Möhkəm təməl üzərində qurulan dostluq

Aleksandr Lukaşenkonun Qarabağ səfəri suverenliyimizə dərin hörmət əlamətidir

"Son dövrlər bir çox ölkə Azərbaycanla sıx siyasi və iqtisadi əlaqələr qurmağa böyük maraq göstərir. Bu, Prezident İlham Əliyevin güclü siyasətçi, mahir diplomat olması və beynəlxalq aləmdə Azərbaycanın nüfuzunun, gücünün, qüdrətinin durmadan artması, qazandığımız şanlı qələbələr və digər uğurlarla bağlıdır".

Bu fikirləri "Azərbaycan" qəzetinə açıqlamasında Milli Məclisin deputatı Kamilə Əliyeva deyib. Deputat bildirib ki, nüfuzlu beynəlxalq tədbirlərin Azərbaycanda keçirilməsinə təşəbbüslərin göstərilməsi, bir sıra dünya ölkələrinin dövlət və hökumət başçılarının Azərbaycana səfərlər etməsi, iqtisadi və siyasi əlaqələri əhatə edən mühüm sənədlərin imzalanması ölkəmizə olan inam və etibarın nümunəsidir: "Azərbaycanın Ermənistan istisna olmaqla MDB-yə digər üzv dövlətlərlə siyasi-iqtisadi əlaqələri yüksək səviyyədədir və bu dövlətlərlə strateji tərəfdaşlıq haqqında bəyannamə imzalanıb. Azərbaycanla Belarus arasında ikitərəfli əlaqələr də möhkəm təməllər üzərində qurulub. Mayın 16-da Belarus Respublikasının Prezidenti Aleksandr Lukaşenkonun Azərbaycana dövlət səfəri və Prezident İlham Əliyevlə görüşü əlaqələrimizin daha da inkişaf etdirilməsinə böyük zəmin yaradacaq".

Deputat qeyd edib ki, dövlət başçısının Belarus Prezidenti ilə görüşdən sonra mətbuata bəyanatından da göründüyü kimi, Azərbaycanla Belarus Respublikası arasında Hökumətlərarası Komissiya uğurla fəaliyyət göstərir və gələcəkdə əməkdaşlığın artırılması istiqamətində bir çox tədbir həyata keçiriləcək: "İki ölkə arasında əvvəlki illərdə yaradılmış birgə müəssisələr perspektivli fəaliyyət göstərir və yeni yaradılacaq digər müəssisələrin sayının da artırılması nəzərdə tutulub. Əsasən maşınqayırma, hərbi sənaye komplekslərində, eləcə də kənd təsərrüfatı sahələrində əməkdaşlıq əlaqələri daha da gücləndiriləcək ki, bu da ölkələrimizin təhlükəsizliyinə və iqtisadiyyatının güclənməsinə əhəmiyyətli dərəcədə dəstək göstərəcək. Belarus şirkətləri Azərbaycanın işğaldan azad edilmiş torpaqlarında bərpa işlərində də iştirak edəcəklər. Belarus Respublikasının şəhərsalma sahəsində, eləcə də aqroşəhərciklərin tikintisində böyük təcrübəsindən faydalanmaq mümkün olacaq".

Deputat yekunda onu da deyib ki, Belarus Prezidenti Aleksandr Lukaşenkonun Prezident İlham Əliyevlə işğaldan azad edilmiş Füzuli və Şuşa şəhərlərinə səfər etməsi də bu ölkənin Azərbaycanın suverenliyinə hörmətlə yanaşmasının bariz nümunəsidir: "Göründüyü kimi, Azərbaycanla Belarusun mehriban dostluq münasibətləri hər keçən il daha da möhkəmlənir. Prezident İlham Əliyevlə Aleksandr Lukaşenkonun şəxsi dostluq münasibətləri də ölkələrimizin və xalqlarımızın dostluğunun inkişafına böyük töhfə verir".

Nəzrin QAFARZADƏ,

Azərbaycan.-2024.- 19 may, № 104.- S.6.