"Sənətkar ömrü səhnədə başlayıb səhnədə bitir"

Onunla ilk dəfə elə indi çalışdığı Azərbaycan Dövlət Akademik Musiqili Teatrının səhnəsində "Heydər Əliyev İli" çərçivəsində təşkil olunmuş "Sən elə bir zirvəsən ki..." adlı konsertdə rastlaşmışdıq.

Rəşid Behbudovun repertuarından səsləndirdiyi "Azərbaycan" mahnısı ilə tamaşaçıları gerçəkdən səsinin sehrinə salmışdı. Məlahətli səsi, gözəl avazı, bənzərsiz ifası ilə tamaşaçıları təəccübləndirən bu gəncin İbrahim Zakir oğlu Əlizadə olduğunu öyrənirik. İbrahim Əlizadə 1993-cü ildə Bakıda musiqiçi ailəsində dünyaya gəlib. Anası Qəmərxanım Əliyeva Asəf Zeynallı adına Orta İxtisas Musiqi Məktəbinin pianino şöbəsini bitirib. Hazırda Amerikada yaşayan dayısı İmamyar Həsənov məşhur kaman ifaçısıdır.

İbrahim deyir ki, musiqi mənim ruhum, canımdır. Həyatımın mənasını musiqidə görürəm, hər dəfə səhnəyə çıxanda özümü dünyanın ən xoşbəxti sanıram. Musiqisiz, səhnəsiz həyatımı təsəvvür edə bilmirəm.

Səhnəyə gəlişini xatırlayan İbrahim Əlizadə deyir: "Məşhur türk müğənnisi İbrahim Tatlısəs atamın kumiri idi. 1998-ci ildə İbrahim Tatlısəs Bakıda konsert verirdi. Atam məni gül vermək üçün səhnəyə çıxartdı. Nə sehrdir bilmirəm, səhnə məni tutdu. Bir anlığa mənə elə gəldi ki, ömür yolum bu səhnədən keçəcək. Musiqiyə olan maraq məni Bülbül adına Orta İxtisas Musiqi Məktəbinə apardı. Musiqi məktəbində oxuyarkən solfecio üzrə birinci yeri tutdum. Müğənni kimi ilk debütüm Rəşid Behbudovun repertuarından olan "Azərbaycan" mahnısı olub. 2008-2010-cu illərdə Azərbaycan Həmkarlar İttifaqları Konfederasiyası və Azərbaycan Bəstəkarlar İttifaqının birgə təşkil etdiyi "Ötən illərin mahnıları" Azərbaycan peşəkar bəstəkarlarının mahnılarından ibarət retro musiqi festivalında Dənizçilər Mədəniyyət Evində "Yelkən" vokal studiyasının üzvü kimi uğurlu çıxışıma gorə diplomla təltif olundum".

Ukraynanın Xarkov Dövlət Mədəniyyət Akademiyasında ali təhsil alan İbrahim Əlizadə tələbəlik illərində azərbaycanlı gənclər təşkilatının (SAMU) üzvü kimi Xarkov şəhərində Xocalı soyqırımına həsr olunmuş tədbirin təşkilatçılarından olub. 2010-cu il ''Xalq ulduzu" yarışmasının iştirakçısı olaraq 7 həftə efirdə birincilik uğrunda mübarizə aparıb. 2012-ci ildə Beynəlxalq "DANS SONG FEST" yarışmasında 15 ölkə arasından 1-ci yerə sahib olub.

İbrahim 2016-ci ildə Bakıda türk mahnılarından ibarət ''IBO SHOW'' adlı solo konsert verib. 2022-ci ildə "Budu jite v Ukraine" yarışmasında münsiflər heyətinin üzvü olub. Eyni zamanda həmin yarışmada "Ən gözəl mahnı ifaçısı" mükafatına da layiq görülüb.

İbrahim Əlizadə deyir ki, dövlətimizin başçısı 2019-cu il Musiqili Teatra "Akademik" statusu verərək kollektivimizi mükafatlandırdı. Rejissor Samir Qulamovun müəllifi və quruluşçu rejissoru olduğu Paris Notrdama ithaf olunan tamaşanı sənət bioqrafiyamda əsl hadisə hesab edirəm. Adıgedən tamaşada Don Klod Frollo obrazının yaradıçısıyam. Xatırladaq ki, İbrahim Əlizadə bu rolu 26 yaşında oynayan yeganə aktyordur.

Aktyor üçün səhnə nəfəsdir, həyatdır, bir yaşam tərzidir...

2017-ci ildən Azərbaycan Dövlət Akademik Musiqili Teatrında artist-vokalist kimi çalışan İbrahim Əlizadə qısa zaman ərzində müxtəlif tamaşalarda oynadığı maraqlı obrazlarla yaddaşlara öz adını yaza bilən sənətkarlardandır. Bu illər ərzində o, Akademik Musiqili Teatrın səhnəsində Süleyman ("Arşın mal alan" Ü.Hacıbəyli), Ordan-bura ("Balaca Şahzadə" A.Ekzüperi, R.Ağababayev), Keşiş Don Klod ("Paris Notr-dama ithaf" V.Hüqo, libretto müəllifi və quruluşçu rejissor S.Qulamov), Nadir ("Beş manatlıq gəlin" S.Rüstəmov, M.S.Ordubadi), Cəlil ("Amerikalı kürəkən" R.Mirişli, M.Haqverdiyev), Murad ("Baladadaşın toy hamamı" Elçin), Hərbi komissar ("Bir nəfəs qədər" S.Qulamov) rollarını ifa etmişdir. "Bəxtiyar" tamaşasında Bəxtiyar və "Leyli və Məcnun" tamaşasında İbn Salam obrazlarını ustalıqla ifa edib. 2021-ci ilin mart ayında 31 Mart Soyqırımı Gününə həsr olunmuş "Sündü" filminə çəkilib.

İbrahim deyir ki, əsl sənətkarların ömrü səhnə ilə başlayıb, səhnədə də bitir. İnsan gərək sevib-seçdiyi sənətinin vurğunu ola. Çalışıram ki, Tanrının mənə verdiyi ömrü ləyaqətlə yaşayım. Məni tanıyanların, sənətimi sevənlərin yaddaşında əbədi olaraq sənətini sevən əsl sənətkar kimi yaşayım.

E.QƏNİYEV,

Azərbaycan.-2024.- 14 mart, № 57.- S.10.