Dövlət və millət həyatının yeni erası

2024-cü il dünya miqyasında 78 ölkədən 83 milli seçkilərin keçirilməsi ilə indiyə qədərki dövrlərdən fərqləndiyini göstərdi. Azərbaycan da məhz bu qlobal tendensiyaları nəzərə alaraq dövlət və millət həyatını yeni erada gördü.

Əslində, Vətən müharibəsindən sonra Prezident İlham Əliyevin liderliyi ilə həyata keçirilən siyasət bir ölkə və millət çərçivəsinə sığmırdı. Biz bunu regionüstü xarakterdə qəbul etməliyik.

Qarabağ məsələsi heç vaxt yalnız iki dövlət arasında konflikt xarakteri daşımayıb. İndiki halda Qafqazlardan başlayan prosesin dünya çapında necə yayıldığını gördük.

Vətən müharibəsi qeyri-rəsmi, elan olunmamış bir seçkilər prosesi idi. Əgər xalq birinci şəxsə, öz liderinə etibar etməsə, nə xalqın səfərbərliyi baş verər, nə də savaş qazanılar. Yalnız silahlı qüvvələr vasitəsilə hərbi meydanlarda uğur qazanmaq olmur. Digər tərəfdən nəzərə almalıyıq ki, ötən illər ərzində Azərbaycan Ordusunun gücü, hərbi arsenalı təkmilləşdirilib. Ona görə də son 4 ilə yaxın zaman arealına təqvimimizin bizə faciələri unutduran, əcdadlarımızdan miras qalan ağrıları ortadan qaldıran dövr kimi yanaşırıq. Necə ki, müsəlman aləminin özünəməxsus təqvimi var, bu da bizim üçün uğur, qələbə olmaqla yanaşı, fərqli siyasi eranın başlanğıcı idi. Yalnız 44 günlük savaş deyil, sorakı dövrdə Laçında nəzarət-buraxılış məntəqəsinin açılması, Laçın yolunda etirazçıların keçirdiyi dinc aksiya, sonda Xankəndi üzərində suverenliyimizin bərqərar olması ilə Azərbaycan ilk dəfə konstitusion milli iradəsini gerçəkləşdirə bildi.

Prezident seçkilərinin müəyyən qədər irəli çəkilməsi bir tərəfdən də bu bütövlüyümüzün diktəsi idi. 1991-ci ildə azadlığımıza qovuşanda faktiki olaraq coğrafi tamlığı yaşamırdıq. Bu, yalnız ərazi deyil, həm də mənəvi, siyasi məsələ idi. Ona görə də ölkə rəhbərinin bu çağırışı millətimiz tərəfindən alqışla, anlayışla qarşılandı. 7 fevral prosesi özlüyündə yalnız hansısa namizədlər arasında siyasi mübarizənin bir turu kimi görünmədi, həm də bütövlükdə bir millət paradına çevrildi. İnsanlar əvvəlki dövrlərdə bəlkə də müxtəlif səbəblərdən seçki məntəqələrinə getməmişdisə, bu seçkilərdə hər kəs öz iradəsini ifadə edəcəyini vurğulayırdı. Bunun seçkidən daha üst məna daşıdığı görünməkdə idi.

