Ermənistan hələ də Qərbin direktivlərini icra edir

Sülh müqaviləsinin imzalanmaması üçün süni maneələr yaradılır

"Ermənistanda separatçılara yenidən meydan verilməsi yalnız Paşinyan iqtidarının iradəsi ilə mümkündür. Görünən odur ki, rəsmi İrəvan artıq "Qarabağ erməniləri"ndən və keçmiş xunta rejiminin "funksionerləri"ndən siyasi alət kimi həm daxildə revanşist kəsimin dəstəyinin qazanılması, həm də Azərbaycana qarşı təsir rıçağı kimi istifadə etmək istəyir".

Bu sözləri "Azərbaycan" qəzetinə açıqlamasında Milli Məclisin deputatı Bəhruz Məhərrəmov deyib. Deputat bildirib ki, Ermənistan hələ də nəzarətində saxladığı anklav və qeyri-anklavlardan ibarət 8 kəndin qaytarılması, habelə sülh müqaviləsinin imzalanması üçün heç bir əngəlin qalmaması fonunda süni maneələr formalaşdıraraq dayanıqlı sülhün yolverilməzliyi barədə Qərbin, xüsusən Parisin direktivlərini icra edir. Məlumdur ki, Paşinyan iqtidarı həm antiterror tədbirləri zamanı, həm də sonrakı dövrdə bir müddət öncəyə qədər Qarabağ iqtisadi rayonundan könüllü şəkildə köçən erməniəsilli sakinlərə, yaxud Ermənistan vətəndaşlarına münasibətdə təmkinli davranır və bu da ümumi sülh prosesində özünün müsbət təsirini göstərirdi. Hətta 2023-cü ilin 20 sentyabr tarixində Prezident İlham Əliyev antiterror əməliyyatlarında zəfərimizlə əlaqədar xalqa müraciətində də qeyd etmişdi: "Ermənistan bu dövr ərzində - dünən, bu gün deyə bilərəm ki, gözlənilmədən siyasi səriştə göstərib və biz bunu qiymətləndiririk. Bunu önəmli amil kimi görürük və hesab edirəm ki, dünən və bu gün baş vermiş hadisələr eyni zamanda Azərbaycanla Ermənistan arasında gedən sülh prosesinə də müsbət təsir göstərəcək". Deputat qeyd edib ki, Fransanın pozuculuq fəaliyyəti, Emmanuel Makronun "Daşnaksütyun" partiyasının, yaxud ASALA terror təşkilatının rəhbəri kimi davranaraq İrəvanı sülhdən yayındırması prosesi demək olar prosesləri yarımçıq qoyub. Ümumiyyətlə, 30 illik münaqişə tarixində proseslərin gedişatını təhlil etdikdə çoxsaylı təkzibedilməz faktlar onu deməyə əsas verir ki, vasitəçilik missiyası altında pərdələnən Qərb Azərbaycan və Ermənistan arasında münaqişəli vəziyyətə, habelə Azərbaycan ərazisində separatizmin mövcudluğuna regiona təsir rıçağı kimi baxır və mümkün qədər beynəlxalq hüququn normalarında əksini tapan prinsiplərə zidd olan həmin status-kvonu qorumağa çalışırdı. "İşğal dövründə başda Fransa və ABŞ olmaqla, çoxsaylı beynəlxalq hüquq subyektləri münaqişənin həllini yox, dondurulmasını arzu edir, işğal və təcavüzdə ehtiva edən situasiyada xalqlar arasında etimad quruculuğu, Azərbaycan ərazisində erməni qoşunlarının qaldığı, separatçı rejimin mövcud olduğu bir şəraitdə kommunikasiya xətlərinin açılmasına, ticari əlaqələrin bərpa edilməsinə çağırışlar edirdilər. Bu məsələdə Qərb əlaqələrin normallaşmasına nail olmaqla Ermənistanın qələbəsinin davamlılığını qorumaq, Azərbaycanı isə bu reallıqla barışdırmaq istəyirdi", - deyə deputat əlavə edib.

