Xalq tarixinə,
dilinə, dininə, birliyinə, insan isə milli-mənəvi dəyərlərinə, ağlına,
idrakına arxalananda güclü və qüvvətli olur. Son əsrimizin tarixi - Ulu Öndər
Heydər Əliyevin Azərbaycana rəhbərlik
etdiyi illər və cənab İlham Əliyevin Prezident olduğu dövr bunu bir daha təsdiqlədi.
Ümummilli Lider
Heydər Əliyev respublikaya rəhbərliyə
gəldiyi 1969-82-ci illərdə
Azərbaycanı iqtisadi-mənəvi
böhrandan xilas etdi, xalqa milli
kimliyini dərk etdirdi. 1993-cü ildə ikinci dəfə xalqın tələbi və təkidi ilə hakimiyyətə gələrkən isə bir xilaskar kimi
ölkəni parçalanmadan,
vətəndaş müharibəsindən,
ağır bəlalardan,
daha genişmiqyaslı
işğaldan, erməni
təcavüzündən xilas
etdi.
O, əsrin müqaviləsini
imzalamaqla, atəşkəsə
zəmin yaratmaqla, torpaq islahatlarını, mühüm layihələri
həyata keçirməklə
iqtisadiyyatı dirçəltdi,
insanların inamını
özünə qaytardı,
beynəlxalq əməkdaşlığı
öz axarına saldı, siyasətdə, iqtisadiyyatda, mədəniyyətdə,
mənəvi aləmdə
nizam yaratdı, bugünkü inkişafımız
üçün bir zəmin hazırladı.
Cənab İlham
Əliyev isə Ulu Öndərimizin ideyalarına, vəsiyyətlərinə
yeni bir məna verdi, uğurlu, düşünülmüş
siyasi gedişləri ilə xalqımızın
tarixinə heç vaxt unudulmayan, yaddan çıxmayan şanlı səhifələr
yazdı və yazmaqda davam edir.
44 günlük müharibə
və 23 saatlıq antiterror tədbirləri Azərbaycanı dünyaya
qalib, yenilməz, mübariz bir dövlət kimi təqdim etməklə dövlətimizə böyük
inam qazandırdı, qələbəmizə yeni
yollar açdı. Bu, düşünülmüş
siyasətin, haqqın,
ədalətin qələbəsi
idi və cənab İlham Əliyev öz dövlətini ucaltmağı
bacardı.
Hər iki halda - Ulu Öndərimizin
hakimiyyətdə olduğu
illərdə, istərsə
də cənab İlham Əliyevin prezidentliyi dövründə
qazanılan uğurlar
bilavasitə xalqın
birliyinin, həmrəyliyinin
və bu böyük şəxsiyyətlərin
xalqımızın tarixinə,
dilinə, dininə, özlərinə olan inamın nəticəsi idi. Bütün hadisələrdə, gedişlərdə,
uğurlarda xalq birliyi, vətəndaş həmrəyliyi və rəhbər müdrikliyi,
təşkilatçılığı, iradəsi ön xətdə olub və qələbəmizi
təmin edib.
Prezident İlham
Əliyev andiçmə
mərasimində bu baxımdan xalqın birliyinə çox yüksək qiymət verərək demişdir:
"Biz 20 ildə
çətin günlər
yaşasaq da birliyimiz sayəsində uğurlara nail olmuşuq. Sözsüz ki, bu uğurlar
önündə iqtisadi
inkişaf, sosial rifah, ordumuzun möhkəmləndirilməsi durur".
Xalqın öz
rəhbərinə, taleyinə,
gələcəyinə inamı
ən böyük güc və güvəndir. Cənab İlham Əliyev prezident olduğu 20 ildə xalqına, vətəninə, torpağına
olan məhəbbəti
və sədaqəti,
düşmənə qarşı
kəskin mübarizəsi
və qazandığı
uğurlar ilə bu inamı yarada
bilib, xalqın ehtiramını və hörmətini qazanıb.
Dövlətimizin rəhbəri
bunu dəfələrlə
bəyan edib və andiçmə mərasimində bir daha bildirib: "Biz, doğrudan da, bütün dünyaya sübut etmişik ki, böyük xalqıq, biz öz taleyimizi
özümüz heç
kimin köməyi olmadan həll edirik, ölkə qarşısında duran problemləri özümüz
heç kimin köməyi olmadan həll edirik və əsaslı şəkildə həll edirik".
