Müasir Azərbaycan
dövlətinin həyatında
yeni tarixi mərhələ başlayıb.
Fevralın 7-də keçirilmiş
prezident seçkilərində
cənab İlham Əliyev parlaq qələbə qazanmaqla ölkəmizin yeni dövr üçün hədəflərini müəyyən
etdi. Xalqımızın
bu seçkilərdə
yüksək əhvali-ruhiyyə
ilə iştirak edərək Heydər Əliyev siyasətinin davamına, Prezident İlham Əliyevin liderliyi ilə yeni qələbələrə
səs verməsində
məhz bu amil mühüm rol oynadı.
Ən önəmli
məqam isə seçkilərin ilk dəfə olaraq müstəqil Azərbaycanın
öz ərazisi üzərində suverenliyini
tam bərpa etməsi şəraitində
keçirilməsi idi.
Beləliklə, qalib xalq ərazi bütövlüyü və
suverenliyi təmin olunmuş ölkənin vətəndaşı olaraq
qalib Liderinə - şanlı Zəfərin
müəllifinə səs
verməklə Heydər
Əliyev ideyalarına
sədaqət, cənab
İlham Əliyevə
minnətdarlıq ifadə
etdi.
Mayın 24-də Prezident
İlham Əliyevin yeni mərhələdə
dövlət başçısı
səlahiyyətinin icrasına
başlamasının 100-cü günü tamam olur. Yüz gün ərzində də Azərbaycan xalqı olaraq tarixi hadisələr yaşamışıq. Bu
gün dünyada etibarlı tərəfdaş
kimi tanınan Azərbaycan bir çox ölkə, o cümlədən qonşularla
müxtəlif platformalarda
əməkdaşlıq əlaqələri
quraraq mövcud münasibətlərini daha
da möhkəmləndirir.
Prezident İlham
Əliyevin uğurlu siyasəti nəticəsində
Azərbaycanın 155 dövlətin
dəstəyi ilə
BMT Təhlükəsizlik Şurasına
qeyri-daimi üzv seçilməsi, 120 dövlətin
təmsil olunduğu Qoşulmama Hərəkatına
sədrlik etməsi, habelə dünya ölkələrinin ən
böyük beynəlxalq
konfransı - COP29-un Bakıda
keçirilməsi haqqında
yekdil qərar qəbul edilməsi ölkəmizin dünya miqyasındakı artan nüfuzunun göstəricisidir.
Qarşıdakı əsas
hədəflərdən biri
isə türk dövlətləri ilə
birliyi daha da gücləndirməkdir.
Qazanılan uğurların
zirvəsini təbii ki, işğal altındakı torpaqlarımızın
azad olunması, ərazi bütövlüyümüzün
bərpası ilə nəticələnmiş Vətən
müharibəsi, ən
nəhayət, 2023-cü ilin
sentyabrında Qarabağda
erməni separatizminin kökünün kəsilməsi
ilə suverenliyimizin təmin olunması təşkil edir. Öz lideri ətrafında "dəmir
yumruq" kimi birləşən xalq gücünü və qələbə əzmini
bütün dünyaya
nümayiş etdirdi. Prezident, Müzəffər
Ali Baş Komandan bu qələbə
ilə Azərbaycanı
qalib ölkəyə,
xalqı qalib xalqa çevirdi. Azərbaycanın qazandığı
misilsiz uğurların
təməlində də
məhz xalq-iqtidar birliyi dayanır. Fevralın 14-də Prezident
İlham Əliyev andiçmə mərasimində
çıxışı zamanı
bu məqamları xüsusi vurğulayıb.
