Ermənistan havadarlarının sifarişlərini yerinə yetirməklə regional əməkdaşlıq imkanlarını itirir

Ermənilər xislətlərinə uyğun türk dünyasının milli bayramları, Novruz çərşənbələri ərəfəsində təxribat törətməklə, qəfil hücumlar təşkil etməklə xalqımızın bayram ovqatını pozmağa, necə deyərlər, yanan tonqallara soyuq su çiləməyə, soydaşlarımızı yurd-yuvalarından perik salmağa çalışmışdılar. Ermənistan silahlı qüvvələri bölmələrinin elə bu il martın 11-də saat 12:10-da Tovuzqala rayonunun Çinarlı yaşayış məntəqəsi istiqamətində yerləşən mövqelərindən ordumuzun Tovuz rayonunun Əsrik yaşayış məntəqəsi istiqamətindəki mövqeləri üzərində kvadrokopter vasitəsilə kəşfiyyat uçuşları həyata keçirməyə cəhd göstərməsi söylədiklərimizin bariz nümunəsidir.

Deyirlər dəyirman bildiyini edir, çax-çax baş ağrıdır. Azərbaycan işğaldan azad edilmiş ərazilərdə bərpa-tikinti və quruculuq işləri ilə 30-32 il əvvəl elindən-obasından didərgin salınan insanların ata-baba yurdlarına qayıdışını təmin etdiyi bir vaxtda ermənilər təxribatla məşğul olurlar. Müdafiə Nazirliyinin Mətbuat xidmətindən aldığımız məlumata görə, bölmələrimizin sayıqlığı nəticəsində aşkar olunan pilotsuz uçuş aparatı xüsusi texniki vasitələrlə zərərsizləşdirilib.

Xatırladaq ki, 2023-cü ilin sentyabrında həyata keçirilən antiterror tədbirlərindən sonra Qarabağda kök salmış separatçı rejim tamamilə ləğv olundu. Bu, Bakı ilə İrəvan arasında gərginliyin azaldılmasına müəyyən töhfə verdi və sülhün yeganə reallıq olduğunu müəyyənləşdirdi. Bir neçə ay Ermənistanla Azərbaycan arasında heç bir gərginlik yaşanmadı. Lakin bu sakitlik uzun çəkmədi, Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində Dövlət Sərhəd Xidmətinin sərhəd qoşunlarının Zəngilan rayonunun Kolluqışlaq kəndi ərazisində yerləşən mövqeyinə açılan atəş nəticəsində hərbi qulluqçumuz yaralandı. Atəş Ermənistan silahlı qüvvələrinin Qafan rayonunun Nerkin-And yaşayış məntəqəsi istiqamətində yerləşən mövqelərindən açılmışdı. Zəngilan istiqamətində ermənilərin törətdikləri təxribata cavab olaraq fevralın 13-də keçirilən "Qisas" əməliyyatının nəticələri Ermənistan üçün ağır oldu: bir əsgərimizin yaralanmasına qarşı 4 erməni hərbçisi məhv edildi, biri yaralandı.

Görünən odur ki, İrəvan üçün maraqlı olan nə qədər insan itkisi verməsi yox, öz çirkin maraqlarının necə təmin edilməsidir. Ekspertlərin fikrincə, təcrübəyə əsasən Bakının adekvat addımlarının ağır nəticələrinin olacağını bildikləri halda təxribata əl atmaları isə hədəfin hərbi yox, siyasi olduğunu deməyə əsas verir. Çünki hadisədən dərhal sonra Ermənistan Xarici İşlər Nazirliyi açıqlamasında Azərbaycanı "danışıqları pozmaqda", "sərhəddə eskalasiya yaratmaqda" ittiham etməyə cəhd etdi. Ermənistanın bu iddiaları bölgədə heç nəyi dəyişdirməsə də, Avropa strukturlarında "Qisas" əməliyyatını "Azərbaycanın hücumu" olaraq göstərməyə və bundan Bakıya qarşı təzyiq kimi istifadə etməyə imkan yarandığını düşündülər.

Vətən müharibəsindən sonra bir neçə ay davam edən sakitlik məhz rəsmi Bakının hərbi-diplomatik səylərinin nəticəsi idi. Lakin Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində, eləcə də Ermənistan silahlı qüvvələri bölmələrinin bu il martın 11-də günün günorta çağı Tovuzqala rayonunun Çinarlı yaşayış məntəqəsi istiqamətində yerləşən mövqelərindən ordumuzun Tovuz rayonunun Əsrik yaşayış məntəqəsi istiqamətindəki mövqeləri üzərində kvadrokopter vasitəsilə kəşfiyyat uçuşları həyata keçirməyə cəhd etməsi göstərir ki, Ermənistanın konstruktiv hərbi vəziyyəti davam etdirməyə siyasi iradəsi çatmır.

Əslində, Ermənistanın belə təxribatlara əl atması gözləniləndir. Hindistan və Fransa kimi dövlətlərin son zamanlar Ermənistanı sürətlə silahlandırması, Avropa İttifaqının (Aİ) Ermənistandakı missiyasının genişləndirilməsi istiqamətində səyləri, habelə Fransa Milli Jandarmının xarici missiyalarının komandiri, briqada generalı Uilyam De Meyerin Ermənistana gedərək binoklla Azərbaycana - işğaldan azad edilən ərazilərə tərəf baxması təsadüfi deyil. Bütün bunların gözlənilən nəticələri göz qabağındadır. Maraqlıdır ki, həmin vaxtlarda xarici KİV-də, o cümlədən İrəvan mediasında Ermənistanın sərhəddə əməliyyat həyata keçirərək siyasi arenada uğur qazanacağı iddia edilirdi...

Bütün bunlar deməyə əsas verir ki, təxribatlar qəsdən və planlı şəkildə törədilir. Qarşı tərəf vəziyyəti bilərəkdən gərginləşdirməyə çalışır və hiss olunur ki, bundan sonra da Cənubi Qafqazdakı geosiyasi mübarizə fonunda bu kimi təxribatların davam etməsi ehtimalı qaçılmazdır.

Maraqlıdır ki, Ermənistanın baş naziri Nikol Paşinyan mətbuata açıqlamalarında, müxtəlif dairələrdə çıxışlarında İrəvanın Bakı ilə sülh müqaviləsini imzalamağa hazır olduğunu bildirir. Onun sözlərinə görə, Ermənistanla Azərbaycan arasında sülh müqaviləsinin arxitekturası və prinsipləri razılaşdırılıb, İrəvanın bu sənədi imzalaması üçün siyasi iradəsi var.

Görünən odur ki, Paşinyan kənar güclərin, o cümlədən ABŞ-nin, Fransanın, Avropa İttifaqının (Aİ) təsiri altındadır. Adıçəkilən ölkələrin hər biri İrəvana təzyiq göstərərək öz maraqlarını təmin etməyə çalışırlar. Onların bir çoxu, xüsusilə Qərb oyunçuları regiondakı təsir güclərini artırmağa çalışırlar və bunun üçün gərginliyin yaranmasına, güclənməsinə səy göstərirlər. Ermənistan isə lazımi siyasi iradə ortaya qoya bilmədiyindən kənar güclərin təhrikinə məruz qalır. Bununla da Ermənistan bölgədə süni gərginlik yaratmaqla, üçüncü tərəflərin sifarişlərini yerinə yetirməklə, ən başlıcası onlara inanmaqla, əslində, "oturduğu budağı baltalayır", regional əməkdaşlıq imkanlarını itirir.

Rəhman SALMANLI,

Azərbaycan.-2024.- 15 mart, № 58.- S.14.