Yeni tarixi mərhələnin başlanğıcı

Bu il fevralın 7-də keçirilən prezident seçkilərində Azərbaycan xalqı yekdilliklə cənab İlham Əliyevi dəstəklədi. Bu, seçkilərdən daha çox xalqın öz liderinə minnətdarlığını ifadə etmə imkanı kimi qiymətləndirilə bilər.

Azərbaycan xalqı torpaqlarımızın erməni işğalından azad olunacağı günü həsrətlə gözləyirdi. 2020-ci ilin sentyabr-noyabrında Azərbaycan Ordusu Ali Baş Komandan, Prezident İlham Əliyevin rəhbərliyi altında torpaqlarımızı 44 gün ərzində erməni işğalından azad etdi. Azərbaycan dövlətinin ərazi bütövlüyünü təmin etməsi istiqamətində çoxvektorlu addımları haqqında aydın təsəvvürlər mövcud idi. 2020-ci ilə qədər Prezident dünyanın ən mötəbər tribunalarından çağırış edirdi ki, Ermənistana təzyiqlər olunsun və o, Azərbaycan torpaqlarından geri çəkilsin. Lakin gözlədiyimiz nəticəni görmürdük. Belə olan halda hərbi yolla ərazilərimizi işğaldan azad etdik. Bununla İlham Əliyev həm də Azərbaycan dövlətini, xalqını qalib kimi dünyaya tanıtdı. Dünya gördü ki, Azərbaycan dövlətinin hərbi gücü ölkənin ərazi bütövlüyünü bərpa etməyə imkan verir. Buna baxmayaraq, biz uzun illər keçmiş münaqişənin dinc yolla aradan qaldırılmasına çalışırdıq. Çünki biz sülhsevər xalqıq, regionda təhlükəsizlik məsələsinə hər zaman həssas yanaşmışıq.

Azərbaycan dövləti olduqca güclü, eyni zamanda sülh tərəfdarı olan bir ölkədir. Bunu İlham Əliyev dünyaya bir daha göstərdi. Azərbaycan xalqı qısa zaman kəsiyində bütün tarixinin ən böyük uğurlarını qazandı və bu uğurları bizə Prezident İlham Əliyevin olduqca unikal strateji baxışları, dəqiqliklə ölçülmüş addımları yaşatdı.

Bu baxımdan prezident seçkiləri bizim yeni reallıqlarımızın sifarişi idi. Biz bir mərhələni, Prezidentin də qeyd etdiyi kimi, uğurla başa vurduq. Tarixi inkişafımızın yeni mərhələsinə başladıq və bu mərhələdə də qarşımıza yeni inkişaf hədəfləri qoyduq. Sözsüz ki, hədəfləri müəyyənləşdirmək mümkündür, amma bu hədəflərə çatmaq üçün resurslar tələb olunur. Odur ki, əvvəlki mərhələlərdə gələcək məqsədlərimizə çatdıracaq real resurslar potensialını formalaşdırmışdıq.

Prezident yeni mərhələ üçün bütün zəruri şərtləri artıq təmin edib. Ona görə də prezident seçkilərindən ötən zaman ərzində məqsədlərimizə doğru sürətlə irəliləyirik. Bu məqsədlərdən ən əsası işğaldan azad olunmuş ərazilərimizin yenidən qurulması və həmin ərazilərdə keyfiyyətli məskunlaşmanın həyata keçirilməsidir. Həmin istiqamətdə olduqca sistemli, ardıcıl addımlar atılır, ərazilərimizin siması günbəgün dəyişir. Ölkə rəhbərinin vurğuladığı kimi, azad etdiyimiz ərazilərimizi sürətlə və keyfiyyətlə dünyanın ən cazibədar bölgələrindən birinə çevirməkdəyik. İstər nəqliyyat kommunikasiya infrastrukturu olsun, istərsə də ümumi təhlükəsizliyin etibarlı təmin edilməsi, istər əhalinin yerləşdirilməsi və məşğulluğun təmin olunması olsun, istərsə də regionun təbii potensialından istifadə - bütün istiqamətlərdə kompleks addımlar atılır, tədbirlər görülür.

Cənab İlham Əliyevin Prezident kimi səlahiyyətlərinin icrasına başlamasından ötən 100 gün ərzində gördüyü böyük və gələcəyimiz üçün əhəmiyyət kəsb edən işlər göz önündədir. Soydaşlarımızın işğaldan azad olunan ərazilərə sistemli şəkildə köçürülməsi davam edir. Azərbaycanın beynəlxalq münasibətlər sistemində yeri və rolu daha da möhkəmlənir. Ötən 100 gün ərzində müxtəlif istiqamətlərdə beynəlxalq əməkdaşlığın genişləndirilməsi üçün təsirli addımlar atılıb. Prezident müxtəlif xarici səfərlərdə olub. Hər zaman görmüşük ki, Azərbaycan Prezidentinə çox böyük ehtiram var, ölkəmizlə əməkdaşlıq etmək istəyən dövlətlər çoxdur. Azərbaycana müxtəlif ölkə rəhbərlərinin səfərləri baş tutur və bir qayda olaraq işğaldan azad olunmuş ərazilərimizə yüksək rütbəli xarici qonaqlar səfər edirlər. Onlar həmin ərazilərdə bərpa-quruculuq işləri ilə tanış olur və öz heyranlıqlarını gizlətmirlər.

Ötən 100 gün ərzində hər bir Azərbaycan vətəndaşı növbəti dəfə əmin oldu ki, olduqca düzgün seçim edib. Tarixi inkişafımızın yeni mərhələsində daha böyük hədəflər bizi gözləyir. Prezidentin müxtəlif istiqamətlərdə atdığı addımlar isə gələcək böyük uğurlarımızdan soraq verir.

Elşad MİRBƏŞİROĞLU,

Milli Məclisin deputatı

Azərbaycan.-2024.- 24 may, № 108.- S.10.