşinə tutulması üçün əmr verən, xəbərdarlıqlarımıza ironik münasibət bildirən separatçılara tezliklə layiqli cəza veriləcək. "Onlar Bakıya gəlmək istəyirdilər, onlar bizi hədələyirdilər, deyirdilər ki, onların tankları Bakı küçələrində olacaq, haqlı çıxdılar. Onların tankları Hərbi Qənimətlər Parkındadır. Onlar deyirdilər ki, Bakıya gəlib çay içəcəklər. Burada da haqlıdırlar. İndi çay içirlər, istintaq təcridxanasında", - deyə Prezident İlham Əliyev bildirib.

Antiterror tədbirləri ilə 200 illik erməni separatizminə və Qarabağdakı qondarma və separatçı rejimin varlığına birdəfəlik son qoyuldu. O cümlədən qondarma rejimin bu gün Ermənistanda olan nümayəndələri də özlərini buraxdıqlarını elan etdilər. Lakin özünü buraxmış və artıq mövcud olmayan qondarma rejimin hazırda Ermənistanda yenidən baş qaldırdığı, bu istiqamətdə müxtəlif təşəbbüslərin edildiyi müşahidə olunur. Məsələn, bir müddət əvvəl Ermənistanın kütləvi informasiya vasitələrində özünü hələ də hansısa qondarma "dövlətin prezidenti" kimi qələmə verən S.Şahramanyan adlı biri tərəfindən "dövlət naziri vəzifəsinə təyinat həyata keçirməsi" barədə məlumatlar yayılıb. Həmçinin bu adamın Ermənistanın daxili siyasi qüvvələrinin təmsilçiləri və İrəvandakı müxtəlif ölkələrin diplomatları ilə əlaqə saxladığı da yayılan məlumatlar arasındadır. Separatçı ünsürlərin fəaliyyət dairələrini genişləndirərək Qərb təmsilçiləri ilə görüşlərə can atdıqları da bildirilir.

Ermənistandakı separatçı ünsürlərin fəaliyyətinin Ermənistan rəhbərliyinin nəzarətində olmasına heç bir şübhə yoxdur. Görünən odur ki, Paşinyan hakimiyyəti də onların fəaliyyəti üçün şəraitin təmin edilməsində maraqlıdır. Münasibətlərin normallaşdırılması və sülhə nail olunması ilə bağlı danışıqlarda indiyə kimi sözü ilə əməli üst-üstə düşməyən Ermənistan rəhbərliyinin separatçı ünsürlər üzərindən də avantüralara rəvac verdiyi ortadadır.

İndiyə kimi Ermənistanın bütün təxribatları öz başında çatlayıb. Əvvəldə də qeyd edildiyi kimi, Azərbaycan tərəfi necə deyibsə, elə də edib. Ermənistanda separatçıların dirçəldilməsinə yönəlik addımlar da İrəvana baha başa gələcək. Bu proses davam edəcəyi təqdirdə, Ermənistanın ağır nəticələrlə üzləşəcəyi şübhə doğurmur. Çünki Azərbaycan dövləti də Qərbi Azərbaycanı bəyan edə bilər.

Rəşad CƏFƏRLİ,

Azərbaycan.-2024.- 12 mart, № 55.- S.10.