Zaman keçdikcə Heydər Əliyevin böyüklüyünü daha dərindən dərk edirik

Uca dağ zirvəsi kənardan daha aydın göründüyü üçün digər zirvələrlə onu müqayisə etmək asan olur.

Heydər Əliyev zirvəsi elə bir yüksəklikdir ki, müqayisəyə gəlmir, zaman keçdikcə onun mahiyyətini daha dərindən başa düşürük. Yadıma gəlir, hələ məktəbli olan zaman biz Heydər Əliyevin çıxışlarına uyğun çıxışlar edər, lideri təkrarlamağa çalışardıq. İstəyirdik ki, diksiyamız, nitqimiz Ulu Öndərin nitqi kimi təmiz və səliqəli olsun.

Heydər Əliyev həqiqətən də çox nüfuzlu dövlət xadimi, böyük şəxsiyyət olub. O, hakimiyyətdə olduğu bütün zamanlarda Azərbaycana uğurla rəhbərlik edib, ölkəmizi inkişafa aparıb. Azərbaycanın imkanlarını genişləndirib, keçmiş SSRİ miqyasında tanınmasına nail olub, nəhayət, müstəqillik dövründə xalq hərəkatını himayə edib. Xalqın tələbi ilə hakimiyyətə qayıtdıqdan sonra isə Azərbaycanın tərəqqisini təmin edən "Əsrin müqaviləsi"ni bağlayıb. Məhz həmin müqavilə imzalanandan sonra Azərbaycana çoxmilyardlıq maliyyə vəsaitləri daxil olmağa başlanıb. Bunun nəticəsində isə ordumuz möhkəmlənib, iqtisadiyyatımız inkişaf edib. Bir sözlə, Ulu Öndər Azərbaycanı ayağa qaldırıb!

Azərbaycan Heydər Əliyevin irsini müvəffəqiyyətlə davam etdirən Prezident İlham Əliyevin liderliyi dövründə öz sürətli inkişafını təmin edib. Xalq-ordu-hakimiyyət birliyi yaranıb və torpaqlarımız düşmən işğalından azad edilib. Bu gün fəxrlə deyə bilərik ki, Azərbaycan öz ərazisi üzərində suverenliyinin tam bərpasına nail olub, ərazi bütövlüyünü təmin edib. İlham Əliyev məhz Heydər Əliyevin vəsiyyətini yerinə yetirməklə Şuşada, Xankəndidə, Xocalıda üçrəngli bayrağımızı dalğalandırıb. Bu gün dövlət olaraq müvəffəqiyyətlə, iri addımlarla irəliləyirik və dünyada söz sahibinə çevrilmişik. Təsadüfi deyil ki, bir sıra beynəlxalq tədbirlərə məhz Azərbaycan evsahibliyi edir. Bütün bu nailiyyətlər birbaşa Heydər Əliyevin təməlini qoyduğu uğurlu yolun davamıdır.

Heydər Əliyev səbirli və təmkinli şəxsiyyət idi. Hələ o zamanlar da müxalifətdə olanda mənim özümə belə çox səbirlə yanaşır və başa düşürdü ki, şəxsi mənafeyimi güdən, vəzifə arzusunda olan və ya var-dövlət arxasınca qaçan biri deyiləm. Azərbaycanı, xalqımızı ürəkdən sevdiyimi bildiyi üçün mən hər zaman onun himayəsini hiss etmişəm. Zaman keçdikcə isə Heydər Əliyevin böyüklüyünü bir daha dərk edir və onun vəsiyyətlərini gerçəkləşdirən Prezident İlham Əliyevin rəhbərliyi ilə inamla irəliləyirik.

Tahir KƏRİMLİ,

Vəhdət Partiyasının sədri,

Milli Məclisin deputatı

Azərbaycan.-2024.- 10 may, № 96.- S.10.