Bu, inkarolunmaz bir həqiqətdir, çünki Azərbaycan
torpaqları 30 ildən
çox erməni təcavüzünə məruz
qalıb, şəhərlərimiz,
kəndlərimiz talan
edilib, insanlarımız
qətlə yetirilib, təcavüzkarlar tərəfindən
xalqımıza qarşı
soyqırımlar həyata
keçirilib, Vətən
müharibəsinə qədər
BMT Təhlükəsizlik Şurasının
erməni silahlı qüvvələrinin işğal
etdikləri torpaqlardan
qeyd-şərtsiz çıxması
haqqında dörd qətnaməsinə, bir çox qərarlara, göstərişlərə əməl
edilməyib, Ermənistan
heç kimə, heç nəyə məhəl qoymayıb. Böyük dövlətlər,
beynəlxalq təşkilatlar
susdular, münaqişəyə
ikili standartlardan yanaşdılar, Azərbaycanı
deyil, əslində, təcavüzkar Ermənistanı
müdafiə
etdilər. Azərbaycanın
taleyinə, xalqımın
ağır vəziyyətinə
acıyanlar az oldu, səsimizə çox ölkədən
səs verilmədi.
"Taleyimizi özümüz
həll etdik" bəyanatını səsləndirməklə
dövlətimizin rəhbəri
demokratiyadan, insan haqlarından, ədalətdən,
ölkələrin suverenliyinə
hörmətdən, təcavüzə,
zülmə nifrətdən
söz açan ölkələrin, beynəlxalq
təşkilatların iç
üzünü, riyakarlığını
bir daha açıb göstərdi,
dövlətimizin suverenliyinə
qəsd etmək istəyənləri eyhamla
xatırlatdı.
Prezidentlik dövründə
Qarabağ torpaqlarının
işğaldan azad edilməsi, separatçıların
ərazilərimizdən birdəfəlik
çıxarılması, viran qoyulan şəhər
və kəndlərimizin
bərpası, köçkünlərin
yurd-yuvalarına qayıtması
Prezidentimizin ali vəzifəsi olmuş və bu vəzifə
bu gün də aktuallığını
qoruyub saxlayır. Düşmən üzərində
tarixi qələbədən
sonra ölkəmizin rəhbəri birinci xanım Mehriban Əliyeva ilə işğaldan azad olunmuş ərazilərə
mütəmadi səfərlər
edir, abadlıq işlərinin gedişi ilə maraqlanır, lazımi tapşırıqlarını
verir. Son illər ərazilərin bərpasına
7 milyard, o cümlədən
bu il üçün
5 milyard manat dövlət vəsaitinin ayrılması görülən
işlərin, quruculuq
tədbirlərin əhatəsinin
nə qədər geniş olduğunu aydın göstərir. Artıq Füzulidə, Zəngilanda, Şuşada,
Laçında həyat
canlanır, insanlar doğma yurdlarına köç edib məskunlaşırlar. İnsanların
təhlükəsizliyinin təmin
edilməsi məqsədilə
tədbirlər gücləndirilir.
İşğaldan azad
olunmuş ərazilər,
o cümlədən yaşayış
məntəqələri mina
və partlamamış
hərbi sursatlardan təmizlənir. Azərbaycanın
dünyada mövqelərini
daha da möhkəmləndirmək,
ölkəmizi Cənubi
Qafqazda güc mərkəzinə çevirmək
və regionda sülhün, əmin-amanlığın,
əməkdaşlığın təminatçısı kimi
şöhrətləndirmək, qarşıya qoyulan milli strateji hədəflərin reallaşmasını
təmin etmək, işğaldan azad edilmiş ərazilərdə
nümunəvi həyat
şəraiti və iqtisadi mühit yaratmaq cənab İlham Əliyevin fəaliyyətinin ana xəttidir. Ölkə rəhbəri andiçmə
mərasimində qarşıda
duran vəzifələrin
aliliyinə, möhtəşəmliyinə
diqqəti cəlb edərək demişdi:
"İndi yeni dövr başlayır. Biz bu dövrə
alnımız açıq,
üzümüz ağ,
başımız dik daxil oluruq. Bu
dövrün böyük
nailiyyətləri olacaq,
mən buna şübhə etmirəm".
