Münasibətlər getdikcə normallaşır

Ermənistan rəhbərliyi siyasi iradə nümayiş etdirsə, sülh sazişi imzalanacaq

Azərbaycan və Ermənistan arasında delimitasiya və demarkasiya prosesinin razılaşdırılması heç bir vasitəçi olmadan baş tutub. Cənubi Qafqazda sülhün bərpasına əngəl törədənlər də gördülər ki, onların bu prosesdə iştiraklarına heç bir ehtiyac yoxdur. Regionun iki ölkəsi öz məsələsini həll edə bilər. Təbii ki, delimitasiya və demarkasiya uzun prosesdir və müəyyən qədər vaxt ala bilər. Amma danışıqların müsbət nəticə verməsi göstərir ki, Azərbaycan və Ermənistan heç vaxt olmadığı qədər sülhə yaxındırlar və heç kimin vasitəçiliyi olmadan sülh sazişi imzalaya bilərlər.

Milli Məclisin deputatı Kamilə Əliyeva qəzetimizə açıqlamasında xatırladıb ki, Prezident İlham Əliyev də iki ölkə arasında münasibətlərin normallaşmasında, heç bir vasitəçi olmadan ikitərəfli formatda danışıqların aparılmasının böyük nəticələr verə biləcəyini dəfələrlə vurğulayıb. Artıq Azərbaycanla Ermənistan arasında münasibətlərin normallaşdırılması istiqamətində son vaxtlar müsbət tendensiyalar nəzərə çarpır: "İki ölkə arasında sərhədlərin delimitasiya və demarkasiya məsələsinin həlli sülh müqaviləsinin imzalanmasına böyük töhfələr verə bilər. Elə bu səbəbdən Azərbaycan baş nazirinin müavini Şahin Mustafayevlə Ermənistan baş nazirinin müavini Mqer Qriqoryan arasında keçirilən görüşlərin nəticəsində sərhədlərin delimitasiyası istiqamətində razılığa gəlinib".

Deputat vurğulayıb ki, Qazaxın dörd qeyri-anklav kəndinin Azərbaycana qaytarılması ölkəmizin növbəti siyasi uğurudur, eləcə də ölkələr arasında sülhün yaranmasına böyük töhfədir. Prezident İlham Əliyev həmişə Cənubi Qafqazın iki ölkəsinin mehriban qonşuluq şəraitində yaşamasının və Azərbaycanın sülhün tərəfdarı olduğunu bildirib. Son dövrlər Ermənistan baş naziri Paşinyan da Azərbaycanla sülhün yaranmasının vacibliyi haqqında fikirlər söyləyir. O, müsahibəsində də etiraf edib ki, Qazaxın dörd kəndi hər zaman Azərbaycan ərazisi olub və Ermənistan dövlətinin gələcəyi də Azərbaycanla sülhün yaranmasından keçir.

K.Əliyeva qeyd edib ki, bəzi Qərb dövlətləri, o cümlədən Fransa tərəfindən Ermənistanın revanşist və separatçı qüvvələri Azərbaycana qarşı təxribatlara təhrik edilir. "Onların bu təşəbbüsü mənasızdır. Ötən gün keçirilmiş Azərbaycan və Ermənistan xarici işlər nazirlərinin Qazaxıstanda nəzərdə tutulan görüşü də sülhün yaranması istiqamətində daha bir müsbət addımdır. Güman edirəm ki, Ermənistan rəhbərliyi siyasi iradə nümayiş etdirəcək və bu il sülh müqaviləsi imzalanacaq", - deyə müsahibim əlavə edib.

Əsmər QARDAŞXANOVA,

Azərbaycan.-2024.- 12 may, № 98.- S.9.