“Paris razılaşmasının” qəbul edildiyi ölkə tərəfindən Azərbaycana qarşı atılan addım özünüinkardır

Azərbaycan dövləti siyasi gündəliyində sadəcə daxili, lokal məsələləri deyil, həm də xarici və qlobal problemləri də aktiv saxlayır. Dövlətimiz xalqımızın xislətinə və simasına uyğun olaraq bəşəri problemlərə biganə qalmır, bu istiqamətdə silsilə addımlar ataraq qlobal problemlərin həllində yaxından iştirak edir, sadəcə müşahidəçi və iştirakçı statusu ilə kifayətlənməyərək həm də təşəbbüskar qərarlar alır. Məhz elə bunun nəticəsidir ki, ölkələrin yekdil qərarı ilə Azərbaycanın COP29-a ev sahibliyi qəbul edilib. Şübhəsiz ki, bu, Azərbaycana göstərilən yüksək etimadın təzahürü olmaqla yanaşı, dövlətimiz bunu bir tərəfdən də əməkdaşlığı möhkəmləndirmək, mövcud və potensial baryerləri aşmaqda önəmli bir fürsət pəncərəsi kimi dəyərləndirdi. Fransa bu yekdil qərarı da, etimadı da dərk etməli, öz yıxıcı siyasətinin əksinə olaraq Azərbaycanın qurucu istiqamətdə həyata keçirdiyi siyasətinin təqdir edildiyini həzm etməlidir. Rəsmi Paris öz məkrli siyasətindən dönməyərək bu məsələdə də Azərbaycanın əleyhinə addımlar atır. Üstəlik o məsələdə Fransanın kininin həddi, miqyası və boyu özünü aşaraq Azərbaycanı boykot etməklə, əslində, iqlim dəyişikliyi sahəsində ümumdünya səviyyəsində aparılan işlərə zərbə vurur.

Bu fikirləri AZƏRTAC-a açıqlamasında politoloq Şəbnəm Həsənova səsləndirib.

O deyib ki, Paris Şəhər Şurası tərəfindən Azərbaycanın BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyini boykot etməsi barədə aldığı qərar heç bir məntiqə sığmadığı kimi, “Paris razılaşmasının” qəbul edildiyi bir şəhər tərəfindən atılan bu addım son dərəcə absurd olmaqla yanaşı, həm də özünüinkardır. Dövlətlərarası münasibətlər, bəşəri dəyərlər, beynəlxalq razılaşmalara və beynəlxalq hüquqa hörmətsizliyi bariz şəkildə nümayiş etdirmək Fransa üçün artıq norma hal alıb. Azərbaycana qarşı atılan addımların davamlı xarakter alması fonunda Fransanın siyasətindən məsul şəxslərin də COP29 sədrliyimizi hədəf alması ilk həmlə deyil. Daha əvvəl də Fransanın Avropa və Xarici İşlər Nazirliyi tərəfindən aprelin 16-da verilən açıqlamada bu istiqamətdə gur çağırışlar edilirdi. Avropa və xarici işlər naziri Stefan Sejurnenin də verdiyi açıqlama COP29 sədrliyinə tuşlanan “zəhərli oxlar”dır, desək yanılmarıq.

“Təhlükəli tendensiya, daha da acınacaqlısı Fransanın miskin durumunun təzahürü odur ki, bütövlükdə bəşəriyyəti narahatlığa qərq edən, təlatümə sürükləyən iqlim dəyişikliyi probleminin həllinə töhfə verən addımlara dəstək vermək əvəzinə onları siyasiləşdirir. Beynəlxalq qurumları, təsisatları, hətta ayrı-ayrı dövlətləri bir araya gətirərək Azərbaycana qarşı qərar və qətnamələrin alınmasına cəhd göstərilməsini də yaxşı xatırlayırıq. Fransa Azərbaycanın siyasətinə qarşı atılan bütün addımlarla qruplaşma yaratmaq, bu qruplaşmanın zirvəsində qərarlaşmaqdan əl çəkməməkdə israrlıdır. Bu qədər radikallığın səbəbini axtararkən yenə də onu nəinki özümüzdə, heç kimdə deyil, məhz Fransanın özündə tapırıq. Rəsmi Bakının COP29 çərçivəsində atdığı addımlara, aldığı qərarlara, planetin ekoloji təmizliyinin qorunması, “yaşıl enerji”yə keçidlə bağlı irəli sürdüyü beynəlxalq təşəbbüslərə biganə qalan Fransanın bu cür reaksiyasının səbəbi həm də son vaxtlarda onun xarici siyasətində yaşadığı uğursuzluqlarla bağlıdır. Fransa bu kimi addımlarla Afrika qitəsində, dənizaşırı bölgələrində onun əleyhinə baş verən iğtişaşlardan fokusu yayındırmaq, problemləri ört-basdır etmək istəyir”, - deyə politoloq vurğulayıb.

Onun sözlərinə görə, Fransanın bu bölgələrdə də, digər ərazilərdə də yürütdüyü siyasətindən, aldığı qərarlardan bütün dünya xəbərdardır. Şəbnəm Həsənova əminliklə bildirib: “Fransanın zəhəri axırda özünü boğacaq, nüfuzunu isə yerdə süründürəcək. Mövcud Fransa hökumətinin daxili və xarici siyasətinin qüsurlu olması məlumdur. Fransanın bu kimi destruktiv addımlardan çəkinməsi kifayətdir ki, bütövlükdə bəşəriyyət üçün faydalı olsun”.

Azərbaycan.-2024.- 26 may, № 110.- S.16.