Dövlət başçımız
bu böyük nailiyyətlərin qazanılmasında
yenə də xalqın birliyinə arxalanır, öz gücümüzə inamı
diqqətə çatdırır
və birlik, həmrəylik sayəsində
bütün çətinliklərin
aradan qaldırılacağına
ümidvar olduğunu bildirir.
Cənab İlham
Əliyevin 14 fevral tarixində andiçmə
mərasimindən sonra
prezident kimi səlahiyyətlərinin icrasına
başladığı zamandan
keçən 100 gün
ərzində əldə
olunan sevindirici nəticələr bu reallığı təsdiq
edir. Bu günlər Azərbaycan Prezidenti üçün çox vacib və əhəmiyyətli,
təxirəsalınmaz məsələlərin
həlli baxımından
yaddaqalandır. Cənab
İlham Əliyev prezident seçildikdən
sonra ənənəvi
olaraq ilk səfərini qardaş Türkiyə Respublikasına
etdi. Torpaqlarımız
düşmən işğalı
altında olan bütün illərdə
bizimlə bir olan türk xalqını, Türkiyə
dövlətinin rəhbərlərini
salamladı, sevincini onlarla bölüşdü,
gələcək planlar
barədə fikir mübadilələri aparıldı,
görüşlər keçirildi,
O, Türk Dövlətləri
Təşkilatının zirvə
toplantısına qatıldı.
Dövlətimizin başçısı
andiçmə mərasimində
səsləndirdiyi "Bizim
başqa ailəmiz yoxdur. Bizim ailəmiz
türk dünyasıdır.
Biz özümüzü
çox yaxşı hiss edirik. Biz
müştərək səylərlə
elə etməliyik ki, Türk Dövlətləri
Təşkilatı qlobal
arenada önəmli faktora və güc mərkəzinə
çevrilsin" fikirlərini
zirvə toplantısında
müxtəlif formalarda
təkrarladı və
bu təşkilatın
gələcəyinə ümidlə
baxdığını bildirdi.
Son yüz gün ərzində Azərbaycan Prezidentinin bir sıra ölkələrə
səfərləri olub,
həmçinin bir çox dövlətlərin
siyasi xadimləri, nümayəndə heyətləri,
ölkə rəhbərləri
ilə görüşləri
keçirilib. Keçirilən
mötəbər görüşlərin,
mühüm tədbirlərin,
görülən uğurlu
işlərin təşkilatçısı
və istiqamətvericisi,
əlbəttə ki, cənab İlham Əliyevdir. Bütün səfərlərin, tədbirlərin
əsasında isə
xalqımızın milli
maraqları, iqtisadi inkişafımızın təmin
edilməsi, dövlətimizin
nüfuzu və dünyada tanıdılması
durur. Ermənistanla sülh müqaviləsinin
imzalanmasına nail olunması, sərhədlərimizin
dəqiq müəyyənləşdirilməsi,
dünyada əmin-amanlığın,
təhlükəsizliyin təmin
edilməsi, ölkələrin
suverenliyinə hörmətlə
yanaşılması cənab
İlham Əliyevin fəaliyyətinin əsas
istiqamətidir və bu xətt uğurla
davam etdirilir.
Prezidentimiz beynəlxalq
normalara əsaslanmaqla,
reallıqları qiymətləndirməklə,
dünyada baş verən hadisələri yaxından izləməklə
vaxtında lazımi nəticələrə gəldiyi
üçün dövlətimiz
uğurlarını artırır
və bu gün regionda əsas söz sahibidir. Dünyanın sülhsevər ictimaiyyəti
Prezidentimizin sülh çağırışlarını rəğbətlə qarşılayır,
regionda yaşayan insanlar onu dəstəkləyirlər.
Dövlətimizin rəhbəri
Cənubi Qafqazda sülhün təminatçısı
kimi çıxış
edərək Fransanın,
Avropa ittifaqının
regiona yönəlmiş
çirkin niyyətlərini
cəsarətlə rədd
edir, məkrli siyasətə qarşı
yorulmadan mübarizə
aparır və qətiyyətlə bildirir:
"Həm Azərbaycan
xalqına, həm də bu bölgəyə maraq göstərənlərə
bir daha demək istəyirəm ki, bizimlə hesablaşmadan burada bir addım da atılmamalıdır bundan sonra. Əminəm
ki, mənim sözümü eşidirlər,
bilirlər mən nəyi deyirəmsə, onu da edirəm".