B.Məhərrəmov bildirib ki, Prezident İlham Əliyevin Vətən müharibəsi və antiterror tədbirlərindəki müstəsna zəfərlərinin ardınca Ermənistan və ən əsası İrəvanın Qərbdəki havadarları işğal və separatizm rıçaqlarından məhrum olublar və bununla da özünü beynəlxalq ictimaiyyət adlandıran, 30 ildir vasitəçilik nağılları danışan qlobal subyektlərin iç üzü açılıb. Ötən dövr ərzində məhz bu beynəlxalq subyektlər müxtəlif müstəvidə Azərbaycan əleyhinə kampaniyalara başladılar, hətta BMT Təhlükəsizlik Şurasında ölkəmizi təcavüzkar kimi qələmə verməyə çalışdılar. Eyni zamanda Azərbaycan daxilində Qərbin maliyyə dəstəyi ilə formalaşan QHT və media subyektləri milli maraqlarımız əleyhinə aktivləşdirildi. Lakin Azərbaycan bu istiqamətdə də təzyiqləri neytrallaşdırmağa və qarşısını almağa, o cümlədən Fransa xüsusi xidmət orqanlarının timsalında xarici və yerli casus şəbəkəsini ifşa edərək zərərsizləşdirməyə nail oldu. Belə olan halda bu gün Ermənistan və havadarları keçmiş xunta rejiminin funksionerlərinə regionda siyasi və əməliyyat şəraitinə nəzarət edən, şərti sərhədlər boyu bütün strateji yüksəkliklərdə möhkəmlənən, döyüş qabiliyyəti və peşakarlığını davamlı şəkildə artıran, arsenalını sürətlə ən müasir silah, sursat və texnologiya ilə yeniləməkdə olan Azərbaycana qarşısında istifadə edə biləcəyi yeganə element kimi baxırlar.

Deputat qeyd edib ki, Azərbaycanın hərbi-siyasi imkanları ilə yanaşı, həm də mövqeyi beynəlxalq hüquqa əsaslanır: "Ermənistanın 2022-ci ilin oktyabrı və 2023-cü ilin mayında rəqəmlərdə ifadə etdiyi Azərbaycanın ərazi bütövlüyü hələ də bu ölkənin qanunsuz nəzarətində olan kəndləri də əhatələyir. Habelə əgər İrəvan heç bir əsas olmadan ləyaqətli qayıdış hüququndan danışırsa, separatizmə məhz bu çərçivədə don geyindirmək istəyirsə, yanılır. Azərbaycan öz ərazisindən heç bir erməniəsilli sakinin çıxarılmasında maraqlı olmayıb, əksinə, Xankəndi və ətraf ərazilərdə yaşayan, Ermənistan pasportu daşıyan insanlar özləri etnik separatizmin, milli nifrət hissinin daşıyıcıları olaraq Azərbaycanın yurisdiksiyası altında yaşamağa razı olmamış, hakimiyyət orqanlarının müxtəlif formalarda çağırışlarına məhəl qoymayaraq könüllü formada Qarabağı ləyaqət və təhlükəsizlikləri təmin olunmaqla tərk ediblər. Amma bu gün hələ də öz doğma yurduna qayıda bilməyən qərbi azərbaycanlılar barədə eyni şərait yaradılıbmı? Qərbi Azərbaycanın demək olar ki, bütün mahallarında yaşayan soydaşlarımız soyqırımı əlamətləri təhdidi altında, məhz azərbaycanlı olduqlarına görə Ermənistanın dövlət siyasətinə çevrilmiş etnik təmizləmənin nəticəsində öz yurd-yuvalarından işgəncələr altında qovulmuş, bu gün də onların geri dönüşü üçün İrəvan faktiki olaraq perspektiv qoymamaqdadır. Belə olan halda əgər Qarabağdan könüllü şəkildə köçən sayı şişirdilmiş ermənilərin məsələsi gündəmə gəlirsə, ondan daha öncə 300 mindən artıq qərbi azərbaycanlının haqları müzakirə olunmalıdır".

B.Məhərrəmov vurğulayıb ki, Ermənistan və ya havadarları Qərbi Azərbaycan irsinin məhv edilməsi, soydaşlarımızın öz yurdlarına qayıtmasını mümkünsüz edən situasiyaya aydınlıq gətirmədən Azərbaycan və Ermənistan arasında bu yöndə heç bir məsələ müzakirə oluna bilməz. Ona görə də Paşinyan hakimiyyəti separatçı rejimin tör-töküntülərinə İrəvana meydan verilməsinin ağır nəticələri barədə düşünməli, qərbi azərbaycanlıların haqlarının bərpası üçün Azərbaycan dövləti tərəfindən bütün mümkün tədbirlərin görüləcəyini yaddan çıxarmamalıdır.

Əsmər QARDAŞXANOVA,

Azərbaycan.-2024.- 15 mart, № 58.- S.14.