Prioritet istiqamətlər bəllidir

İşğaldan azad olunmuş ərazilərimizin bərpasına nəzərdə tutulduğundan daha çox vəsait ayrılacaq

"2024-cü ilin dövlət büdcəsinə edilən dəyişikliklərdə prioritet istiqamətlərə daha çox vəsaitin ayrılması nəzərdə tutulur. Belə ki, işğaldan azad olunmuş ərazilərimizin bərpası və yenidən qurulması əsas olduğuna görə, bu istiqamətdə dövlət büdcəsindən nəzərdə tutulduğundan daha çox vəsait ayrılacaq".

Bu sözləri qəzetimizə Milli Məclisin deputatı Vüqar Bayramov dövlət büdcəsinə dəyişikliklə bağlı fikir bildirərkən deyib. Onun sözlərinə görə, iqtisadi fəaliyyət üzrə mövcud büdcə layihəsində 7 milyard 788 milyon manat vəsaitin ayrılması nəzərdə tutulmuşdu, amma dəyişikliklərdən sonra bu məbləğ 9 milyard 902 milyon manata qədər artırılacaq. Əlavə olaraq 2 milyard 114 milyon manat vəsait və ya 27 faiz çox bu istiqamətdə dövlət büdcəsindən xərcləmələr həyata keçiriləcək. Bunlar birbaşa və daha çox işğaldan azad edilmiş ərazilərin yenidən qurulmasına yönəldilməsi nəzərdə tutulan vəsaitdir. Bu isə ondan xəbər verir ki, Qarabağ və Şərqi Zəngəzurun bərpa və yenidənqurma prosesi 2024-cü ilin növbəti aylarında da intensiv şəkildə həyata keçiriləcək, sürətlənəcək. Bu da təbii ki, ilin sonuna qədər təxminən 25 min vətəndaşımızın Qarabağ və Şərqi Zəngəzura qayıtmasına imkan verəcək.

Deputat qeyd edib ki, müdafiə və milli təhlükəsizliyin gücləndirilməsi prioritet istiqamətdir və bu yönə ayrılan vəsaitin həcmində də artımlar var: "Belə ki, 6 milyard 421 milyon manat vəsaitin ayrılması nəzərdə tutulsa da, dürüstləşmədən sonra bu istiqamətə 7 milyard 126 milyon manat vəsait ayrılacaq. Yəni milli təhlükəsizliyimizin və müdafiə gücümüzün daha da artırılması üçün əlavə olaraq 705 milyon manat vəsaitin ayrılması planlaşdırılıb. Eyni zamanda digər vacib istiqamətlərdən biri kənd təsərrüfatına əlavə vəsaitin ayrılmasıdır. Hazırda kənd təsərrüfatı üzrə təsdiq olunmuş xərclər 1 milyard 102 milyon manatdır. Bu istiqamətə əlavə 100 milyon manat ayrılacaq. Bu da fermerlərin, kənd təsərrüfatında çalışanların daha yaxından dəstəklənməsinə, onların xərclərinin bir hissəsinin kompensasiya edilməsinə, sosial təminatlarının gücləndirilməsinə imkan yaradacaq".

V.Bayramov vurğulayıb ki, Əmək və Əhalinin Sosial Müdafiəsi Nazirliyi tərəfindən minimum əməkhaqqının artırılması ilə bağlı təkliflər noyabrın 1-nə qədər təqdim olunacaq. Artıq bununla bağlı müzakirələr aparılır. Eləcə də Dövlət Sosial Müdafiə Fondu və İşsizlikdən Sığorta Fondunun büdcəsinə də dəyişikliklər edilib. DSMF-nin büdcəsinə edilən dəyişikliklərdən sonra bu istiqamətə əlavə olaraq 30 milyon manat vəsaitin ayrılması nəzərdə tutulur ki, bunun da 25 milyon manatı məhz pensiya təminatı üçündür. Bu istiqamətdə artımlar, eyni zamanda yeni sosial qərarlarla bağlı nazirlik tərəfindən təkliflərin hazırlanması və uyğun dövlət qurumlarına təqdim olunması gözlənilir. "Bütövlükdə dövlət büdcəsinə edilən dürüstləşmə əsas prioritet istiqamətlərə daha çox vəsaitin ayrılmasına imkan verəcək. Bu da fiskal gücümüzün daha da artmasına, iqtisadi sferada, o cümlədən digər istiqamətlərdə yeni layihələrin reallaşmasına şərait yaradacaq. Bu həm də onu göstərir ki, 2024-cü ildə dövlət büdcəsinə nəzərdə tutulandan daha çox vəsaitin cəlb edilməsi mümkün olub", - deputat əlavə edib.

Əsmər QARDAŞXANOVA,

Azərbaycan.-2024.- 30 may, № 112.- S.14.