Qərbdə islamofobiya tüğyan edir

"Acınacaqlı haldır ki, hazırda islamofobiya özünü demokratik hesab edən bir sıra Qərb ölkələrinin dövlət siyasətinin tərkib hissəsini təşkil edir. Son bir ildə dünyada baş vermiş bütün antiislam təzahürlərinin 80 faizi bu ölkələrin payına düşür".

Martın 8-də Bakıda keçirilən "Müxtəlifliyin qorunması: 2024-cü ildə islamofobiya ilə mübarizə" mövzusunda beynəlxalq konfransın iştirakçılarına ünvanladığı məktubunda Prezident İlham Əliyevin vurğuladığı kimi, bu gün dünyanın bir çox ölkəsində antiislam siyasəti tüğyan edir. Xüsusilə də özünü "humanizm beşiyi" hesab edən Avropada islamofobiya meyilləri kəskin artıb və müsəlman aləminə qarşı aparılan bu çirkin kampaniya getdikcə daha nümayişkaranə formada həyata keçirilir. Gah müsəlmanların dini kitabı "Qurani-Kərim" yandırılır, gah Məhəmməd Peyğəmbərin karikaturası çəkilərək təhqir olunmağa çalışılır və digər bu kimi hallarla insanların dini hissləri ilə oynanılan təxribatlara əl atılır. Dini nifrət zəminində törədilən bu əməllər əsasən Fransa, İsveç, Danimarkada tez-tez baş verir və ən dəhşətlisi də budur ki, həmin ölkələr tərəfindən bu vandal hərəkətlər insan hüquq və azadlıqları ilə əlaqələndirilir, qanuni olduğu bildirilir. Bu ölkələrin rəsmiləri tərəfindən baş verən rüsvayçılıqlara, milyonlarla insanın dini hisslərinin tapdalanmasına riyakarcasına fərqli don geydirilir, açıq-aşkar dini qızışdırıcılığa hesablanmış islamofob əməllərə sözün əsl mənasında göz yumulur, "münbit" şərait yaradılır.

Sözügedən konfransın iştirakçılarına ünvanladığı məktubunda bununla bağlı dövlət başçısı bildirib ki, Fransa özünün ənənəvi neokolonializm siyasəti ilə bərabər, müsəlmanlara qarşı açıq-aşkar təzyiq və diskriminasiya siyasəti yürüdür, müxtəlif islamofob kampaniyalar təşkil edir. "Dünyəvilik" adı altında sırf müsəlmanların hüquq və azadlıqlarının məhdudlaşdırılmasına yönəlmiş qanunvericilik aktları və siyasi qərarlar qəbul edir. Bu ölkədə məscidlər, müsəlman mədəniyyət mərkəzləri və qəbiristanlıqlar müxtəlif formalarda təhqirlərə məruz qalır, müsəlman vətəndaşlar sıxışdırılır.

Ermənistanın vandallıqlarına susqunluq nümayiş etdirilir

Azərbaycan dünyada ən çox islamofobiyadan əziyyət çəkən ölkələrdəndir. İstər torpaqlarının 30 illik işğalı dövründə, istərsə də hazırda ölkəmiz antiislam siyasəti ilə üz-üzə qalıb. İşğal illərində Ermənistan tərəfindən Azərbaycana məxsus dini irs vəhşicəsinə dağıdılıb. İşğaldan azad olunmuş ərazilərimizdəki 67 məsciddən (Şuşada 13, Ağdamda 5, Füzulidə 16, Zəngilanda 12, Cəbrayılda 5, Qubadlıda 8, Laçında 8) 65-i tamamilə, 2-si isə qismən dağıdılaraq yararsız hala salınıb. Həmçinin vandal düşmən tərəfindən bu ərazilərdə yüzlərlə müsəlman qəbiristanlığı yerlə yeksan edilib, dini ibadət yerlərimizdə donuz saxlanılaraq, təkcə azərbaycanlıların deyil, bütün islam aləminin dini hissləri təhqir olunub.

Eyni zamanda indiki Ermənistan ərazisində xalqımızın dini-mədəni irsi erməni vandalları tərəfindən tamamilə məhv edilib. XX əsrin əvvəllərində İrəvan quberniyası ərazisində 300 məscidimiz qeydə alındığı halda, hazırda Ermənistan ərazisində, İrəvan şəhərində yalnız bir məscid - Göy məscid qismən salamat qalıb. Bu məscidin qismən salamat saxlanması isə erməni fitnəsinə görə, dünyanın gözündə pərdə asmaq üçündür.

Bir başqa təəssüfləndirici məqam isə "demokratik Qərb"in Ermənistanın bütün bu vandallıqlarına qarşı susqunluq nümayiş etdirməsidir. İndi Azərbaycana qarşı bir qara qəpiklik dəyəri olmayan qətnamələr qəbul edən, ölkəmizlə bağlı yalan və böhtanlar səsləndirən Avropa Şurası Parlament Assambleyası, Avropa Parlamenti kimi riyakar qurumlar ayrı-seçkilik, xristian təəssübkeşliyi, islamofobiyadan qaynaqlanan çirkin niyyətlə Ermənistana qarşı murdar əməllərinə görə heç bir qətnamə qəbul etməyib, təzyiqdən bəhs etməyib.

Azərbaycana qarşı "səlib yürüşü"nə çıxanlar məğlubiyyətə məhkumdurlar

Əksinə, qərəzli Qərb siyasi dairələri neokolonializm siyasəti həyata keçirən Fransanın başçılığı ilə Azərbaycanın torpaqlarını işğaldan qurtarmasına, suverenliyini təmin etməsinə görə ölkəmizə qarşı sözün əsl mənasında "səlib yürüşü"nə çıxıblar. Korrupsioner siyasətçilərin yuvası halına gəlmiş Avropa Parlamenti və Avropa Şurasının Parlament Assambleyası kimi islamofobiya siyasəti yürüdən qurumların əli ilə qərəzli qətnamələr qəbul etməkdən tutmuş kampaniya şəklində erməni yalanlarını tirajlamağa qədər hər cür çirkinliklər edirlər. Təbii ki, bu antiislam, anti-Azərbaycan siyasətinə Makron hökuməti yön verir. Həmçinin Paris açıq şəkildə separatizmə, hələ də ölkəmizə qarşı ərazi iddiası güdən təcavüzkar Ermənistana dəstək verməklə, onu silahlandırmaqla beynəlxalq hüququ tapdaladığını da ortaya qoyur.

Ancaq Azərbaycan milli, dini maraqlarına təhdid olan bütün qüvvələrlə istənilən platformada layiqli mübarizə aparmağa qadirdir. Bunu bütün dünya Bakının Fransanı küncə sıxışdıraraq, onun neokolonialist, irqçi, antisemitizm, islamofob, türkofob, azərbaycanofob siyasətini dünyada ifşa etməsinin fonunda əyani görüb, şahidi olub.

Yasəmən MUSAYEVA,

Azərbaycan.-2024.- 15 mart, № 58.- S.6.