Yekaterina NADOLSKAYA: "Bakıda gördüklərimdən heyrətlənmişəm"

Bakıda "Fintex Sammit 2024" (Maliyyə və Texnologiyalar Expo) sammiti başa çatıb. Forum Azərbaycan Banklar Assosiasiyası, Azərbaycan Respublikasının Mərkəzi Bankı, Rəqəmsal İnkişaf və Nəqliyyat Nazirliyi, İqtisadi İslahatların Təhlili və Kommunikasiya Mərkəzi, Maliyyə Monitorinqi Xidməti, Azərbaycan Fintex Assosiasiyasının dəstəyi ilə keçirilib. Sammit bütün maraqlı tərəflərin bir araya gələrək yeni fikirlər, təcrübələr bölüşdüyü, öz məhsullarını təqdim etdiyi, işgüzar əlaqələr qurduğu və maliyyə texnologiyaları, rəqəmsallaşma, ödəniş ekosisteminin dərin mövzularının birlikdə müzakirə olunduğu bir platforma olaraq özünü təsdiqləyib. "Fintex Sammit" Azərbaycandakı bütün bank rəhbərlərinin iştirak etdiyi yeganə maliyyə-bank tədbiridir.

Forum "Bank və maliyyə ekosistemində yeni trendlər: İnnovativ həllər, finteks və təhlükəsizlik" mövzusunu əhatə edib.Tədbirdə müzakirələr 8 panel çərçivəsində aparılıb. Müxtəlif ölkələrdən 45 məruzəçi, 300-ə yaxın tərəfdaş və iştirakçı şirkət, 1500 yerli və xarici iştirakçı sammitə qatılıb.

Forumun iştirakçısı olmuş qonaqlardan biri, Rusiya Federasiyasının tanınmış jurnalisti, "Russian News" portalının təsisçisi və baş redaktoru Yekaterina Nadolskaya redaksiyamızda olub, sammitlə bağlı təəssüratlarını bölüşüb: "Mən ilk dəfə idi Azərbaycan paytaxtını ziyarət edirdim və açığını desəm, gördüklərimdən heyrətlənmişəm. Önçə qey etməliyəm ki, "Fintex Sammiti 2024" çox yüksək səviyyədə təşkil olunmuşdu. Mən ikinci dəfə idi bu forumda iştirak edirdim. İlk dəfə ötən il Türkiyədə "Fintex Sammiti"ndə iştirakçı olmuşam. Azərbaycan Bankları Assosiasiyasının (ABA) bu forumun keçirilməsi ilə bağlı gördüyü işlər həqiqətən təqdirəlayiqdir və bütün iştirakçılarda çox xoş təəssüratlar yaratmışdır. Bununla bağlı ABA-nın icraçı direktoru Yunus Abdulova dərin minnətdarlığımı bildirmək istərdim.

Onu da qeyd etməliyəm ki, sammitdə həm rusiyalı, həm də ukraynalı qonaqların birgə iştirakı sevindirici hal idi. Belə ki, bütün toplantı dövründə bu iki ölkənin nümayəndə heyətləri arasında heç bir insident və mübahisə baş vermədi. Hər şey dostluq və mehribançılıq şəraitində keçdi".

Rusiyalı jurnalist Bakı haqqında böyük məhəbbətlə danışır: "Bakı məni yaxşı mənada heyrətləndirdi. İlk növbədə diqqətimi cəlb edən şəhərin bənzərsiz memarlıq ansamblı oldu. Müxtəliflik, qədimliklə müasirliyin vəhdəti, dar döngələr və geniş prospektlər, parklar, Xəzər dənizi, milli mətbəxiniz bizdə böyük təəssürat yaratdı. Küçələrin təmizliyi, sakit ab-hava göstərirdi ki, şəhərin sakinləri və rəhbərləri Bakını çox sevirlər və ona böyük diqqət yetirirlər.

Mən İşərişəhərdə qalırdım və oradakı tarixi atmosfer, insanların mehriban və mədəni davranışı mənə xeyli müsbət emosiyalar verdi. Eyvanlardan və açıq pəncərələrdən gələn qızılgül qoxusu isə başqa bir aləm idi...

Onu da qeyd edim ki, bizim qubernatorumuz Aleksandr Beqlov da əslən Bakıdandır. Sank-Peterburqda Azərbaycan diasporuna çox böyük hörmətlə yanaşırlar. Mən bakılıları və bütün azərbaycanlıları Peterburqa dəvət edirəm. İndi bizim şəhərimizdə turizm mövsümünün qızğın çağı başlayır və bütün turizm şirkətləri Sankt-Peterburqun çox maraqlı, unikal görməli və gəzməli yerlərinə turlar təşkil edirlər. Park və müzeylərimiz, çay və göllərimiz, digər istirahət etməli məkanlarımız var. Onu da qeyd edim ki, iyunun 11-dən iyulun 2-dək həm də Peterburqda bəyaz gecələr mövsümüdür. Bu mövsümdə şəhərimizdə çoxlu beynəlxalq tədbirlər keçirilir. Bir neçə gündən sonra isə 27-ci Beynəlxalq İqtisadi Forum öz işinə başlayacaq. Bundan əlavə hər il Sankt-Peterburqda qeyd edilən orta məktəb məzunlarının bayramı - "Qırmızı yelkənlər" şousu keçiriləcək. Bu tədbirə tamaşa etmək üçün bütün dünyadan qonaqlar gəlir. Bəyaz gecələri isə, fikrimcə, hər bir insan heç olmasa həyatında bir dəfə görməlidir".

R.CƏFƏROV,

Azərbaycan.-2024.- 24 may, № 108.- S.20.