Qazaxda
da məcburi köçkün qalmadı
"Kəndimizə qayıdan gün evimizin yanındakı bulaqdan su içib
Prezidentimizə dua edəcəm"
Ermənistanın Qarabağ
iddiası ilə başladığı müharibədə
törətdiyi ilk cinayət Qazaxın Bağanis Ayrım kəndində oldu. Kənddə 5 nəfərdən
ibarət ailə xüsusi amansızlıqla
qətlə yetirilərək
yandırıldı. 1990-cı il martın 23-dən 24-nə
keçən gecə
öncədən təşkil
edilən plan əsasında hücuma məruz qalan kənd ermənilər tərəfindən işğal
olundu.
İşğal zamanı
Bağanis Ayrım kəndinin əliyalın günahsız əhalisinə
qarşı əsl qətliam törədildi.
10 nəfər qətlə
yetirildi, 15 nəfər
yaralandı.
100-dən çox evi
olan kənd, o cümlədən əhalinin
çıxara bilmədiyi
ev əşyaları və mal-qara talan edildi. Öz
ata-baba yurdlarından didərgin düşmüş
bağanis ayrımlılar
müxtəlif bölgələrdə,
ilk növbədə Qazaxda məskunlaşdılar.
Bağanis Ayrımla birlikdə Aşağı
Əskipara, Xeyrimli, Qızılhacılı kəndləri
və onların sakinləri də eyni taleyi yaşadılar.
30 il bu nisgili qəlblərində
saxlayan və gec-tez öz yurdlarına qayıdacaqlarına
əmin olan həmin kəndlərin sakinlərinin bu günlər sevinclərinin
həddi-hüdudu yoxdur.
Onlar Prezident, Silahlı Qüvvələrin
Ali Baş Komandanı İlham Əliyevin apardığı
siyasət nəticəsində
bir güllə atılmadan, qan tökülmədən 4 kəndin
Azərbaycana qaytarılmasını
ölkəmizin növbəti
qələbəsi kimi
qiymətləndirirlər. Həqiqətən,
44 günlük Vətən
müharibəsindəki qələbə,
2023-cü ilin sentyabrında
suverenliyin tam bərpası, rusiyalı sülhməramlıların bölgədən
çıxarılmasından sonra 4 qeyri-anklav kəndin qaytarılması
Azərbaycan torpaqlarını
addım-addım, qarış-qarış
işğaldan azad edən İlham Əliyevin, xalqımızın
və ordumuzun möhtəşəm uğurlarıdır.
Bağanis Ayrım
kəndinin sakini Ramiz Adıgözəlov deyir ki, müharibədən
əvvəl özümüzə
yaxşı gün-güzəran
qurmuşduq: "Geniş
evimiz, bağımız-bağçamız
var idi. Əkinçiliklə, heyvandarlıqla
məşğul olurdum.
Həyətimdə çoxlu
sayda arı aləsi də saxlayırdım. 1990-cı ilin
mart ayında ermənilər kəndimizə
soxulub başımıza
olmazın müsibət
gətirdilər. Əliyalın
kənd camaatı çıxılmaz vəziyyətdə
qaldı. Heç nə edə bilmədik. Bu qırğında ermənilər
qaynatamı, qaynanamı,
baldızımı, 40 günlük
oğlumu və həyat yoldaşım Aliyəni evdə yandırdılar".
Bağanis Ayrım
Qazaxın ən səfalı kəndlərindən
idi. Kəndin icra nümayəndəsi Anar Vəliyev deyir ki, təmiz
havası, buz bulaqları, bərəkətli
torpağı olan Bağanis Ayrım bölgədə həm də uzunömürlülər
diyarı sayılırdı:
"Kənd sakinləri
arasında indinin özündə yaşı
100-ü ötmüş çoxlu
sayda ağsaqqal var. Onlardan biri
də Şəmil Adıgözəlovdur. Yaşı
100-ə yaxın olan Şəmil dayı kəndimizin sayılıb-seçilən
ağsaqqallarındandır".
Şəmil kişi
ailəsi ilə birlikdə Qazaxda məskunlaşıb. Deyir
ki, Qazax da yurdumuzdur: "Ancaq öz ata-baba
ocağımız başqadır.
Kəndimiz üçün
çox darıxmışam.
Mən kənddən çıxanda 62 yaşım
var idi. İndi yaşım
90-nı keçib. 30 ildir
Bağanis Ayrımın
həsrəti ilə yaşayıram. Kəndimizə
qayıdan gün evimizin yanındakı bulağın suyundan doyunca içib bu sevinci bizə
bəxş edən Prezidentimiz İlham Əliyevə dua edəcəm".
Kənd ağsaqqallarından
Anar Vəliyev, Zərbəçi Xasayev də Bağanis Ayrıma qayıdacaqları
günü səbirsizliklə
gözləyirlər. Bilirlər
ki, ermənilər onların evlərini tamamilə dağıdıb,
talan ediblər. Amma dövlət başçısının onları
evsiz qoymayacağına
da əmindirlər".
Emil Xasayev ata yurdu olan
Bağanis Ayrımı
görməsə də, ata-anasının kəndləri
barədə söhbətlərinə
həmişə böyük
maraqla qulaq asıb. Kəndin Azərbaycana qaytarılacağı xəbərini
əsgərlikdə xidmət
edərkən eşidib.
Bir neçə gündür ki, xidmətini başa vurub. Ona görə
də sevinc sevincə qarışıb.
Sevinir ki, yaxın vaxtlarda, nəhayət ki, ata yurduna qayıdacaq.
Sabir
ƏLİYEV,
Azərbaycan.-2024.-
26 may, № 110.- S.17.