İnsanlıq əleyhinə cinayət törətməkdə davam edən dövlət

Yer kürəsinin 50-dən çox ölkəsinin ərazisini işğal edib təbii sərvətlərini talayan, xalqlarını illərlə əsarətdə saxlayan Fransa insanlıq əleyhinə törətdiyi cinayətlərə, soyqırımlarına, amansız vəhşiliklərə görə dünya xalqları tərəfindən ən çox lənətlənən ölkədir. Bu ölkənin törətdiyi soyqırımları dünyanın ən böyük qara ləkəsidir.

Əlcəzairdə, Ruandada, Nigerdə, Mərakeşdə, Vyetnamda və adını qeyd etmədiyimiz digər ölkələrdə milyonlarla günahsız insanı amansızlıqla qətlə yetirən Fransa işğal etdiyi ərazilərdən qovulduqca tarixdə törətdiyi bəşəri cinayətlərdən nəticə çıxarıb səhvlərini düzəltmək əvəzinə imperialist siyasətini genişləndirməyə çalışır. İnsanlıq əleyhinə yönələn əməllərini indi Yeni Kaledoniya əhalisi üzərində tətbiq edir. Özünü dünyada "demokratıyanın hamisi", guya insan haqlarının müdafiəçisi kimi təqdim etmək istəyən Fransa parlamenti Yeni Kaledoniya əhalisinin yerli idarəetmə sistemində iştirak hüquqlarını məhdudlaşdıran qanunu təsdiqləyib. Fransanın beynəlxalq hüquq normalarına uyğun gəlməyən bu addımını etrazla qarşılayan kaledoniyalılara indi divan tutulmağa başlanılıb. Dünyaya "demokratiya dərsi keçən" Fransa hökuməti bu dəfə etiraz edən dinc kaledoniyalıları öldürməkdən belə çəkinmir. Fransa ordusu və polisi adi insan haqlarını tələb edən insanlara zor tətbiq edir. Dinc nümayişçilərdən yüzlərlə yaralanan var. Yeni Kaledoniyada fövqəladə vəziyyət tətbiq olunmasına qərar verən Makron hökuməti nümayişçilərin kütləvi həbsinə də başlayıb. İşın maraqlı tərəfi budur ki, Fransanın daxili işlər naziri Jerald Darmanen Yeni Kaledoniyada baş verən hadisələrə görə Azərbaycanı əsassız ittiham edib. Onun iddiasına görə, guya rəsmi Bakı Fransanın daxili işlərinə qarışır.

İllərdir ki, Fransa Azərbaycan ərazilərində kök salan separatçıları silahlandıraraq Qarabağı münaqişə ocağına çevirmişdi. 2020-ci ilin Vətən müharibəsi zamanı və ondan sonrakı dövrlərdə, elə bu gün də Fransa Prezidenti Emmanuel Makronun ölkəmizə qarşı sərgilədiyi ədalətsiz və qərəzli mövqeyə bütün dünya şahidlik etməkdədir. Bununla kifayətlənməyən Fransa parlamentinin hər iki palatası, Fransa dövləti, onun ali siyasi rəhbərliyi Qarabağdakı separatçı rejimi açıq şəkildə dəstəkləmişdir. Ölkəmizə qarşı hər cür avanturist hərəkətlər edən bir ölkənin daxili işlər nazirinin ölkəmizi ittiham etməsi olduqca gülünc görünür. Azərbaycan Fransadan fərqli olaraq müstəmləkəçiliyə qarşı mübarizəni hər hansı separatçı rejimi dəstəkləməklə etmir. Fransa Prezidenti Emmanuel Makron da, onun avantürist komandası da anlamalıdır ki, Fransanın törətdiyi və bu gün də israrla davam etdirdiyi bəşəri cinayətlərin ifşa olunmasının qarşısını almaq artıq mümkün deyil. Sürətlə dəyişən dünyada Afrika ölkələri də Fransanın müstəmləkəçiliyindən xilas olacaq, öz haqları uğrunda mübarizə aparan Yeni Kaledoniya da istədiyinə nail olacaq. Müstəmləkəçiliyə qarşı Fransanın daxilində başlayan mübarizə yəqin ki, Makronun avtoritar idarəçilik sisteminə son qoyacaq.

Elşən QƏNİYEV,

Azərbaycan.-2024.- 19 may, № 104.- S.7.