Qərbin bədnam planları baş tutmayacaq

ABŞ-nin və Qərbin bəzi fondlar vasitəsilə müstəqil ölkələrdə dağıdıcı siyasət yürütdüyü hər kəs tərəfindən bilinən gerçəklikdir.

Onlar öz sifarişlərini icra etdirmək üçün hədəfə götürdükləri ölkələrin mediasını, QHT-lərini ələ almaqla, onları müxtəlif yollarla maliyyələşdirməklə pərdə arxasından çirkin planlarını yerinə yetirməyə çalışırlar. Pulla ələ aldıqları bu qurumlar vasitəsilə ölkədə qarşıdurmalar yaratmaq, xalqla dövləti üz-üzə qoymaq, hərbi çevrilişlər həyata keçirmək onların məqsədləridir.

Riyakar siyasət

Təbii ki, zamanında duyuq düşülərək qarşısı alına bilinməyən bu mənfur planların "ərəb baharı"na, Əfqanıstanın və sair ölkələrin timsalında hansı ağır nəticələrə gətirib çıxarmasının, ayrı-ayrı xalqları necə fəlakətə sürüklədiyinin şahidiyik. Dünyanın bir çox bölgəsində olduğu kimi, ABŞ Əfqanıstanda da hərbi qarşıdurma ssenarisini gerçəkləşdirdi və yenə də hər zaman olduğu kimi, burada da onu taleyin ixtiyarına buraxaraq qaçdı. Dünyaya "demokratiya", "azadlıq" toxumları səpdiyini, xalqların hüquqlarını qoruduğunu iddia edən Amerikanı bu gün əfqan xalqının nə hüquqlarının, nə də taleyinin zərrə qədər narahat etmədiyi gün kimi ortadadır.

Dünyanın gözü qarşısında ABŞ tərəfindən eyni ssenari hazırda Ukraynada həyata keçirilir. Belə ki, Ağ Evin yüksəkvəzifəli şəxslərinin, o cümlədən ekspertlərinin açıqlamaları da deməyə əsas verir ki, artıq onlar müharibə bataqlığına sürüklədikləri müttəfiqləri Ukraynanı da meydanda tək qoyublar. Məlumdur ki, vaxtilə Ukraynaya vədlər verib onu Rusiya ilə qarşıdurmaya sövq edən məhz rəsmi Vaşinqton və onun Avropadakı müttəfiqləri olublar. Bu yaxınlarda Fransa prezidenti Emmanuel Makronun müsahibəsində "Fransa yaxın vaxtlarda Ukraynaya hərbi personal göndərməyi düşünmür" açıqlamasının özü də vəziyyətin nə yerdə olduğunu açıq ortaya qoyur. Bir sözlə, hazırda ABŞ və Qərb faktiki olaraq Ukraynanın parçalanması ssenarisini həyata keçirirlər. Bu sonluq üçün isə riyakar müttəfiqlər əvvəlcədən "günah keçisi" də hazırlayıblar, axırda Ukrayna hakimiyyəti günahkar çıxarılacaq.

Eyni çirkin ssenari

ABŞ-nin başçılığı altında bəzi Qərb ölkə və təsisatları Azərbaycanda da illərdir eyni çirkin ssenarini həyata keçirməyə cəhd edirlər. Onlar Soros, USAID kimi fondlar vasitəsilə Azərbaycanda da "Abzas Media", "Toplum TV", müəyyən QHT-lər və digərlərini maliyyələşdirərək ölkəmizdə mənfur planlarının reallaşmasına çalışırlar. İstəyirlər ki, burada da siyasi sabitliyi pozsunlar, xalqla dövləti qarşı-qarşıya qoysunlar, ölkəmizi parçalasınlar. Bir müddət əvvəl "Abzas Media"da, bu yaxınlarda isə "Toplum TV"də aparılan araşdırmalar zamanı sözügedən Qərb təsisatlarının Azərbaycanla bağlı məkrli planları faktlarla üzə çıxarıldı. Məsələn, "Toplum TV"-nin ofisində axtarış-əməliyyat tədbirlərinin həyata keçirilməsi zamanı Qərb institutları tərəfindən Azərbaycan qanunlarına zidd şəkildə medianın, jurnalistlərin və ayrı-ayrı şəxslərin maliyyələşdirilməsinə dair ciddi dəllilər müəyyən edilib.

Faktlar göstərir ki, Qərb təsisatları tərəfindən geniş şəbəkə yaradılmaqla qanunsuz maliyyə maxinasiyaları həyata keçirilir və çirkli pullar yuyulur. Maliyyə Qərb institutları tərəfindən Gürcüstan vasitəsilə həmin şəbəkəyə ötürülüb. Bu zaman terror təşkilatlarının da istifadə etdiyi həvalə mexanizmindən və adsız kartlardan geniş istifadə olunub.

Azərbaycan öz uğurları ilə gözdağı verir

Təbii ki, Azərbaycan milli təhlükəsizlik orqanları dövlətə qarşı bu kimi cinayətkar məqsədlərin həyata keçirilməsinə qətiyyən imkan vermir və çirkin əməlləri törətmək istəyənləri zamanında zərərsizləşdirir.

Bütün bunlar da göstərir ki, xüsusilə Zəfərimizdən və suverenliyimizin təminindən sonra ABŞ və Qərbin müəyyən dairələri Azərbaycanda siyasi sabitliyi pozmaq, qarışıqlıq yaratmaq üçün bütün mümkün imkanlardan yararlanırlar.

Elə "Abzas Media" və "Toplum TV" ilə bağlı Azərbaycan qanunları çərçivəsində həyata keçirilən işlərlə bağlı xarici media orqanlarında qarayaxma kampaniyalarına start verilməsi, iftira və əsassız ittihamlardan ibarət materialların tirajlanması, eyni zamanda "hüquq-müdafiə təşkilatlarının", Qərb rəsmilərinin hay-küy salmaları da göstərir ki, bütün bunlar sistemli şəkildə həyata keçirilir və bir yerdən, yəni ABŞ başda olmaqla Qərbdən idarə olunur.

Təbii ki, baş verənlər Azərbaycan - ABŞ ikitərəfli əlaqələrinə zərbə vurur. Həm də bu məsələdə uduzan tərəfin məhz ABŞ olduğu danılmaz həqiqətdir. Bu baxımdan Ağ Evin Azərbaycanla münasibətlərində riyakarlıqdan əl çəkməməsi, əlaqələrində səmimiyyətdən uzaq olması, ölkəmizin daxili işlərinə qarışması həm də bölgədəki bütün siyasətinin iflası anlamına gəlir.

Azərbaycan öz gücünə torpaqlarını işğaldan azad edib, parlaq Zəfər qazanıb, suverenliyini təmin edib. 2024-cü il fevralın 7-də keçirilən prezident seçkiləri ilə sarsılmaz milli birliyini dünyaya nümayiş etdirib. Bütün bunlar ölkəmizdə qarşıdurma yaradan ABŞ-yə, Fransaya, ümumiyyətlə siyasətləri "müstəqil ölkələri parçala, hökm sür" olan qərəzli Qərb ölkə və təsisatlarına gözdağıdır.

Yasəmən MUSAYEVA,

Azərbaycan.-2024.- 14 mart, № 57.- S.8.