Ermənistan həm Rusiyaya, həm də Qərbə xəyanət edir

Mayın 8-də Ermənistan baş naziri Nikol Paşinyanla Rusiya Prezidenti Vladimir Putinin Moskvadakı görüşündə bir neçə məsələ xüsusi diqqət çəkdi. İlk növbədə heç bir nikbinlik vəd etməyən bu görüş iki ölkə arasındakı əlaqələrin sərinliyini ortaya qoydu.

Görüşdə V.Putinin Rusiya ilə Ermənistan arasındakı hazırkı iqtisadi göstəriciləri rəqəmlər vasitəsilə N.Paşinyanın üzünə "oxuması"nın fonunda həm də Ermənistanın ikili oyun oynaması, Rusiya və Avropaya eyni anda xəyanət etməsi üzə çıxdı.

İrəvanın qeyri-qanuni qazanc mənbəyi

Faktiki olaraq bütün iqtisadiyyatı Rusiyadan asılı olan Ermənistan bir neçə müddətdir ki, bu ölkəyə qarşı sərt ritorika nümayiş etdirir, KTMT-dən çıxacağı ilə bağlı onu hədələyir. Bu məqamın özü belə İrəvanın Moskvaya arxa çevirməsindən, necə deyərlər, yediyi çörəyə təpik atmasından xəbər verir.

Sözügedən görüşdə V.Putin bildirib ki, Ermənistanla Rusiyanın ticarət dövriyyəsi 2023-cü ildə 7 milyard dolları keçib (daha dəqiqi, 7,3 milyard dolları aşıb). 2015-ci ildən Ermənistanın Avrasiya İqtisadi İttifaqı (Aİİ) ilə ticarət dövriyyəsinin 14 dəfə artdığını xüsusi vurğulayan Rusiya Prezidenti bunları rekord göstərici adlandıraraq tarix boyu belə ticarət dövriyyəsinin Ermənistanla heç vaxt olmadığını diqqətə çatdırıb.

Putin onu da əlavə edib ki, Ermənistanın Rusiyaya ixracı kəskin artıb...

Əlbəttə ki, bu artımın kökündə Ermənistanın iqtisadiyyatı deyil, xəyanəti dayanır. Çünki Rusiya sahillərindən sürətlə uzaqlaşaraq Avropa sularında üzməyə başlayan Ermənistan Qərbdəki "hami"lərini satmaqla, onlara da xəyanət edir.

2022-ci ildə Ukraynada müharibə başlayandan sonra Ermənistan Rusiyanın sanksiyalardan yayınmasında aparıcı rol oynayır. Belə ki, Ermənistan sanksiyalı malları Rusiyaya sataraq Qərbə qarşı xəyanətkarlıq nümayiş etdirir.

İqtisadi göstəricilərdən də görünür ki, bu ölkə tarixində ilk dəfə Rusiya ilə ticarət dövriyyəsində "müsbət saldo" əldə edib - yəni Rusiyaya ixracı idxalını üstələyib, baxmayaraq ki, Ermənistanın bütün enerji strukturu Rusiyanın əlindədir, qaz idxalını da bu ölkədən edir.

Ermənistan, əsasən, BƏƏ-dən, o cümlədən Çin və Avropadan idxal etdiyi sanksiyalar altındakı malları Rusiyaya ixrac etməklə bu səviyyəyə çatıb. Buna görə Rusiyaya ixracı son bir ildə 5 dəfəyə yaxın artıb, o cümlədən BƏƏ və Çinlə ticarəti 2 milyardı aşıb. Buna görə Ermənistan iqtisadiyyatı fantastik göstəricilər əldə edib.

Ermənistanın hiyləgər manevrləri

Rusiya müharibədə istifadə etdiyi raketlərin hazırlanmasında lazım olan elektron avadanlıqları da Ermənistandan idxal edir və bunu bütün dünya, eləcə də Avropa yaxşı bilir. Çünki sözügedən faktla bağlı ən nüfuzlu analitik mərkəzlər dəfələrlə hesabatlar yayıblar.

Ermənistanın hiyləgər manevrləri məharətlə təzyiqlərdən yayınmasına və rahat şəkildə qeyri-qanuni əməllərlə məşğul olmasına kömək edir. Bir tərəfdən Rusiya ilə münasibətlərinə görə KTMT-dən çıxmaq kimi riyakar oyun oynayaraq Qərbin gözünü boyayır, digər tərəfdən də heç bir istehsalı olmaya-olmaya Rusiyaya ağlasığmaz həcmdə ixrac həyata keçirərək qazancına qazanc qatır.

Rusiyada keçirilən görüşün Qərbi qəzəbləndirəcəyini nəzərə alan riyakar Ermənistanın məhz elə bu görüş zamanı, yəni mayın 8-də KTMT-nin maliyyələşməsini dayandırmasını bəyan etməsi, hərbi baxımdan guya Rusiyanın nəzarətindən çıxması görüntüsü yaratması da bu oyunun bir parçasıdır. Bunda isə məqsəd Qərbin təzyiqlərindən yayınaraq milyardlar qazanmağa davam etməkdir.

Hazırda Ermənistan tam ortada dayanıb və Ukrayna cəbhəsindəki vəziyyətə uyğun gah Qərbə, gah da Rusiyaya tərəf addımlayır. Tutduğu bu mövqesizliyin əvvəl-axır başına bəla olacağı da danılmaz gerçəklikdir. Çünki İrəvanın eyni zamanda həm Qərbin, həm də Rusiyanın ipini boğazına dolaması qarşıda ona yaxşı heç nə vəd etmir.

Əslində, Ermənistanın bu xəyanətkar addımları heç kimdə təəccüb doğurmur. Çünki Türkiyənin timsalında ermənilərin tarixi xəyanətkarlığına bütün dünya şahiddir. Eyni zamanda İkinci Dünya müharibəsində Sovet İttifaqı tərkibində ola-ola faşizmə kömək əli uzadan da məhz Ermənistan olub. Ermənistan Faşist Qaragen Njdeyə İrəvanda abidə ucaldaraq hazırda da insanlığa xəyanət edir.

Ermənistanın baş nazirinin 9 may faşizm üzərində qələbə günü ərəfəsində, Kremldə görüşə gəlməsi də əslində bu ölkənin riyakarlıqda, xəyanətkarlıqda, satqınlıqda rəqib tanımadığını bir daha ortaya qoydu...

Bütün bunlardan da bir daha aydın olur ki, Ermənistanın tarixi də xəyanətlər üzərində yaranıb.

Yasəmən MUSAYEVA,

Azərbaycan.-2024.- 12 may, № 98.- S.9.