Solovyov yenə də ara qızışdırır

Təxribatçı jurnalistin son açıqlaması Rusiya dövlətinə və cəmiyyətinə qarşı xəyanətdir

"Rusiyalı jurnalist Vladimir Solovyovun sonuncu dəfə Azərbaycana qarşı səsləndirdiyi uydurmalar ilk belə ittiham deyil. O, hər zaman ölkəmizə qarşı qərəzli olan, informasiya müharibəsində düşmən mövqeyində dayanan jurnalistdir".

Bu sözləri "Azərbaycan" qəzetinə Mətbuat Şurasının İdarə heyətinin üzvü, "Azxeber.com" informasiya portalının baş redaktoru Hacıbəy Heydərli, teleaparıcı Vladimir Solovyovun Moskvada baş verən terror aktında Azərbaycan izini axtarmaq yönümlü açıqlamalarına münasibət bildirərkən deyib.

Hacıbəy Heydərli hələ 2016-cı ildə Solovyovun Azərbaycanı İŞİD-lə əlaqədələndirdiyini, Vətən müharibəsi dönəmində də Azərbaycana qarşı çirkin kampaniya apardığını, ölkəmizə qarşı ittihamlar irəli sürdüyünü xatırladaraq deyib ki, indiki mərhələdə bu, Solovyovun təxribatçı addımlarının davamı kimi qiymətləndirilməlidir. Ancaq əvvəlki məsələlərdə V.Solovyov məhz Azərbaycana qarşı kampaniya aparırdısa, son açıqlaması isə həm də Rusiya dövlətinə və cəmiyyətinə qarşı xəyanətdir. Çünki terror aktı Moskvada baş verib və terrordan heç bir dövlət sığortalanmayıb. Terrorçunun milliyyəti, dini önəm daşımır. Belə olan təqdirdə onun milli məsələləri ön plana çıxarması Rusiya daxilində yeni çaxnaşma yaratmaq, Rusiyada olan milli azlıqları dövlətə qarşı qaldırmaq istəyindən doğur. "Belə açıqlamalar, ilk növbədə Rusiya cəmiyyəti tərəfindən qınanılmalı, Solovyov kimi təxribatçı jurnalistlərin qarşısı alınmalıdır. O, heç vaxt öz sözünü demir, jurnalistdən daha çox təxribatçı kimi tanınır. Onun dediyi sözlər Ermənistan milyarderlərinin, diasporunun düşündüyü fikirlərdir. Onlar deyə bilmədiyi sözləri pul müqabilində Solovyov vasitəsilə çatdırırlar", - deyə H.Heydərli bildirib.

Onun sözlərinə görə, terror aktı ilə bağlı istintaqın davam etdiyi, dünyanın gözü Rusiyada olduğu halda V.Solovyovun belə ittihamlar səsləndirməsi işin gedişinə qarışmaq, həm də Rusiya dövlətini zəif göstərmək niyyətindən doğur. Dünyanın bir çox ölkəsində terror aktı baş verəndə bununla bağlı mediaya yayım qadağası qoyulur. Jurnalistlər mövzu ilə bağlı şəxsi fikirlərini səsləndirmirlər, çünki istintaq davam edir və işə hansısa fikirlə təsir etmək imkanı mümkün hesab edilir. Solovyov hazırki prosesdə Rusiya dövlətinə xəyanət edir. Azərbaycan-Rusiya münasibətlərinin yüksək səviyyədə olduğu vaxtda onun fikirləri məkrli və qərəzli qəbul olunur.

H.Heydərli qeyd edib ki, o, bu açıqlaması ilə Rusiya cəmiyyətində Azərbaycana qarşı nifrəti artırmağa, iki ölkənin münasibətlərinə kölgə salmağa çalışır: "Bununla bağlı təkcə Azərbaycan jurnalistikası, cəmiyyəti deyil, həm də ruslar reaksiya verməlidirlər. Bu da faktdır ki, Rusiyada Solovyovu ciddi şəxs, jurnalist kimi qəbul etmirlər. O, sadəcə olaraq, bəzi qüvvələrin maşasıdır".

Bu gün Rusiyada azərbaycanlıların ruslarla birgə mehriban şəraitdə yaşadığını deyən baş redaktor vurğulayıb ki, Solovyov kimi təxribatçı, şantajçı, xalqların, dövlətlərin arasını vurmaq istəyənlər heç bir halda məqsədlərinə çatmayacaqlar. Jurnalist kimi V.Solovyovun bu açıqlamasını şiddətlə qınadığını deyən H.Heydərli düşünür ki, məsuliyyətsiz açıqlamalar verən, iki dövlətin münasibətinə kölgə salmağa çalışan, Rusiyada yaşayan azərbaycanlılara qarşı bu cür ittihamlar səsləndirən şəxslər, "jurnalist"lər qanun qarşısında cavab verməlidirlər.

Əsmər QARDAŞXANOVA,

Azərbaycan.-2024.- 28 mart, № 63.- S.9.