Qarabağ müharibəsinin ilk şəhidlərindən biri

Vətənə sevgi hissi uşaqlıq illərindən qəlbinə hakim kəsildi. Valideynləri onu da, qardaşını da bu məhəbbətlə böyütdülər… Zəmanət İbrahimov 1989-cu il mayın 11-də Salyan rayonu Sarvan kəndində dünyaya göz açmışdı. Kənddəki İsfəndiyar Həsənov adına tam orta məktəbdə təhsil almışdı. 2007-ci ildə həqiqi hərbi xidmətə çağırılmışdı. 2009-cu ildə xidmətini başa vuraraq doğma evinə, ata ocağına dönmüşdü.

O zaman Azərbaycanın iyirmi faiz ərazisi hələ də Ermənistanın işğalı altında idi. Erməni vandallarının məhv etdikləri, xarabalığa çevirdikləri Qarabağ və Şərqi Zəngəzur igid, vətənpərvər oğullarını haraylayırdı. Belə bir vəziyyətdə Zəmanət hərbçi olmağı qarşısına məqsəd qoydu.

Zəmanət İbrahimov 2009-cu ildə Silahlı Qüvvələrin Təlim-Tədris Mərkəzinin müddətdən artıq həqiqi hərbi xidmət motoatıcı manqa komandiri kursunu bitirdi. Gəncədə "N" saylı hərbi hissədə qulluq etdi. 2011-ci ildə könüllü olaraq Murovdağda xidmətə başladı. Murovdağda səkkiz il xidmət etdikdən sonra gizirlik kursunu bitirdi.

Gizir rütbəsini aldıqdan sonra isə Goranboy rayonundakı hərbi hissələrin birinə təyinat aldı, üçaylıq xidmətdən sonra könüllü olaraq ön cəbhəyə yollandı.

Ailəsinə bağlı idi. Harda olursa-olsun, onları düşünür, qayğılarına qalmağa çalışırdı. Ancaq nə ata-anasına, nə də ailə qurduqdan sonra həyat yoldaşına işləri barədə məlumat vermirdi. Daha doğrusu, xidmətdə olduğu yerləri hərbi sirr kimi saxlayırdı.

Gizir Zəmanət İbrahimov 2016-cı ildə Aprel döyüşlərində iştirak etdi. General Polad Həşimovla çiyin-çiyinə döyüşdü. Aprel döyüşlərində böyük şücaət göstərən, düşmənin silahlı qüvvələrinə ağır zərbələr endirən qəhrəmanlarımızdan biri oldu. Lakin ailə üzvləri bütün bunlar barədə yalnız o, şəhidliyə ucaldıqdan sonra xəbər tutdular. Qəhrəmanın hərbçi yoldaşları onun Aprel döyüşlərində göstərdiyi igidlikdən qürurla, fəxrlə danışdılar…

Zəmanət İbrahimov müqəddəs bildiyi Vətəninə, dövlətinə hərbçi kimi on üç il xidmət göstərdi. Qarabağı, Şərqi Zəngəzuru namərd düşmənlərdən xilas etmək ən böyük arzusu idi. İnanırdı ki, o günlər gələcək, Azərbaycan xalqının Qarabağ, Şərqi Zəngəzur nisgili bitəcək. Mərd döyüşçü ruhu onu son döyüşlərə, qəti qələbəyə səsləyirdi.

İkinci Qarabağ müharibəsi başlamazdan bir gün əvvəl - 2020-ci il sentyabrın 26-sı axşamtərəfi evə zəng etdi. Doğmaları ilə danışdı. Yenə özünü deyil, onları düşünürdü. Anasına "Mən yaxşıyam, sən özündən də, atamdan da muğayat ol" dedi. Həyat yoldaşı ilə telefon söhbətində də səsində qayğıkeşlik duyulurdu. Ona övladlarını tapşırdı: "Uşaqlardan muğayat ol".

Səhəri gün - sentyabrın 27-də Ermənistan silahlı qüvvələrinin növbəti təxribatı nəticəsində İkinci Qarabağ müharibəsi başladı. Gizir Zəmanət İbrahimov Vətən torpağını yağılardan xilas etmək, şəhid olmuş soydaşlarının qisasını almaq üçün döyüşlərə atıldı.

Elə İkinci Qarabağ müharibəsinin ilk günü Azərbaycan Ordusu Ermənistanın silahlı qüvvələrinə qarşı döyüşlərdə böyük Zəfərə layiq olduğunu göstərdi. Həmin gündən Ermənistan silahlı qüvvələrinin illərlə qurduqları istehkamlar dağıdılmağa başlandı.

Zəmanət İbrahimov müharibənin ilk günü, ölümün nəfəs qədər yaxın olduğu bir vaxtda silahdaşları ilə birlikdə erməni silahlı qüvvələrini məhv edərək irəliləməyə başladı. Düşmənin hərbi texnikasını, silah-sursatını ələ keçirdilər. Şüarları bu idi: "Hər şey Vətən üçün!"

O, sentyabrın 27-də axşam yaralandı və həmin gecə Tərtər rayonunun Talış kəndində şəhidlik zirvəsinə ucaldı.

Sentyabrın 28-də gizir Zəmanət İbrahimov doğulduğu Sarvan kənd qəbiristanlığında torpağa tapşırıldı. Qəhrəman gizir Prezident İlham Əliyevin sərəncamlarına uyğun olaraq, ölümündən sonra "Vətən uğrunda", "Suqovuşanın azad olunmasına görə", "Laçının azad olunmasına görə", "Hərbi xidmətlərə görə" medalları ilə təltif edildi.

Şəhid Zəmanət İbrahimovun Abdulhəsən və Səma adlı iki övladı yadigar qaldı.

Zöhrə FƏRƏCOVA,

Azərbaycan.-2024.- 26 may, № 110.- S.18.