Ermənistanda hakimiyyət separatçıların fəaliyyəti üçün şərait yaradır

Son günlər Ermənistan informasiya məkanında Qarabağ mövzusu gündəmi zəbt edib. Görünür, İkinci Qarabağ müharibəsində, eləcə də ondan sonrakı antiterror əməliyyatlarında Azərbaycan Ordusundan sarsıdıcı zərbə alan ermənilər yenə də xam xəyallarla yaşamaq istəyirlər.

Ötən ilin sentyabrında özünü buraxmış və deməli, artıq mövcud olmayan Qarabağ xuntası yenidən Ermənistanda baş qaldırır. Bu, bir növ ölünün xortlamasına bənzəyir. Kamera qarşısında özünü sülhün tərəfdarı kimi göstərən Ermənistan rəhbərliyi gizlində separatçıların fəaliyyəti üçün şərait yaradır. Əgər şərait yaratmasa, xunta rejiminin tör-töküntüləri bir addım belə ata bilməzlər. Separatçılar onlar üçün Ermənistan hakimiyyətinin yaratdığı bu şəraitdən geninə-boluna yararlanaraq fəaliyyətlərini genişləndirməyə, Qərb dövlətlərinin nümayəndələri ilə də görüşlər keçirməyə can atırlar.

Bu günlər Ermənistanda baş verən hadisələr göstərir ki, düşmən ölkənin daxilində Qarabağ separatçıları ilə bağlı ciddi qarşıdurma və ziddiyyətlər hökm sürür. Ermənistan prezidenti əvvəllər Qarabağdakı keçmiş qondarma qurumun strukturlarının saxlanılmasına qarşı çıxırdı. Buna görə də Ermənistanda Qarabağ ermənilərinə ögey münasibət göstərilirdi. Bunun da müəyyən səbəbləri var idi. Hakimiyyətdə olanlar ilk günlər separatçıların Ermənistanda dövlət çevrilişi və Qarabağ klanını yenidən canlandırmaq kimi niyyətlərindən ehtiyat edirdilər. Kürsülərini itirməkdən qorxurdular. Buna görə də Qarabağ separatçıları Ermənistanda sıxışdırılırdı.

Həmin ərəfələrdə keçmiş qondarma rejimin "rəhbəri" Samvel Şahramanyanın Ermənistanın üçüncü prezidenti Serj Sarkisyanla gizli görüş keçirməsi barədə mətbuatda xəbərlər də yayılmışdı. Təbii ki, tərəflərin görüşü hökumətin diqqətindən yayınmamışdı. Keçirilən bu gizli görüşlər Nikol Paşinyan hökumətinə qarşı bir planın qurulmasından xəbər verirdi. Bu gizlin görüş sonda baş nazirin səbr kasasının daşmasına gətirib çıxardı. Uzun müddətdən bəri xoşu gəlməyən dövlət xadimlərini, hərbi elitanın üzvlərini parlamentin "44 günlük müharibənin şəraitini araşdıran komissiya"sı vasitəsilə cəzalandıran Paşinyanın tapşırığı ilə Samvel Şahramanyan dindirilmə üçün dəvət edildi. Bir neçə saat davam edən sorğu-sual barədə mətbuata ətraflı məlumat verilməsə də, siyasi dairələrdə tezliklə separatçı "liderin" ciddi cəzalandırılacağı barədə xəbərlər dolaşmağa başladı.

Həmin ərəfədə Ermənistan mətbuatında Qarabağ klanının əleyhinə informasiyalar yayılmağa başladı. İctimai xadim, Qarabağ Erməniləri Hərəkatının rəhbəri Artur Ağacanov bildirmişdi ki, Qarabağda separatçıların formalaşması artıq keçmişdə qalıb. "İnsanları Qarabağdan çıxmağa təhrik edən xuntanın keçmiş "rəhbər"ləri (əksəriyyəti Azərbaycandadır, mühakimə olunur) indi vəziyyətdən narazıdırlar, çünki onların heç kimə faydası olmayıb, vərdiş etdikləri maliyyə dəstəyindən məhrum olublar. Aydındır ki, bu adamlar ehtirasları körükləməyə çalışacaqlar, erməni cəmiyyətinin radikal nümayəndələri isə onları dəstəkləyəcəklər. İrəvandakı Qarabağ klanının nümayəndələri, Ermənistanın keçmiş prezidentləri Robert Koçaryan və Serj Sarkisyanın tərəfdarları da bu işə qarışırlar. Ermənistana köçən Qarabağ erməniləri manipulyasiya ediləcəklər. A.Ağacanov bütün bunların Ermənistanın indiki hakimiyyətinə lazım olmadığını qeyd edib. "Separatçıların keçmiş rəhbərləri və Qarabağ klanı isə Ermənistan Respublikasında vəziyyəti gərginləşdirəcəklər, ona görə də onların indiki Ermənistan hökuməti ilə qarşıdurma yaşayacaqlarını demək olar. Bu fitnə-fəsad törədənlərin vəzifəsi, əslində, Ermənistan Respublikasında hakimiyyətə gəlməkdir", - deyib.

Bütün bunlar əvvəlki illərdə olub. Bu gün isə Ermənistanda hadisələr tamam başqa istiqamətə doğru inkişaf edir. Rəsmi İrəvan yenə də Qarabağ separatçılarını dəstəkləyir. İndi Qarabağ klanından hakimiyyəti üçün elə bir təhlükə görməyən Paşinyan hökuməti özü onların fəaliyyəti üçün şərait yaradır. Yenə də bu terrorçu dəstədən öz məqsədi üçün istifadə etməyə çalışır. Xarici havadarlarının dəstəyindən həvəslənən haylar yenə öz xislətlərinə uyğun hərəkət etməyə başlayıblar. Deyəsən, ermənilərin yaddaşı pozulub, Azərbaycandan aldığı zərbələri unudublar.

Həmişə olduğu kimi, Ermənistan yenə də Fransaya, Qərb ölkələrinə arxalanaraq ikiüzlü siyasət yürüdür. Müxtəlif bəhanələrlə sülh danışıqlarından yayınmağa çalışır. Üzdə bir söz deyir, arxada söylədiklərinin əksini edir. Bu gün Qarabağ separatçılarına dəstək verməklə, revanşistlərin fəaliyyəti üçün şərait yaratmaqla Ermənistan özünə dərin quyu qazır. Çünki revanşist qüvvələr hansı ölkələrdə baş qaldırırsa-qaldırsın, xalqlarına yalnız göz yaşı və ölüm-itim gətirirlər. Qarabağ xuntasını, separatçıları dəstəkləyən Paşinyanı da separatçıların aqibəti gözləyir. Separatçıya dəstək verənin özü də separatçıdır. Əgər Ermənistan, doğrudan da, Azərbaycanla normal danışıqlar aparmaq istəyirsə, ölkəsində separatizmin kökünü kəsməli, baş qaldıran revanşizm alovunu söndürməlidir. Yoxsa bu gedişlə revanşizm alovu Ermənistanı başdan-başa yandıracaq.

Vahid MƏHƏRRƏMOV,

Azərbaycan.-2024.- 13 mart, № 55.- S.8.