Müstəqillik Gününün Xocalı qüruru

Tarix 10 fevral, 2011-ci il.

Prezident İlham Əliyev Goranboyda məcburi köçkünlər üçün salınmış yaşayış məhəlləsinin açılışında iştirak edir. Xocalı rayonundan məcburi köçkün, şəhid ailəsi Sədaqət Ağayarovanın evində olan dövlət başçısı səmimi söhbət əsnasında deyir: "Mən həmişə demişəm ki, bunlar müvəqqəti məskunlaşma yerləridir. Bizim torpaqlarımız azad olunandan sonra biz həmin torpaqlarda bundan da gözəl binalar tikəcəyik. Bütün şəhərləri bərpa edəcəyik və öz vətəndaşlarımızı doğma torpaqlara qaytaracağıq. O gün gələcək, mən buna inanıram, şübhə etmirəm. Əminəm ki, Azərbaycan öz ərazi bütövlüyünü bərpa edəcəkdir... Mən şübhə etmirəm və əminəm ki, siz də Xocalıya qayıdacaqsınız".

Tarix 28 may, 2024-cü il.

Prezident İlham Əliyev 32 illik həsrətdən sonra Xocalı şəhərinə köçən sakinlərlə görüşdə deyir: "Siz otuz ildən çox müxtəlif yerlərdə yaşamısınız - kimi yataqxanada, kimi uşaq bağçasında, kimi qohumların evində, kimi də qəsəbədə. Bilirsiniz, mən işğal dövründə xocalılılarla dəfələrlə görüşmüşdüm, - Bakıda və digər yerlərdə qəsəbə salınmışdır, - deyirdim ki, gün gələcək sizinlə Xocalıda görüşəcəyik. Bax, bu gün də gəldi".

Cəmi 13 ildən sonra...

İlham Əliyevin Goranboyda əminliklə söylədiyi həmin fikirlər təsdiqini tapdı.

32 il yurd həsrəti ilə alışıb yanan Xocalı sakinlərinin də arzuları, xəyalları gerçəkliyə çevrildi.

Mayın 28-də, Müstəqillik Günündə Xocalıya qayıdış reallaşdı.

Bu ikiqat sevinc hissləri təkcə xocalılıları deyil, hər bir azərbaycanlının ürəyini dağa döndərdi, hər kəsi qürurlandırdı.

Sözü imzası qədər keçərli olan, nəyi nə zaman edəcəyini çox yaxşı bilən Müzəffər Ali Baş Komandan İlham Əliyev Azərbaycanın nələrə qadir dövlət olduğunu dünyaya nümayiş etdirdi.

Qarabağ və Şərqi Zəngəzuru yenidən quran Prezidentin bayram günündə növbəti töhfəsi Xocalı sakinləri ilə görüş oldu.

İki il əvvəl - 2022-ci ilin Müstəqillik Günündə Ağalıda, 2023-cü il mayın 28-də Laçında yerli sakinlərlə görüşən İlham Əliyevin bu il həmin gündə Xocalıda olmasının rəmzi mənası vardı.

Artıq Azərbaycan ictimaiyyəti illərdir bir reallığa şahidlik edir ki, bu ölkəni tarixinin ən qüdrətli dövlətinə çevirən qurucu, xilaskar lider əlamətdar günləri yalnız xalqın arasında keçirir, mühüm xəbərlərlə müjdələyir və görüləcək işlər barədə geniş məlumat verir. Prezidentin söylədikləri isə qısa zamanda reallığa çevrilir.

Azərbaycan Ordusunun keçirdiyi anti-terror əməliyyatlarından sonra azadlığına qovuşan Xocalıda cəmi 8 aydır tikinti-quruculuq işləri başlanıb. Bu qısa zamanda yaradılan şərait hər kəsdə heyrət doğurur. Azərbaycan dövləti ümumən Qarabağ və Şərqi Zəngəzurda misilsiz işlər görür.

Prezident cəmi 3 ay öncə - fevralın 26-da hər birimiz üçün faciəli gündə Xocalıda Memorial Kompleksin təməlini qoymuşdu. Mayın 28-də isə artıq xocalılılar yurda qayıdır və şəhər də göz oxşayır.

Prezident Xocalıda yurda qayıdışın, Müstəqillik Gününün sevincini sakinlərlə paylaşdı və səmimi söhbət etdi. Dövlət başçısı hər dəfə olduğu kimi burada da müjdəli xəbər verdi - Xankəndiyə və Ağdama köçün başlanacağı tarixi açıqladı.

Bəlli oldu ki, Xankəndiyə ilk köçən müəllim və tələbələr olacaq: "Birinci köçən tələbələr və onların müəllimləri olacaqlar. Qarabağ Universiteti fəaliyyətə başlayır. Ona görə bir tərəf olacaq Xankəndi, bir tərəf Ağdam. Ağdam şəhərinə də gələn il insanlar qayıdacaqlar". Yəni dövlət artıq indidən Qarabağ Universitetində çalışacaq müəllimlərin, təhsil alacaq tələbələrin yüksəksəviyyəli yaşayış təminatını yaradır.

Bütün bunlar göstərir ki, İlham Əliyev Qarabağ və Şərqi Zəngəzuru dünyanın ən gözəl məkanlarından birinə çevirmək üçün nə lazımdırsa edir. İlham Əliyev elə bir iqtisadi rayonlar qurur ki, özünün də dediyi kimi, bu yerlər ilk növbədə düşmənə qarşı çox möhkəm istehkam zonası olacaq.

Ali Baş Komandan hər zaman olduğu kimi, bu dəfə də məğlub Ermənistana çıxış yolu göstərdi, bu ölkədəki revanşistlərə sərt xəbərdarlıq etdi. Bundan sonra Ermənistanın heç vaxt Azərbaycana qarşı hər hansı bir hərbi təxribat törətməyə cəhd etməyəcəyinə əminliyini vurğulayan Prezident dedi ki, Ermənistanda revanşistlər də kifayət qədər çoxdur. Bu ölkədəki son proseslər izlənilir və görünür ki, Azərbaycana qarşı yenidən ərazi iddiaları irəli sürmək cəhdləri mövcuddur. Ona görə də hər an hazır olmalı, ilk növbədə, ordu qruculuğu daha da gücləndirilməlidir. Dünya şahiddir ki, bu gün Azərbaycan Ordusunun yerinə yetirə bilmədiyi döyüş tapşırığı yoxdur. Ancaq Ordunun həm hərbi arsenalı, maddi-texniki bazası gündən-günə gücləndirilir, həm də şəxsi heyətin döyüş ruhu daha da artırılır.

Rəşad BAXŞƏLİYEV,

Azərbaycan.-2024.- 30 may, № 112.- S.14.