Makron Fransanı nüfuzdan salıb

"Neokolonializm siyasətini davam etdirən Fransa müstəmləkəsində olan xalqların hüquqlarına hörmət etmir. Özünün dünyadakı hegemonluğunu təmin etmək məqsədilə yeni müstəmləkəçilik strategiyaları həyata keçirir. Bununla yanaşı, Paris onun cinayətkar əməllərini ifşa edən Bakıya qarşı açıq düşmənçilik sərgiləməkdən də çəkinmir".

Bu fikirləri "Azərbaycan" qəzetinə açıqlamasında Milli Məclisin deputatı Məlahət İbrahimqızı deyib. Deputat söyləyib ki, Fransanın Azərbaycana qarşı riyakarlıq üzərində qurulmuş oyunları bu ölkənin çirkin niyyətlərindən xəbər verir: "Müstəmləkələri üzərində hegemonluğunu itirmək üzrə olan Paris Cənubi Qafqazda hərbi mövcudluğa nail olmaq istəyir. Bu məqsədlə ölkəmizə qarşı apardığı "qara piar" kampaniyalarını davam etdirir, ermənidən daha çox ermənilik edir. Təbii ki, bu ssenaridə əsas rolu Fransa prezidenti Emmanuel Makron oynayır. Hər addımında Azərbaycana və Türkiyəyə qarşı əsassız iddialarla çıxış edən Makronun komandasının üzvləri riyakarlıq göstərməkdə heç də ondan geri qalmırlar".

Deputat Fransanın "ölmüş" kolonializmə nəfəs vermək cəhdlərini beynəlxalq münasibətlər sistemi üçün təhlükəli hesab edir. Müsahibimiz bildirir ki, Makron hakimiyyətinin bu cəhdləri Parisi nüfuzdan salır, dünya ictimaiyyətinin fransızlara inamını azaldır. "Makron əsassız planlarını reallaşdırmağa cəhd etməklə birbaşa Fransa dövlətçiliyinə zərbə vurur. Ölkəsinin daxili problemlərini həll etmək əvəzinə, özünə aiddiyəti olmayan qlobal məsələlərə münasibət bildirir, hətta müharibə cinayətlərinə haqq qazandırır. Hər addımda beynəlxalq hüququn norma və prinsiplərini pozan Makron Fransası bu gün böyük uçurumun kənarındadır", - deyə deputat qeyd edib.

Məlahət İbrahimqızı həmçinin onu da deyib ki, Fransanın Cənubi Qafqazla bağlı siyasəti kökündən yanlışdır. Makron Fransası regiondakı mövcud reallıqları düzgün qiymətləndirmir, Azərbaycanın yaratdığı reallıqları qəbul etmək istəmir: "Azərbaycana təzyiq göstərmək üçün müxtəlif "qərarlar" qəbul edərək, müstəmləkə siyasətini Cənubi Qafqaza da yeritməyə çalışır. Beynəlxalq təşkilatlarda ölkəmiz əleyhinə qətnamələrin qəbul olunması üçün dəridən-qabıqdan çıxan rəsmi Paris, bu azmış kimi, Ermənistanı silahlandırır. Lakin unudur ki, bu addımları Fransanı regionumuzdan daha da uzaqlaşdırır, ölkəmizə qarşı məkrli siyasət yürütməklə Mərkəzi Asiya ölkələri ilə əlaqə qurmaq imkanlarını da itirir".

Deputat Fransa kimi bəzi dövlətlərin və təşkilatların Azərbaycanla təhdid dili ilə danışmağının da mümkünsüzlüyünü vurğulayıb. Müsahibimiz deyib ki, bu cür addımlar heç bir təsir imkanlarına malik deyil. Prezident İlham Əliyev də dəfələrlə bəyan edib ki, "Azərbaycanla kimsə təhdid, şantaj dili ilə danışa bilməz".

N.QAFARZADƏ,

Azərbaycan.-2024.- 10 may, № 96.- S.20.