Ermənistanın Azərbaycana qarşı informasiya təxribatı fiaskoya uğradı

"Son günlər erməni teleqram kanallarında Azərbaycan tərəfindən Ukraynaya hərbi təyinatlı məmulatların göndərilməsinə dair dezinformasiyalar yayılır. Bununla bağlı Azərbaycan Respublikası Müdafiə Sənayesi Nazirliyi bəyanat yayaraq bu informasiyaların həqiqəti əks etdirmədiyini ifadə edib. Görünür, Ermənistan ölkəmizə qarşı apardığı informasiya müharibəsinə yeni uydurmalar əlavə etməklə Azərbaycanla Rusiya arasında münasibətlərin gərginləşməsinə çalışır".

Bu fikirləri "Azərbaycan" qəzetinə açıqlamasında Milli Məclisin deputatı Elman Nəsirov deyib. Deputat bildirib ki, Rusiya-Ukrayna müharibəsinin şiddətli dövründə Azərbaycan tərəfindən Ukraynaya hərbi dəstəyin verilməsi haqqında dezinformasiya yaymaq, şübhəsiz ki, Bakı-Moskva münasibətlərində çatların yaradılmasına yönəldilmiş təxribatdır: "Dövlətimizin bu məsələ ilə bağlı mövqeyi bəllidir. Azərbaycan Rusiya-Ukrayna müharibəsinin tezliklə başa çatmasında maraqlıdır və sırf humanitar yönümlü addımlarla Ukraynaya dəstək nümayiş etdirir. Burada başqa məna axtarmaq, bu cür dezinformasiyalar yaymaq Ermənistanın çirkin planlarının tərkib hissəsidir".

Deputatın sözlərinə görə, ölkəmizə qarşı planlaşdırılan təxribatlar heç bir nəticə verməyəcək. Sadəcə, Ermənistan Rusiya ilə münasibətlərinin son dərəcə kəskinləşdiyi bir məqamda Rusiya-Azərbaycan münasibətlərində də oxşar vəziyyətin yaranmasına çalışır. Olsun ki bu tapşırığı da Qərbdəki havadarlarından alıb. "Azərbaycan və Rusiya arasında da analoji vəziyyətin yaranması üçün atılan bu addımlar həmişə Qərbin planlarına uyğun olub. Lakin hesab edirəm ki, belə təxribatçı addımlar nəticəsiz qalacaq. Çünki Moskva Qərbin və Ermənistanın çirkin planlarına yaxşı bələddir. Rusiyada yaxşı bilirlər ki, Azərbaycan tərəfindən Ukraynaya hərbi təyinatlı məmulatların göndərilməsinə dair xəbərlər tamamilə yalandır", - deyə müsahibimiz qeyd edib.

Elman Nəsirov onu da deyib ki, erməni teleqram kanallarında əvvəllər də belə həqiqətə söykənməyən xəbərlərin yayılmasına cəhdlər edilib: "Ona görə də belə dezinformasiyaların ciddi qəbul edilmək ehtimalı çox aşağıdır. Bu məlumatların heç bir əsası yoxdur. Ermənipərəst qüvvələrin bizə qarşı sərgilədikləri bu ənənəvi davranışları da fiaskoya uğradı. Məqsədlərinə çatmaq üçün hər çirkin vasitəyə əl atan təxribatçıların bütün cəhdləri daim boşa çıxıb. Ermənistan hadisələri özünə sərf edən kimi ictimailəşdirməyi yaxşı bacarsa da, nəticədə məğlubiyyətə məhkumdur".

Deputat yekunda vurğulayıb ki, Ermənistan saxta vədlərə aldanaraq nəticəsiz cədlər etməkdənsə, sülh istiqamətində real addımlar atmalıdır. Sözsüz ki, regionda davamlı və dayanıqlı sülhün bərqərar olması Azərbaycandan çox, məğlub Ermənistana lazımdır.

Nəzrin QAFARZADƏ,

Azərbaycan.-2024.- 28 mart, № 63.- S.10.