Fransa münaqişə ocaqlarının çoxalmasında maraqlıdır

"Fransa Prezidenti Emmanuel Makronun yürütdüyü siyasət ölkəsini dünyada rüsvay edir. Makron planetin istənilən nöqtəsində baş verən hadisəyə münasibət bildirməyi özünə borc bilir, amma onun fəaliyyəti danışmaqdan uzağa getmir. Bununla belə Makron qanlı toqquşmaları qızışdırır və insan ölümlərindən sanki qürur duyur. Bu, Parisin indiki hakimiyyətinin xislətini, insan ölümlərinə və müharibəyə meyilli simasını nümayiş etdirir".

Bu fikirləri qəzetimizə açıqlamasında Milli Məclisin deputatı Aydın Hüseynov bildirib. Fransanın dünyada etimadını itirdiyini deyən deputat Parisin Azərbaycan üçün ikitərəfli münasibətlərdə məqbul hesab ediləcək ölkə kimi hörmət və etibarını da itirdiyini xatırladıb. Bildirib ki, Makron üçün hansısa ölkənin mənafeyi və sabitliyi yox, şəxsi biznes və gəlirlərini artırması, münaqişə ocaqları yaratmaqda, silah sataraq burada biznesini inkişaf etdirmək maraqlıdır. Bundan başqa, az qala hər gün Rusiya-Ukrayna müharibəsinə münasibət bildirən, dünyanı Ukraynaya dəstək göstərməyə çağıran Makronun öz ölkəsinin Ukraynaya yardımı gülünc rəqəmlərdə ifadə olunur. Belə görünür ki, 2 ildir davam edən müharibədə Fransa Ukraynaya normal yardım belə etməyib. Makron ancaq Ukraynanı boşboğazlıq edərək silahlandırmaqla məşğuldur.

Deputatın sözlərinə görə, Fransa ötən il dünyada silah ixrac edən ikinci dövlət olub: "Bunun da səbəbi Makrona yaxın olan silah sənayesi şirkətlərinin müxtəlif bölgələrdə qanlı qarşıdurmalara rəvac verərək sürətli silahlandırmanı təmin etmələridir. Fransa Prezidenti indi də Moldovada missiya yaradır. Makron Ermənistanda da missiyanın yaradılmasına nail olub, bu ölkəyə silah satır, Fransa şirkətlərinin lisenziyası əsasında Hindistan tərəfindən istehsal olunan silahlar Ermənistana satılır. Amma bu dövr ərzində Ermənistanın durumu daha da pisləşib".

Aydın Hüseynov Fransanın imperializm və müstəmləkəçilik siyasətinə toxunaraq qeyd edib ki, bu ölkə iki əsrə yaxındır Yeni Kaledoniya xalqını əsarətdə saxlayır, bu xalq ağır müstəmləkəçilik siyasətindən əziyyət çəkir. Burada yaşayan kanak və digər etnik xalqlar müstəqillik mücadiləsi aparırlar. Təəssüf ki, Fransa hökuməti onların səsini eşitmək istəmir və Yeni Kaledoniyanın - kanakların institusional gələcəyinə dair irticaçı siyasət yürüdür. Kanak xalqının dekolonizasiya və öz müqəddəratını təyinetmə prosesinə imkan vermir.

"Makron və onun hökuməti üçün "milli maraq" Yeni Kaledoniyanın qəti olaraq fransız olmasıdır. Onların nəzərində bu, Hind-Sakit Okean kimi tanınmış və getdikcə həlledici zonaya çevrilən regionda iqtisadi və strateji aktivliyi təmin edir. Hökumət bununla da neokolonial təkəbbürü və kanak xalqına hörmətsizliyi davam etdirməyə haqq qazandırır", - deyə müsahibimiz qeyd edib.

Azərbaycan xalqının böyük mütəfəkkiri Xurşidbanu Natəvanın heykəlinə qarşı fransızların vandal davranışlarına da toxunan Aydın Hüseynov qeyd edib ki, Natəvanın heykəlinə qarşı baş vermiş bu mənəvi soyqırımı Fransa hakimiyyətinin mənfur və əsl vəhşi obrazının ifadəsidir. Bu ölkə dünyada humanizmə və maddi dəyərlərə qarşı iyrənc və murdar əməlləri ilə bəşəriyyətin maddi-mənəvi abidələrinin qatili olmasını nümayiş etdirir.

Nəzrin QAFARZADƏ,

Azərbaycan.-2024.- 15 mart, № 58.- S.14.