Dünya gəncləri Şuşada bir araya gələcəklər

"Biz buraya qalib kimi gəlmişik, bayrağı da qaldırmışıq, azad edilmiş bütün torpaqlarda Azərbaycan bayrağı dalğalanır. Döyüşə-döyüşə gəlmişik. Heç kim bu torpaqları bizə elə-belə verməyib. Heç bir danışıqlar heç bir əhəmiyyətə malik deyildi. Biz gördük ki, ancaq öz gücümüzlə öz torpaqlarımızı azad etməliyik və bunu etdik".

2021-ci ilin yanvarında Prezident, Ali Baş Komandan İlham Əliyev Şuşa şəhərində hərbçilərlə görüşdə belə dedi. O, Şuşa əməliyyatının aparıcı beynəlxalq hərbi məktəblərin dərsliklərinə salınacağına əmin olduğunu da bildirdi. Dövlətimizin başçısı vurğuladı ki, Şuşanın işğaldan azad edilməsi düşmənə vurulan ən böyük zərbə idi. Düşmən hesab edirdi ki, Şuşanı azad etmək mümkün deyil və yəqin ki, müəyyən dərəcədə haqlı idi, çünki Pənahəli xan bu şəhəri elə salmışdır ki, hər tərəfdən sıldırım qayalar və təbii landşaft Şuşanı mühafizə edir: "Qəhrəman Azərbaycan övladları mükəmməl hərbi əməliyyat keçirərək cəsarət, rəşadət, qəhrəmanlıq, güc, milli ruh nümayiş etdirərək Şuşanı işğalçılardan azad etmişlər və uzun fasilədən sonra noyabrın 8-də Şuşada Azərbaycan bayrağı qaldırılmışdır".

2020-ci ilin payızında xalqımızın zəfər günləri ard-arda gəlmişdi. Həmin il sentyabrın 27-də Qəhrəman Azərbaycan Ordusu Prezident, Silahlı Qüvvələrin Ali Baş Komandanı İlham Əliyevin rəhbərliyi ilə Ermənistanın işğalı altında olan Azərbaycan torpaqlarını azad etmək üçün Qarabağda genişmiqyaslı əks-hücuma başladı. İkinci Qarabağ müharibəsində aparılan uğurlu hərbi əməliyyatlar nəticəsində 5 şəhər, 4 qəsəbə və 286 kənd işğaldan azad edildi. 44 gün ərzində Cəbrayıl şəhəri və rayonun 90 kəndi, Füzuli şəhəri və rayonun 53 kəndi, Zəngilan şəhəri, rayonun Mincivan, Ağbənd, Bartaz qəsəbələri və 52 kəndi, Xocavənd rayonunun Hadrut qəsəbəsi və 35 kəndi, Tərtər rayonunun 3 kəndi, Qubadlı şəhəri və 41 kəndi, Xocalı rayonunun 9 kəndi, Şuşa şəhəri, Laçın rayonunun 3 kəndi, həmçinin Ağdərə və Murovdağ istiqamətlərində bir neçə strateji yüksəklik, Zəngilanda isə Bartaz, Sığırt, Şükürataz yüksəklikləri və daha 5 adsız yüksəklik noyabrın 9-dək işğalçılardan azad edildi.

O zaman otuz ilə yaxın Ermənistanın işğalı altında qalmış ərazilərimizin hər qarışının düşməndən geri alınması xalqımız üçün misli-bərabəri olmayan sevincə dönür, əsl bayram kimi qarşılanırdı. Azərbaycanın tarixi və strateji əhəmiyyətli mədəniyyət paytaxtı, Qarabağın tacı Şuşa şəhərinin azad edilməsi isə bu sevincin zirvəsi oldu. Prezident, Ali Baş Komandan İlham Əliyev 2020-ci il noyabrın 8-də Şuşa şəhərinin azad olunması münasibətilə xalqa müraciətində dedi: "İyirmi səkkiz il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq. Bu, bizim şanlı Qələbəmizin, Zəfərimizin günüdür!" Həmin gün Azərbaycan tarixinə şanlı bir gün kimi əbədi yazıldı. Şuşa şəhərinin işğaldan azad edildiyi gün - noyabrın 8-i Zəfər Günü elan olundu.

O möhtəşəm qalibiyyəti xalqımıza bəxş edən, sıldırım qayaları dırmaşaraq işğalçı Ermənistan silahlı qüvvələrinin bölmələrinə ağır zərbələr endirən qəhrəmanlarımızın əksəriyyəti vətənpərvər ruhda böyüyüb tərbiyə almış gənclər idi. Onlar otuz ilə yaxın ölkəsinin əzəli torpaqlarını işğalda saxlamış düşmən döyüşçülərini müasir silahların deyil, qəlblərindəki vətən sevgisinin gücü ilə məğlub etdilər. Azərbaycanın gənc qəhrəmanları bütün dünyadakı həmyaşıdları üçün igidlik, vətənsevərlik nümunəsinə çevrildilər.

Azərbaycanın mədəniyyət paytaxtı azadlığına qovuşduqdan sonra bir-birindən maraqlı və əhəmiyyətli beynəlxalq tədbirlərin keçirildiyi ünvan oldu. Bu il Şuşa şəhərinin tarixində ən əlamətdar illərdən biridir. Şuşa 2024-cü il də yalnız ənənəvi tədbirlərə evsahibliyi etməyəcək.

Ötən il noyabrın 10-da İslam Əməkdaşlıq Təşkilatının Gənclər Forumu İcraiyyə Şurasının Türkiyə Respublikasının İstanbul şəhərində keçirilmiş 11-ci iclasında Azərbaycanın mədəniyyət paytaxtı Şuşa şəhəri yekdilliklə İslam Əməkdaşlıq Təşkilatının (İƏT) "Gənclər Paytaxtı 2024" Beynəlxalq Proqramına 10-cu ev sahibi seçilib. Sözügedən iclasda İƏT Gənclər Forumunun həyata keçirdiyi "Gənclər paytaxtı 2024" beynəlxalq proqramının seçim komissiyasının üzvləri bu qərarın lehinə yekdilliklə səs veriblər.

Prezident İlham Əliyev aprelin 17-də "Şuşa şəhərinin 2024-cü il üçün "İslam Əməkdaşlıq Təşkilatının gənclər paytaxtı" seçilməsi ilə bağlı tədbirlər haqqında" sərəncam imzaladı.

İslam Əməkdaşlıq Təşkilatının gənclər paytaxtında - Şuşada düzənlənəcək tədbirlərə qatılmaq üçün müxtəlif ölkələrdən gənclər gələcək. Layihənin əsas məqsədi dünya gənclərini bir araya gətirməkdir. Şuşanın gənc qonaqları bu tarixi şəhərin azad olunmasında misilsiz hünər göstərmiş həmyaşıdları barədə geniş məlumatlar əldə edəcəklər.

Qeyd edək ki, bu il Şuşa islam dünyasının həm gənclər, həm də mədəniyyət paytaxtıdır.

Zöhrə FƏRƏCOVA,

Azərbaycan.-2024.- 3 may, № 90.- S.15.