Ermənistan müxtəlif güclərin toqquşduğu poliqona çevriləcək

"Regionumuzda mövcud olan gərginliyin əsas səbəbkarı Fransadır. Paris şirin və saxta vədlərilə Ermənistanı şirnikləndirir və fəlakətə sürükləyir. Cənubi Qafqazda möhkəmlənməyə çalışan Makron hökuməti sülhü əngəlləyən bu qərəzli addımları ilə öz imicini zədələməklə yanaşı, ölkəsini də bütün dünyada rüsvay edib".

Bu fikirləri "Azərbaycan" qəzetinə açıqlamasında Milli Məclisin deputatı Azər Badamov deyib. Deputat bildirib ki, Fransa uzun illərdir ki, Azərbaycana qarşı qərəzli siyasət yürdür: "Fransa illər boyu ATƏT-in Minsk qrupunun həmsədr ölkəsi kimi BMT TŞ-nın 4 qətnaməsinin icra olunmamasına çalışdı. Həmsədr olan Fransa və digər ölkələr Azərbaycanı işğalla barışdırmaq və torpaqlarımızda erməni işğalını əbədiləşdirmək üçün əllərindən gələni əsirgəmədilər. Lakin Prezident İlham Əliyev bütün beynəlxalq görüş və tədbirlərdə Azərbaycanın torpaqlarımızın işğalı ilə heç vaxt barışmayacağını və bu məsələ danışıqlar yolu ilə həll olunmazsa, öz gücümüzlə edəcəyimizi açıq şəkildə bildirirdi. Təbii ki, bizim gizlədəcəyimiz bir şey yox idi və məhz bu məqsədlə ordumuzu gücləndirirdik. 2020-ci ilin sentyabrında başlanan Vətən müharibəsində şanlı ordumuz Ermənistanın dizini yerə vuraraq kapitulyasiya sənədinə imza atmağına məcbur etdi".

Deputat xatırladıb ki, bundan sonra Qərb, xüsusilə də Fransa zəfərimizi həzm edə bilmədiyinə görə Azərbaycana olan qərəzli münasibətini açıq müstəviyə çıxardı: "Rəsmi Paris vasitəçilik etmək adı altında Azərbaycana təzyiq göstərməyə çalışdı. Təbii ki, Prezidentimizin qətiyyətini və dəyişilməz mövqeyini Fransa prezidenti Emmanuel Makron yenə həzm edə bilmədi və beynəlxalq təşkilatlarda Azərbaycana qarşı qərarlar qəbul etdirmək üçün cəhdlər göstərdi. Makronun ölkəmizə qarşı təzyiq vasitəsi kimi istifadə etməyə hesabladığı qərəzli sənədlər BMT-yə çıxarıldı. Amma dostlarımızın sərgilədiyi ədalətli mövqe sayəsində Fransa müzakirəyə çıxardığı sənədləri biabırcasına geri götürməyə məcbur oldu.

BMT-də Azərbaycana qarşı uğur qazana bilməyən və heç bir yerə əli çatmayan Makron Ermənistanı yenidən müharibəyə hazırlaşmağa sövq edərək, sülh müqaviləsinin imzalanması ilə bağlı danışıqlar prosesində əldə edilmiş nəticələrə zərbə vurdu. Azərbaycan- Ermənistan münasibətlərinin normallaşdırılması prosesində əldə olunmuş nəticələrə qarşı süni uçurum yaradan Ermənistanın baş naziri Nikol Paşinyan Fransanın dəstəyindən ruhlanaraq Azərbaycana qarşı yenidən ərazi iddiaları ilə çıxış etməyə başladı. Belə ki, 2020-ci il sentyabrın əvvəlində torpaqlarımızda saxta qurumun yaradılması münasibətilə separatçılara təbrik göndərdi. Bu, Azərbaycanın hisləri ilə oynamaq və təhqir etmək demək idi".

Azər Badamovun dediklərinə görə, bu dözülməz vəziyyətə nöqtə qoyulması üçün ötən il sentyabrın 19-20-də lokal xarakterli antiterror tədbirləri keçir-məyə məcbur olduq: "Cəmi 23 saata Qarabağda separatçıların yuvası dağıdıldı və Xankəndidə Azərbaycanın dövlət bayrağı qaldırılaraq bütün ərazilərimizdə suverenlik təmin edildi. Antiterror tədbirlərindən sonra Ermənistanla şərti sərhəddə 5 aylıq nisbi sakitlik yaransa da, Fransanın ssenarisi ilə ermənilər bu il fevralda Zəngilan rayonu ərazisində sərhədçimizə güllə ataraq yenidən təxribat törətdilər. Ordumuz qisas əməliyyatı keçirərək əsgərimizə güllə atılan düşmən postunu darmadağın etdi".

Fransanın bu gün Ermənistanı silahlandırdığını və fransız hərbçiləri tərəfindən erməni əsgərlərə hərbi təlimlər keçirildiyini bildirən deputat qeyd edib: "Paris unutmamalıdır ki, Ermənistan nə qədər silahlansa da, Azərbaycanla müharibə edə biləcək səviyyəyə heç vaxt gəlməyəcək. Fransanın Ermənistanı silahlandırmaqda və şirin vədlər verməkdə digər məqsədi Rusiyanı regiondan çıxartmaqdır. Paşinyanın ritorikası son vaxtlar həm də Rusiyaya qarşı yönəlib. Belə ki, Zvartnos hava limanındakı sərhədçilərin çıxarılması ilə bağlı Rusiyaya vaxt qoymuş Fransanın sonrakı mərhələdə Rusiya hərbi bazasının Ermənistandan çıxarılması ilə bağlı yeni tələb ortaya qoyacağı şübhə doğurmur. Paşinyanın bu gün əsas məqsədi Rusiyanı ölkəsindən çıxardaraq, onu Fransa ilə əvəzləməkdir. Amma Paşinyan hakimiyyəti başa düşmür ki, Qərbin daxil olduğu bütün ölkələr poliqona çevrilir və xalqın bədbəxtliyi dərinləşir. Hesab edirəm ki, Ermənistan bu gedişlə yaxın gələcəkdə müxtəlif güclərin toqquşduğu məkana çevriləcək".

Azər Badamov vurğulayıb ki, qonşu ölkə olaraq biz ətrafımızda sabitliyin olmasında maraqlıyıq: "Amma görünür, Ermənistanda toqquşmalar və hərc-mərclik qaçılmazdır. Bu ölkədə toqquşmalar baş qaldıracağı təqdirdə onlara nə Fransa, nə də başqa biri kömək göstərəcək. Xain ölkə fəlakətə məhkumdur".

Nəzrin QAFARZADƏ,

Azərbaycan.-2024.- 14 mart, № 57.- S.8.