Müasir müstəmləkəçiliyin ən eybəcər siması

Neokolonial Fransanın demokratiyadan danışmağa haqqı yoxdur

"Fransa demokratik deyil, neokolonial ölkədir. Bu ölkənin Yeni Kaledoniyaya xüsusi təyinatlılar göndərməsi müasir müstəmləkəçiliyin ən eybəcər formasıdır. Özünü bütün dünyaya demokratiyanın beşiyi, mədəniyyət simvolu kimi təqdim edən Paris XXI əsrdə öz azadlığı uğrunda mübarizə aparan kanak xalqına qarşı assimmetrik güc tətbiq etməklə müstəmləkəçi ölkə olduğunu bir daha etiraf etdi".

Bu fikirləri qəzetimizə açıqlamasında Milli Məclisin deputatı Hikmət Məmmədov bildirib. O söyləyib ki, Fransa istibdadı onun dənizaşırı torpaqlar adlandırdığı, əslində isə işğal etdiyi ərazilərdə get-gedə daha da kəskinləşir: "1998-ci ildə kanak xalqına seçmək və təmsilçilik hüququ verən Fransa indi bu məhdud hüququ da onların əlindən almağa çalışır. Demokratiyanı, insan hüquqlarını eybəcər formada manipulyasiya edir, seçki qanunvericiliyini yerli xalqın iradəsinin əleyhinə olaraq dəyişdirir. Beləliklə, onsuz da Fransanın ekspansiya siyasəti sayəsində öz ölkələrində azlıq vəziyyətinə salınan kanaklar hər keçən gün hüquqlarını daha da itirirlər".

Hikmət Məmmədov əlavə edib ki, Paris adaya yerləşdirilən miqrantlara qeyri-qanuni səsvermə hüququ tanımaqla kanakların səslərini daha da azaldır: "Faktiki olaraq, kanakların öz torpaqlarında hüquqlarını tamamilə sıfıra endirir. Ən pisi isə odur ki, bütün bunları demokratiya adı altında həyata keçirir. Paris kanakları öz torpaqlarında adaya köçürülən və Fransa yandaşları olan miqrantlara uduzduracaq qanunu seçki hüququnun genişləndirilməsi adı altında reallaşdırır. Bu riyakarlığı qəbul etməyən kanaklara isə güc tətbiq edir".

Deputat hazırda Fransanın güc strukturlarının 10-dan çox günahsız yeni kaledoniyalını öldürdüyünü, yüzlərlə insanı həbs etdiyini xatırladıaraq deyib ki, bu cinayətkar ölkə kanakların iş yerlərini, təsərrüfat sahələrini və əmlaklarını dağıdaraq ölkəyə 200 milyon avrodan çox ziyan vurub. Bu, cəmi 600 min sakini olan bir adanın iqtisadiyyatı üçün dağıdıcı zərbədir.

"Ən qəribəsi isə odur ki, Fransanın daxili işlər naziri Jerald Darmanen "France-2" telekanalına müsahibəsində Azərbaycana qarşı iddialar səsləndirib. Bütün bunların günahkarı qismində xarici qüvvələri, o cümlədən Azərbaycanı göstərir. Bununla da özünün müstəmləkə siyasətini gizlətməyə çalışır. Əgər Azərbaycan beynəlxalq hüququ, öz azadlığını bərpa etməklə dünyada əzilən xalqların mübarizə simvoluna çevrilibsə, buna ilk növbədə demokratiya, beynəlxalq hüquq, insan hüquqları kimi dəyərləri başlıca prinsip elan edən dövlətlər sevinməlidir. Fransa isə bunun tamamilə əksini edir. Ona görə də Fransanın beynəlxalq hüquqdan, yaxud demokratiyadan danışmağa mənəvi haqqı yoxdur. Okeaniyada yaşadıqları isə onun neokolonial siyasətinin nəticəsidir", - deyə Hikmət Məmmədov vurğulayıb.

Nəzrin QAFARZADƏ,

Azərbaycan.-2024.- 19 may, № 104.- S.7.