Həqiqətən də
cənab İlham Əliyev sözünə,
vədinə əməl
edən rəhbərdir.
O, "torpaqlarımızı azad edəcəyik, erməni faşistlərinin
ayağını Qarabağdan
kəsəcəyik, haqq-ədalət
bərpa olunacaq, iqtisadiyyatımızı, xalqın
rifahını yüksəldəcəyik,
Qarabağı yenidən
quracağıq, suverenliyimizə
tam nail olacağıq, heç kimə baş əyməyəcəyik, Avropanın
enerji təhlükəsizliyinə
dəstək verəcəyik,
ölkələrlə əməkdaşlığı
möhkəmləndirəcəyik" mesajlarını verdi və sözünü imzası ilə təsdiq etdi.
Prezidentin seçkidən
sonrakı 100 günlük
fəaliyyəti çoxşaxəli,
səmərəli və
uğurludur. Türkiyəyə,
Almaniyaya, Rusiyaya səfərləri zamanı
dövlətimizin rəhbəri
dünyanı və Azərbaycanı narahat edən bir çox
qlobal problemi gündəmə gətirib
və milli maraqlarımıza uyğun
məsələlərin həllində
sağlam münasibətlərin
qurulmasına, əməkdaşlığın
möhkəmləndirilməsinə, dövlətlərin suverenliyinə
hörmət edilməsinə
nail olub. Prezidentimiz 100 gün ərzində 100-dən çox
mötəbər qonaqla
- dövlət rəhbəri,
baş nazir, beynəlxalq təşkilatların
nümayəndəsi, görkəmli
ictimai siyasi xadimlə görüşüb,
60-dan çox xarici ölkənin nümayəndə
heyətini qəbul edib, 25 təməlqoyma və açılış
mərasimində iştirak
edib, mətbuata çoxsaylı müsahibələr
və bəyanatlar verib. Yalnız Münxenə səfəri
zamanı iki gün ərzində 24 görüş keçirməsi
ölkə rəhbərinin
iş qrafikinin nə qədər sıx və gərgin olduğunu göstərir.
Cənab Prezidentin
son 100 günlük fəaliyyəti bir daha göstərir ki, o Heydər Əliyevin bəşəri
ideyalarına sadiqdir, daim xalqı ilə birdir. İnsanların rifah halının yaxşılaşdırılması,
ölkənin müdafiə
qüdrətinin yüksəldilməsi,
ordunun gücləndirilməsi
rəhbərimizin ali məqsədidir. Rəhbər
daimi olaraq işğaldan azad olunmuş kəndlərimizdə,
şəhərlərimizdə görülən işləri
nəzarətdə saxlayır,
yeni obyektlərin açılışını edir, bir çoxlarının
təməlini qoyur, insanlarla görüşür,
xarici qonaqların, səhmdarların diqqətini
Qarabağa yönəldir
və xalqımızın
niyyətini dünyaya
bəyan etməklə
yeni uğurlara, perspektivlərə yollar açır. Bu yollar bəşəriyyətin
azadlıq mübarizəsindən,
dünyada haqqın-ədalətin
bərpa edilməsindən,
ciddi qlobal problem olan iqlim
dəyişikliklərinin qarşısının
alınması istiqamətində
ardıcıl siyasətin
aparılmasından, ətraf
mühitin qorunmasına
münasibətin genişləndirilməsindən,
COP29 kimi əhəmiyyətli
tədbirlərə daim
dəstək verməsindən
keçir.
Cənab İlham
Əliyev ölkələri
azad, xalqları xoşbəxt, insanları
firavan görmək üçün səylərini
əsirgəməyən, bəşəriyyətin
qayğıları ilə
yaşayan və dünyaya daim sülh çağırışları
edən bir dövlət rəhbəri,
siyasi liderdir. Prezidentimizin əlamətdar
hadisələrlə, səfərlərlə,
görüşlərlə, danışıqlarla tarixiləşən
və xalqımızın
xoşbəxt gələcəyinə
xidmət edən, prezident seçildikdən
sonra keçən 100
günlük fəaliyyəti
buna parlaq nümunədir.
Tahir RZAYEV,
Milli Məclisin
Aqrar siyasət komitəsinin sədri
Azərbaycan.-2024.-
24 may, № 108.- S.8.