ABŞ yeni müharibə ocağı yaratmaq niyyətindədir

Ağ Ev öz maraqları naminə istənilən dövləti qurban verməyə hazırdır

"ABŞ hər zaman imperialist siyasət həyata keçirib, iqtisadi və hərbi gücündən istifadə edərək dövlətləri öz təsir dairəsində saxlamaq niyyətində olub. Azərbaycan da uzun illərdir Amerika və Qərbdəki bəzi dövlətlərin geosiyasi oyunlarından və qərəzli, ikili siyasətlərindən əziyyət çəkir".

Bu sözləri "Azərbaycan" qəzetinə açıqlamasında Milli Məclisin deputatı Kamilə Əliyeva deyib. Deputat xatırladıb ki, ABŞ Konqresi ilk dəfə 1992-ci ildə Azərbaycana təhlükəsizlik yardımının qarşısını alıb. Buna səbəb kimi Azərbaycanın guya Ermənistanı blokadaya alması göstərilirdi. Halbuki həmin dövrdə Ermənistan Azərbaycan torpaqlarını işğal etmək üçün hərbi təcavüzə əl atmışdı və müharibə ölkəmizin ərazisində gedirdi. ABŞ işğalçı dövlət olan Ermənistana təsir göstərmək əvəzinə, Azərbaycan torpaqlarının işğal olunmasına, azərbaycanlıların soyqırımına məruz qalmasına bir növ dəstək vermişdi.

K.Əliyeva qeyd edib ki, Azərbaycan bütün dövlətlərlə, o cümlədən ABŞ ilə bərabərhüquqlu münasibətlər qurmaq siyasəti həyata keçirir. 2002-ci ildə Azərbaycan və ABŞ arasında hərbi əməkdaşlıq haqqında saziş imzalanıb. Amerika İranla ehtimal olunan müharibə üçün Azərbaycandan istifadə etmək niyyəti güdürdü. Azərbaycan isə hər zaman qonşu dövlətlərlə mehriban münasibətlər qurmaq siyasəti həyata keçirdiyindən buna icazə vermədi: "ABŞ-nin məqsədi region dövlətləri arasında yeni münaqişə ocağı yaratmaq idi. ABŞ-nin və Qərbin Azərbaycana qarşı ikili standartları, riyakarlığı açıq şəkildə özünü büruzə verir. ABŞ Ukrayna, Moldova, Gürcüstanın ərazi bütövlüyünü dəstəklədiyi halda, Azərbaycana qarşı fərqli mövqe nümayiş etdirir. Azərbaycan torpaqlarını işğaldan azad edib öz ərazi bütövlüyünü və suverenliyini tam bərpa etdikdən sonra ABŞ-nin Dövlət Departamenti, Konqresi Azərbaycana qarşı qərəzli, əsassız ittihamlar irəli sürməyə başladı", - deyə o, əlavə edib.

Deputat vurğulayıb ki, Azərbaycanda iqtidarla xalqın sarsılmaz birliyinin gücləndiyini dərk edən ABŞ bir sıra QHT-lər vasitəsilə ölkəmizdə milli dəyərlərə təhlükə yaradan ideyaları təbliğ etmək qərarına gəlib. Müdrik Azərbaycan xalqı bütün bunları yaxşı dərk edir və xalqımız hər zaman öz lideri - Prezident İlham Əliyevin ətrafında sıx birləşib. Vaşinqtonun ikili siyasətindən Ermənistan faydalanacağını düşünürsə, tamamilə yanılır. ABŞ öz məqsədləri naminə istənilən dövləti qurban verməyə hazırdır. Amerika Ermənistanı "ikinci Ukrayna"ya çevirməyə çalışır. Ukraynanı Rusiya ilə müharibəyə təhrik edən, bu ölkəni özündən asılı vəziyyətə salmaq üçün manipulyasiya edən ABŞ faktiki olaraq Ukraynanı qurban verdi. Bu gün isə Ukraynanı məğlubiyyətlə barışmağa sövq etməyə çalışır.

ABŞ-nin Yaxın Şərqdə və digər regionlarda yeni müharibə ocaqları yaratmağa, ölkələrin daxilində hərbi çevrilişlər törətməyə cəhd etdiyini deyən K.Əliyeva bildirib ki, bu dövlət Türkiyəni də "ikinci Suriya"ya çevirməyə çalışırdı: "2016-cı ildə terror təşkilatlarının vasitəsilə Türkiyədə dövlət çevrilişi törətməyə cəhd göstərdi. Yalnız Türkiyə rəhbərliyinin qətiyyəti və xalqın hakimiyyətə dəstəyi ABŞ-nin planlarını puça endirdi. Amerika bu gün də dünyada öz nüfuzunu artıran güclü, qüdrətli dövlətə çevrilən Azərbaycana qarşı müxtəlif vasitələrlə qərəzli siyasətini davam etdirir. ABŞ-nin və Qərbdəki bəzi dövlətlərin Azərbaycana qarşı yürütdüyü bu məkrli siyasət fiaskoya uğrayacaq və sonda özləri peşman olacaq".

K.Əliyeva yekunda bildirib ki, bu gün Azərbaycan qüdrətli dövlət olmaqla yanaşı, dünyada söz və güc mərkəzinə çevrilən qardaş Türkiyə başda olmaqla bir çox güclü dövlətlər tərəfindən dəstəklənir.

Əsmər QARDAŞXANOVA,

Azərbaycan.-2024.- 14 mart, №57.- S.8.