Hazırda Azərbaycan
Cənubi Qafqazda sülhün təmin olunması istiqamətində
təşəbbüslər göstərir. Aprelin 19-da
Azərbaycanla Ermənistan
arasında Qazax istiqamətində sərhədlərin
delimitasiyası ilə
bağlı razılığın
əldə olunması
cənab Prezidentin 100 gününün ən mühüm hadisələri
sırasındadır. Xüsusilə
Qazaxın uzun illər işğal altında olmuş dörd kəndinin dinc yolla geri
qaytarılması növbəti
zəfərimizdir. Dövlətimizin
başçısı 100 gün
ərzində milli maraqlarımıza uyğun
olaraq daxili və xarici siyasət yürüdərək
təhlükəsizliyimizin təmin olunması məqsədilə ordumuzun
daha da gücləndirilməsi,
əhalinin sosial rifahının artırılması,
iqtisadiyyatın inkişafı
istiqamətində mühüm
addımlar atıb. Ən əsas məqamlardan biri isə işğaldan
azad edilmiş ərazilərimizin bərpası
və yenidən qurulmasıdır. Məlumdur
ki, Ermənistan təxminən 30 il ərzində işğal
altında saxladığı
ərazilərimizi xarabalığa
çevirib, burada qanunsuz iqtisadi fəaliyyət həyata keçirib və sərvətlərimizi talayıb.
Qarşı tərəf
hesab edirdi ki, Azərbaycan həmin əraziləri bərpa edib məskunlaşdırma həyata
keçirə bilməyəcək
və yaxud buna onilliklər lazım gələcək.
Ancaq qalib Azərbaycan işğaldan
azad etdiyi ərazilərin bərpasına
müharibə başa
çatandan dərhal
sonra başladı. Həmin ərazilərə
Böyük qayıdışın
təmin edilməsi indiki strateji mərhələdə ölkəmizin
beş milli prioritetindən biri kimi müəyyənləşdirilib.
Azərbaycan dövləti
azad edilmiş ərazilərin məskunlaşdırılmasını
tez və layiqli şəkildə həyata keçirmək əzmini nümayiş etdirir. Prezident İlham Əliyevin siyasi iradəsinə uyğun olaraq postmüharibə dövründə
Qarabağ və Şərqi Zəngəzur
iqtisadi rayonları böyük tikinti meydanına çevrilib. Xarabalıqlar üzərində
yeni şəhərlər,
kəndlər ucaldılır.
Biz şəhərlərimizi,
kəndlərimizi yenidən
qururuq və artıq 6 mindən çox keçmiş məcburi köçkün
doğma torpaqlarına
qayıdıb.
Prezident İlham
Əliyev andiçmə
mərasimində də
bəyan etmişdi ki, önəmli vəzifə Qarabağ və Şərqi Zəngəzurun bərpa edilməsidir: "Deyə
bilərəm ki, burada görülən işlər azad edilmiş torpaqlara gələn hər bir qərəzsiz xarici qonağı valeh edir. Çünki
bu dərəcədə
dağıntılardan sonra
bu sürətlə bərpa işlərinin aparılması, yəqin ki, tarixdə görünməmiş bir
hadisədir".
Dövlət başçısının
yeni mərhələdə
son yüzgünlük
fəaliyyətində də
bu amil müstəsna
yer tutur. Qarabağın incisi, qədim şəhərimiz,
qəhrəmanlıq rəmzi
olan Şuşa şəhərinə sakinlərin
qayıdışının reallaşması da son yüz günün
mühüm hadisələri
sırasındadır. Ümumilikdə
isə dövlətimiz
tərəfindən ilin
sonuna qədər azad olunmuş 5 şəhərə və
15 kəndə 20 min keçmiş köçkünün
qayıdışının təmin edilməsi nəzərdə tutulur. Bütün bunlar təsdiqləyir ki, yeni mərhələdə
Azərbaycanı yeni-yeni
zəfərlər gözləyir.
Xalqımız Prezident
İlham Əliyevin liderliyi ilə ölkəmizin bundan sonra da möhtəşəm
nailiyyətlər qazanacağına
əmindir!
Pərvin
KƏRİMZADƏ,
Milli Məclisin
deputatı
Azərbaycan.-2024.-
24 may, № 108.- S.11.