Hayastanda separatizm yenə baş qaldırır

Fransa bu ölkəni acınacaqlı vəziyyətə sürükləyir

Ötən il cəmi 23 saata həyata keçirilən antiterror tədbirləri ilə məhv edilən, sentyabrın 28-də özünü buraxdığını elan edərək 2024-cü il yanvarın 1-dən fəaliyyətini tam dayandırdığını bildirən Qarabağdakı qondarma rejim son günlər Hayastanda yenidən baş qaldırmağa cəhd edir.

Özü-özünü ləğv edən qondarma rejimin nümayəndələri indi də beynəlxalq aləmə çıxmağa çalışırlar. Onlar Ermənistanda fəaliyyət göstərən xarici ölkə səfirliklərinin nümayəndələri ilə görüşməyə təşəbbüs göstərirlər. Bununla da, əslində, özlərinin mövcud olduğunu göstərməyə çalışırlar. Özlərinə bu şəkildə ayrı-ayrı dövlətlərin, hansısa beynəlxalq qurumların nəzərində status qazanmağa can atırlar ki, guya onlar məcburiyyətdən belə bir addım atıblar.

Yəni erməni xisləti yenidən özünü göstərməyə başlayıb. Tarixin bütün dövrlərində analoji addımlar atan ermənilərin bu addımı təsdiqləyir ki, bir il öncə verilən "bəyanatlar" gözə kül üfürməyə xidmət etməkdən başqa bir şey olmayıb. Artıq İrəvanın Fransa meydanında separatçıların əski parçası yenidən görsənməyə başlayıb. Halbuki iki il əvvəl bu əski parçası tamamilə yığışdırılaraq tarixin arxivinə göndərilmişdi.

İndi yenidən separatçıların "baş qaldırması" onu deməyə əsas verir ki, Nikol Paşinyan hakimiyyəti onların fəaliyyəti üçün şərait yaradır. Əldə edilən məlumatlara əsasən, separatçılar fəaliyyət əhatəsini genişləndirərək Qərb təmsilçiləri ilə də görüşlərə can atırlar. Bütün bunların səbəbkarı isə Fransadır. Erməni lobbisinin təsir gücünə məruz qalan Fransa regionda "hegemonluq" etmək istədiyini açıq-aşkar göstərir. Fransa bu addımları ilə Rusiyanın zəifləməsindən istifadə edərək regiona daxil olmaq və Ermənistan vasitəsilə Cənubi Qafqazda möhkəmlənmək xülyasındadır.

Əslində, E.Makron yaxşı anlayır ki, Azərbaycan qarşısına məqsəd qoyub: sülh müqaviləsi imzalamaqla bölgədə təhlükəsizliyi təmin etmək və yeni reallıqlara uyğun iqtisadi əlaqələrin qurulması istiqamətində real işlər görmək.

Bununla yanaşı, Azərbaycan artıq bəyan edib ki, "Qarabağ problemi" adlı məsələ yoxdur, bu, 2020-ci ildə həllini tapıb və indi regionda yalnız yeni reallıqlar yaranıb. Fransa isə tam əksinə hərəkət edərək separatizmə verdiyi dəstəklə bölgəni yenidən savaş mərkəzinə çevirmək üçün əlindən gələni edir. Əgər rəsmi İrəvan orada baş qaldırmış erməni separatizmini dayandırmasa, Azərbaycanın da görəcəyi tədbirlər var.

Bir sözlə, Ermənistan hökuməti özünü üzdə sülh tərəfdarı kimi göstərir, pərdə arxasında isə separatçılara şərait yaradır. Fransa da bu prosesə dəstək verir. Əlbəttə ki, bu, ermənilərin özləri üçün ağır nəticələrə səbəb olacaq. Ermənistan bununla özünü çox ağır vəziyyətə salır. Əgər Ermənistan qondarma rejimi bu şəkildə diriltmək istəyirsə, onda Azərbaycanın cavabı ağır olacaq. Bu, təkcə Ermənistana deyil, Hayastanı acınacaqlı vəziyyətə sürükləyən Fransaya da dərs olacaq.

Rəşad BAXŞƏLİYEV,

Azərbaycan.-2024.- 15 mart, № 58.- S.9.