Qarabağ və Şərqi Zəngəzurun bərpası üçün büdcədən ayrılan vəsaitin həcmi artırılır

Respublikamızda ardıcıl şəkildə həyata keçirilən iqtisadi islahatların uğurlu nəticələri yüksələn makroiqtisadi göstəricilərdə özünü göstərməkdədir.

2024-cü ilin ötən dövründə Azərbaycan iqtisadiyyatında baş verən artım bu baxımdan təqdirəlayiqdir. Belə ki, bu ilin yanvar-aprel aylarında ölkədə 38,2 milyard manatlıq, o cümlədən qeyri-neft/qaz sektorunda 24,2 milyard manatlıq ÜDM istehsal olunub. Əvvəlki ilin eyni dövrü ilə müqayisədə ÜDM real ifadədə 4,3 faiz artıb. Qeyri-neft sektoru üzrə isə artım 7,7 faizdir.

Dövlət büdcəsinin yeni xərcləri 3 milyard 796 milyon manat təşkil edəcək

Bütün bunlar, o cümlədən dünya enerji bazarında münbit qiymət konyunkturası, habelə dövlət büdcəsinə gözlənilən əlavə daxilolmalar müəyyən edilmiş prioritet istiqamətlər üzrə zəruri olan bir sıra əlavə tədbir və layihələrin maliyyələşdirilməsinə imkan yaratmaqla 2024-cü ilin dövlət büdcəsinə yenidən baxılmasını şərtləndirir. Dövlət büdcəsinə dəyişiklik edilməsi ilə bağlı qanun layihəsi Milli Məclisin İqtisadi siyasət, sənaye və sahibkarlıq komitəsinin mayın 27-də keçirilmiş iclasında müzakirə edilib.

Yenilənmiş makroiqtisadi proqnozlara əsasən 2024-cü ilin dövlət və icmal büdcələrinin göstəriciləri təhlil edilib və həmin büdcələrə müvafiq qanunvericiliyə uyğun olaraq dəyişikliklər hazırlanıb. Dəyişikliklərdə 3 milyard 796 milyon manat məbləğində yeni xərclərin həyata keçirilməsi nəzərdə tutulub. Yenidən baxılma ilə 2024-cü ilin dövlət büdcəsinin xərcləri 39 milyard 707 milyon manat məbləğində, dövlət büdcəsinin gəlirləri isə 36 milyard 353 milyon manat həcmində proqnozlaşdırılır.

Qeyd edək ki, ötən ilin sonunda 2024-ci ilin dövlət büdcəsi qəbul ediləndə 2024-cü il üçün gəlirlər 34 milyard 173 milyon manat, xərclər isə 36 milyard 763 milyon manat proqnozlaşdırılmışdır.

Böyük qayıdış üçün əlavə maliyyə təminatı yaradılır

Dövlət büdcəsinin xərclərinin artırılmasının əsas məqsədlərindən biri Böyük Qayıdış Dövlət Proqramında nəzərdə tutulan tədbirlərin həyata keçirilməsi üçün əlavə maliyyə təminatının yaradılmasıdır. Ona görə də yeni xərclərin əsas hissəsinin işğaldan azad olunmuş Qarabağ və Şərqi Zəngəzurda həyata keçirilən tikinti, bərpa və yenidənqurma işlərinə yönəldilməsi nəzərdə tutulur.

Xatırladaq ki, 2024-cü ilin dövlət büdcəsindən Qarabağ və Şərqi Zəngəzurun bərpasına 4 milyard manatın ayrılması nəzərdə tutulub. Dövlət büdcəsinə təklif edilən dəyişikliklərdən sonra isə bu məbləğ 1 milyard 160 milyon manat artırılacaq.

Onu da qeyd edək ki, 2023-cü ildə erməni separatizminə son qoyulması ilə ərazi bütövlüyümüzün və suverenliyimizin tam bərpası dövlətimiz qarşısında yeni çağırışlar formalaşdırıb. Bu isə büdcədən Qarabağın bərpası üçün əlavə vəsaitin ayrılmasını zəruri edir.

Müdafiə və təhlükəsizlik xərclərinə əlavə 705,3 milyon manat ayrılacaq

Ölkəmizin ərazi bütövlüyü və suverenliyinin tam bərqərar edilməsindən sonrakı dövrdə də dövlətin müdafiə qabiliyyətinin və milli təhlükəsizliyinin möhkəmləndirilməsi ordumuzun hərbi sursat və maddi-texniki təchizatının müasirləşdirilməsi istiqamətində tədbirlərin davam etdirilməsi üçün əlavə maliyyə təminatının yaradılmasını zəruri edir. Beləliklə, ölkənin müdafiə qabiliyyətinin və təhlükəsizliyinin daha da gücləndirilməsi üçün əlavə 705,3 milyon manat ayrılacaq.

Bunlarla yanaşı infrastruktur və digər layihələrin maliyyə təminatı üçün 1 milyard 184 milyon manat, beynəlxalq fəaliyyət üzrə tədbirlərin maliyyələşdirilməsi və digər zəruri xərclər üzrə 499 milyon manat, zəruri əsaslı xərclər, təmir və sair üçün 146 milyon manat yönəldilməsi nəzərdə tutulur.

Rəşad CƏFƏRLİ,

Azərbaycan.-2024.- 30 may, № 112.- S.11.