Ötən 100 gün ərzində Azərbaycan həyatı da kifayət qədər dinamik və mühüm hadisələrlə zəngin olub. Bir tərəfdən, Azərbaycan-Ermənistan müharibəsindən sonrakı qalibiyyətimizi delimitasiya və demarkasiyaya qədər daşımışıq. Eyni zamanda Qarabağ coğrafiyasından xeyli uzaqda yerləşən 4 kəndin geri qaytarılması 100 günün ən parlaq siyasi, mənəvi, hərbi, milli hadisəsidir. İkinci tərəfdən, ölkə rəhbərinin ilk rəsmi səfərinin Türkiyəyə olması, bu səfər çərçivəsində keçirilmiş qarşılıqlı görüşlər Azərbaycanın xarici siyasətində yenə qardaş ölkənin və onun liderinin müstəsna yerinin olduğunu göstərdi. Hər iki dövlət başçısının regional proseslərdə vahid mövqeyi artıq bizə qarşı müxtəlif planlarını, təzyiqlərini yönəltməyə çalışan dairələrin də maraqlarına zərbə vurdu. Üçüncüsü, ölkəmiz bu müddətdə mühüm tədbirlərə evsahibliyi edib. Bu zaman ərzində Rusiya sülhməramlılarının Qarabağı dinc formada tərk etməsi gerçəkləşib. Tarixdə bunun bənzəri yoxdur. Hesab edirəm ki, İlham Əliyevin siyasi sərkərdəliyi yalnız Azərbaycan xalqı üçün deyil, Qafqaz və subregion üçün də məna daşıyır.

Azərbaycanın Fransa və digər dövlətlərin timsalında təsirlərinə, təzyiqlərinə cavab verməsi də 100 günün - yeni dövrün xüsusi mərhələsi kimi xarakterizə oluna bilər. Bundan başqa, bu il COP29 kimi mühüm tədbirə evsahibliyi edəcəyik. Bu, indiyə qədərki heç bir tədbirlə müqayisə oluna bilməz. O mənada ki, iqtisadiyyatımız, ekologiya, alternativ enerji sektoru, biznes strukturlarının xaricə açılması baxımından misli görünməmiş hadisədir, fürsətdir. Əminəm ki, dövlətimiz, xalqımız bunu yüksək dəyərləndirəcək.

Bir sözlə, dövlət başçısının siyasi qərarları, addımları kifayət qədər dinamik və çevikdir. 10 may tarixində Prezidentin azad olunmuş torpaqlara növbəti sistemli səfəri artıq o məkanın həm də siyasi paytaxt olması kimi dəyərləndirilir. Bütün dövlət rəhbərlərinin ölkəmizə gəlişində dövlət başçımızla həmin ərazilərə səfəri İlham Əliyev protokoludur. Bu yalnız dövlət siyasəti, hansısa xarici ölkə rəhbərinə görə uyğunlaşdırılmış hadisə deyil, Azərbaycan dövlətinin və onun rəhbərinin iradəsidir. Müqəddəs məkan olan Şuşaya ilk köçənlərin qayıdışını qeyd etmək, onlara xeyir-dua vermək, tariximizi bir daha göz önünə gətirmək, gələcəklə bağlı çağırışlar etmək, ayrı-ayrı dövlətlərin hücumunun siyasi informativ baxımdan qarşısını almaq, o cümlədən yeni açılışlar, təməlqoyma mərasimləri Prezident İlham Əliyevin uğurlu siyasətinin nəticəsidir. "Xarıbülbül" festivalı, mədəni diplomatiyamızın ən ayrılmaz hissəsinə çevrilən addımların atılması bir daha göstərir ki, İlham Əliyevin liderliyi Azərbaycan xalqının qızıl dövrüdür. Ölkə rəhbərinin bütün hakimiyyət orqanları qarşısında qoyduğu əsas tələb vətəndaş maraqlarının təmin olunmasıdır. Yəni hərbi meydandakı zəfərimizi sosial, təhsil, səhiyyə və digər bütün sahələrə daşımaq lazımdır. Prezidentin baxışları, kursu, tələbləri, seçdiyi yol xəritəsi, strategiya bundan ibarətdir. Azərbaycan xalqı öz liderinin rəhbərliyi altında bundan sonra da böyük qələbələrə nail olacaq. Biz zəfər ölkəsi, zəfər xalqıyıq. Bu Zirvə hərəkatı daha da irəliyə gedəcək.

Zahid ORUC,

Milli Məclisin İnsan hüquqları komitəsinin sədri, Sosial Tədqiqatlar Mərkəzi İdarə Heyətinin sədri

Azərbaycan.-2024.- 24 may, № 108.- S.8.