Müxalifət Prezidentin son 100 günlük fəaliyyətni yüksək qiymətləndirir:

Azərbaycan naminə missiya

Prezident İlham Əliyevin dövlət rəhbəri vəzifəsində fəaliyyətinin 100 günü tamam olur. Məlumdur ki, bir çox dünya ölkəsində prezidentin 100 günlük işinə ictimai-siyasi qiymət verilir. İlk olaraq onu deyə bilərəm ki, bu müddət ərzində Azərbaycan Prezidenti əvvəlki dönəmlərdə olduğu kimi, çoxtərəfli, aktiv fəaliyyət göstərib və çoxvektorlu siyasət sərgiləyib.

Bir məsələni xüsusi olaraq vurğulamalıyıq ki, 7 fevral 2024-cü il prezident seçkiləri müstəqil Azərbaycanın bütün suveren ərazilərini əhatə etməklə keçirilən ilk seçkilər olub. Təbii ki, 30 ilə yaxın müddətdə işğal altında qalan ərazilərimizin azad edilməsi də bilavasitə Ali Baş Komandan İlham Əliyevin Vətən qarşısında müstəsna xidməti kimi dəyərləndirilir.

Qürurverici haldır ki, 44 günlük İkinci Qarabağ savaşında qazandığımız möhtəşəm qələbəmizdən sonrakı dövr ərzində Xankəndi daxil olmaqla, digər ərazilərimiz də Azərbaycanın nəzarətinə keçərək separatizmə son qoyuldu və torpaqlarımız terrorçulardan birdəfəlik təmizləndi. Bununla da dünyada separatizmə və terrorçuluğa son qoyulmasının Azərbaycan nümunəsi yaradıldı. Bu, ilk növbədə Azərbaycanın regionda əsas söz və güc sahibinə çevrilməsinin və müstəqil siyasət yürütməsinin bariz nümunələridir. Sirr deyil ki, istər regional, istərsə də qlobal güclərin bölgədə iqtisadi, siyasi və hərbi maraqları var və mövcud reallıqlara rəğmən ölkəmizin müstəqil siyasət yürütməklə hazırkı nailiyyətləri əldə etməsi bilavasitə Azərbaycan Prezidentinin yürütdüyü çoxvektorlu uğurlu xarici siyasət sayəsində mümkün olub.

İlham Əliyevin növbəti dəfə prezident seçilməsindən sonra rəsmi olaraq vəzifəsinin icrasına başladığı andiçmə mərasimindən keçən 100 gün ərzində görülən işlərə gəldikdə isə ilk növbədə Azərbaycana məxsus olan və 30 il ərzində işğal altında qalan Qazax rayonunun 4 kəndinin danışıqlar yolu ilə geri qaytarılmasının, həmçinin Rusiya hərbi kontingentinin vaxtından xeyli əvvəl ölkəmizi tərk etməsinin ən diqqətçəkən və əhəmiyyətli hadisələr olduğu qənaətindəyəm. O cümlədən əvvəlki üç il ərzində olduğu kimi, bu dövr ərzində də işğaldan azad olunmuş ərazilərdə abadlıq və yenidənqurma işləri tam gücü ilə aparılmaqdadır. Beynəlxalq standartlara uyğun avtomobil və dəmir yolu xətləri çəkilməkdədir. İşğaldan azad edilmiş Füzuli, Xocavənd, Xocalı və Şuşa rayonlarını birləşdirən Əhmədbəyli-Füzuli-Şuşa avtomobil yolu, Hacıqabul-Horadiz-Ağbənd-Zəngəzur dəhlizi magistral avtomobil yolu, eləcə də rayonlararası, şəhərlərarası müasir avtomobil yollarının çəkilməsi, yol qovşaqlarının, tunel və körpülərin tikintisi görülən işlərin miqyasını göstərir. Həmçinin azad edilən ərazilərdə su anbarları, dəmir yolları, məktəblər, xəstəxanalar, sosial və digər təyinatlı obyektlərin tikintisi davam edir, bəziləri artıq istifadəyə verilib. Şuşaya, Zəngilana, Laçına, Füzuliyə və digər azad və abad olmuş yaşayış məntəqələrinə Böyük qayıdışın başlanması və sürətlə davam etməsi ilə yanaşı, doğma yurdlarına qayıdan keçmiş köçkünlərin məşğulluğu ilə bağlı da müvafiq qurumlar ciddi işlər görürlər. Yerlərdə yeni istehsalat sahələri, sənaye müəssisələri yaradılır və bu işlər gələcəkdə də davam etdiriləcək.

Yeni infrastruktur layihələrinin gerçəkləşməsi və bu prosesə qardaş Türkiyə Cümhuriyyəti ilə yanaşı, digər qardaş türk dövlətlərinin, eləcə də dost ölkələrin cəlb edilməsi Azərbaycanın gücünü, qüdrətini bütün dünyaya göstərir. Dost və qardaş ölkələr tərəfindən Azərbaycanın işğaldan azad edilmiş rayonlarında reallaşdırılan layihələr dövlətlərimiz arasında dostluq rəmzinə çevrilib. Özbəkistan və Qazaxıstan Füzulidə iki məktəbin tikintisi ilə bağlı qardaş dəstəyi göstəriblər. Ötən ay Qırğızıstan Prezidenti Sadır Japarov Azərbaycanda rəsmi səfərdə olarkən məlum oldu ki, bu ölkə də Azərbaycanın işğaldan azad olunmuş ərazilərində tikinti-quruculuq işlərində iştirak edəcək və qardaş Qırğızıstan Qarabağda məktəb tikintisində iştirak edən üçüncü ölkə olacaq. Bu onu göstərir ki, Qarabağ zəfəri regionda türk dövlətləri üçün həm də yeni iqtisadi imkanlar yaradıb.

Bir sözlə, görülən və görüləcək işlər kifayət qədərdir və mən növbəti dəfə vəzifələrinin icrasına başladığı andiçmə mərasimindən keçən 100 gün ərzində Prezident İlham Əliyevin fəaliyyətini yüksək qiymətləndirməklə yanaşı, ona Azərbaycan naminə gələcək fəaliyyətində yeni uğurlar arzulayıram.

Arzuxan ƏLİZADƏ,

Azərbaycan Milli İstiqlal Partiyasının sədri

Azərbaycan.-2024.- 24 may, № 108.- S.10.