Ümumdünya Böyrək Gününə həsr olunmuş elmi-praktik konfrans keçirilib

Akademik Mirməmməd Cavadzadə adına Respublika Kliniki Uroloji Xəstəxanasında Ümumdünya Böyrək Gününə həsr olunmuş elmi-praktik konfrans keçirildi.

Xatırladaq ki, 14 Mart Ümumdünya Böyrək Günüdür. Bu gün bütün dünyada 2006-cı ildən etibarən hər il rəsmi şəkildə qeyd edilir. Bu günün qeyd olunmasında əsas məqsəd insanları böyrək xəstəlikləri haqqında problemlərlə tanış etmək və böyrək problemi olan insanların vaxtında həkimlərə müraciət etməsi üçün məlumatlandırmaqdır.

Akademik Mirməmməd Cavadzadə adına Respublika Kliniki Uroloji Xəstəxanasının direktoru Fariz Babayev jurnalistlərə açıqlamasında Ümumdünya Böyrək Gününün qeyd edilməsinin bu sahədə informasiya və maarifçilik istiqamətində atılan çox mühüm addım olduğunu diqqətə çatdırdı. Bildirdi ki, ölkəmizdə anadangəlmə irsi böyrək xəstəlikləri, böyrək çatışmazlığı olan insanların öz sağlamlığına daha məsuliyyətli yanaşması üçün şərait yaradılıb, yəni bunlarla bağlı geniş imkanlar mövcuddur: "Təsadüfi deyil ki, ölkəmizin səhiyyə sahəsində böyrək xəstəliklərinin profilaktikası problemlərinin həllindən, urologiyanın inkişafından söz düşəndə ilk növbədə mərhum akademik Mirməmməd Cavadzadə yada düşür. Səhiyyənin bu sahəsində hemodializ, mürəkkəb böyrək əməliyyatları məhz onun elmi axtarışları sayəsində, misilsiz xidmətlərinin zəhməti nəticəsində həyata keçirilib. Klinikamız 1966-cı ildən fəaliyyətə başlayıb. Yarandığı gündən burada dünya urologiyasının və nefrologiyasının bütün nailiyyətləri tətbiq olunmağa başlanılıb".

Fariz Babayev qeyd etdi ki, hər il ölkəmizdə bu təqvim günü qeyd olunur və bu, təqdirəlayiq haldır: "Belə tədbirlərin keçirilməsi Azərbaycanın səhiyyə sahəsində, həmçinin yaxşı kadrların hazırlanmasında mühüm əhəmiyyət kəsb edir".

Ümumdünya Böyrək Gününə həsr olunmuş elmi-praktik konfransda çıxış edən TƏBİB-in Tibbi təhsil və innovasiyalar departamentinin rəhbəri Teymur Mirzəbəyli bildirdi ki, böyrək xəstəliyi Azərbaycanda geniş yayılıb: "Ölkəmizdə 2023-cü ildən bu günə qədər 21 xəstəyə böyrək köçürülməsi əməliyyatı həyata keçirilib".

Teymur Mirzəbəyli deyib ki, böyrək xəstəlikləri cəmiyyətimizdə əsas sosial problemlərdəndir. Bu səbəbdən də "Xroniki böyrək çatışmazlığı üzrə Tədbirlər Proqramı" çərçivəsində 43 adda dərman vasitəsi, 35 adda tibbi sərfiyyat materialı və ləvazimat xəstələrə təqdim edilib. TƏBİB-in Tibbi təhsil və innovasiyalar departamentinin rəhbəri bildirib: "Bu günə qədər ölkəmizdə 37 orqan transplantasiyası həyata keçirilib. Onlardan 21-i böyrək transplantasiyası olub. Hazırda 4 mindən çox aktiv dializ proseduru alan xəstə var. Bütün bunlar icbari tibbi sığortanın xidmətlər zərfi çərçivəsində aparılan orqan transplantasiyası əməliyyatlarıdır".

Elmi-praktik konfransda çıxış edən TƏBİB-in Davamlı tibbi inkişaf şöbəsinin müdiri Emil İsgəndərov dedi: "Hazırda 88 ölkə bu günü qeyd edir. Həmin prosesə qoşulan ölkələr tədricən artmaqda davam edir".

Emil İsgəndərov dedi ki, bu günün həm elm, həm də təhsil sahəsində böyük əhəmiyyəti var, eyni zamanda əhali arasında böyrək xəstəliklərindən əziyyət çəkən şəxslər arasında da maarifçiliyi özündə əks etdirir. "Hazırda Yer üzündə 850 milyondan çox insan böyrək xəstəliklərindən əziyyət çəkir. 2019-cu ildə 3,1 milyondan çox insan məhz bu xəstəlik səbəbindən dünyasını dəyişib. Azərbaycanda da bu xəstəliklərdən əziyyət çəkənlərin sayı çoxdur".

Zöhrə FƏRƏCOVA,

Azərbaycan.-2024.- 15 mart, № 58.- S.16.