COP29-a layiqli evsahibliyi absurd ittihamlara ən tutarlı cavab oldu

"Bakıda planetin üzləşdiyi ən ağrılı problemlərdən olan iqlim dəyişikliyinin nəticələri ilə mübarizəyə dair aktual məsələlərin müzakirə edildiyi bir vaxtda Lüksemburq Deputatlar Palatasının noyabrın 20-də Azərbaycanı əsassız ittihamlarla hədəfə alan qətnamə qəbul etməsi bu parlamentin reallıq hissini itirməsidir. Aktual dünya siyasətinin reallığından uzaq düşmüş Lüksemburq parlamentariləri məhz bu qlobal tədbirə evsahibliyi edən ölkəni yenidən şantaj etməklə məşğuldur".

Bu sözləri "Azərbaycan" qəzetinə Milli Məclisin deputatı Rizvan Nəbiyev deyib. Siyasətçi bildirib ki, Prezident İlham Əliyev çıxışında Liderlər Sammitinin açılış mərasimində və inkişaf etməkdə olan kiçik ada dövlətlərinin sammitində çıxışlarında səsləndirdiyi haqlı və cəsarətli fikirlərindən sonra qətnamədə dövlət başçısının hədəfə alınması gözlənilən idi. Əksinə, bu, faktlar qarşısında aciz qalanların cılızlığının nümayişidir. Müstəmləkəçilikdən əziyyət çəkən xalqların haqq səsinin Prezident İlham Əliyev tərəfindən belə mötəbər kürsüdən təkzibolunmaz faktlar əsasında səsləndirilməsi, təbii ki, bu işə məsuliyyət daşıyanları çox ciddi narahat edir. "Neomüstəmləkəçi qüvvələrin əlində alətə çevrilərək Azərbaycana qarşı aparılan qarayaxma kampaniyasının tərkibinə çevrilmək əvəzinə bu xalqların yanında olmaq Lüksemburq parlamentinə daha çox hörmət gətirərdi. Bu, təkcə ədalətin dəstəklənməsi deyil, həm də beynəlxalq hüquqa hörmətin nümayişi olardı. Ölkəmizə qarşı uzun illərdir qarayaxma kampaniyası aparan müxtəlif dairələrin istifadə etdiyi ayrı-ayrı mövzuların yenidən ittihamlar və tələblər formasında Lüksemburq parlamentinin qətnaməsində yer alması ölkəmizin daxili işlərinə kobud müdaxilə cəhdidir", - deyə deputat əlavə edib.

R.Nəbiyev qeyd edib ki, Azərbaycanda hüquqi dövlətçiliyin inkişafına qarşı yönələn absurd ittihamlara ən tutarlı cavab COP29 nümunəsindən götürülə bilər. Azərbaycanın "COP atəşkəsi" təşəbbüsünə 1200-dən çox təsisatın, qeyri-hökumət təşkilatlarının nümayəndələrinin, nüfuzlu şəxsiyyətlərin qoşulması həm də ölkəmizdə vətəndaş cəmiyyətinin uğurlu inkişafının təqdir edilməsidir. Qlobal miqyasda və bütün coğrafi məkanlardan minlərlə təsisatı təmsil edən on minlərlə insanın ölkəmizdə fəaliyyəti bu absurd ittihamlara ən tutarlı cavabdır.

Deputat vurğulayıb ki, Lüksemburq parlamentinin qətnaməsi eyni zamanda Azərbaycanın suverenliyinə hörmətsizliyin nümayişidir: "Azərbaycanın Ermənistanın 30 illik işğalına son qoymasından sonra bölgədə yaranan və beynəlxalq hüquqa əsaslanan yeni reallıqları Lüksemburq parlamenti dərk etməkdə hələ də çətinlik çəkir. Otuz il müddətində Ermənistan tərəfindən pozulan və Lüksemburq tərəfindən heç vaxt gündəmə gətirilməyən beynəlxalq hüququn prinsipləri məhz Azərbaycan Prezidentinin uğurlu hərbi-siyasi və diplomatik kursu nəticəsində bərpa edildi, regionda sabitlik, uzunmüddətli sülhün təmini üçün unikal tarixi şərait yarandı".

Siyasətçi qeyd edib ki, barbar erməni işğalının nəticələrindən biri də Azərbaycanın ərazisinin 12 faizinin 1,5 milyon mina və digər partlamamış hərbi sursatla çirkləndirilməsidir. BMT Təhlükəsizlik Şurasının 1993-cü il tarixli qətnamələrində də yer almış, işğal edilmiş ərazilərdən güc tətbiq edilərək qovulan və iztirablar yaşamış yüz minlərlə azərbaycanlı həm də bu səbəbdən həmin torpaqlara bu gün geri qayıda bilmir. Bu insanların haqları isə lüksemburqlu parlamentariləri heç vaxt düşündürməyib.

R.Nəbiyev Lüksemburq parlamentinin reallıqların təhrif olunduğu birtərəfli qətnaməsini qəti şəkildə rədd edərək, onları obyektiv və ədalətli mövqe nümayiş etdirməyə çağırıb.

Əsmər QARDAŞXANOVA,

Azərbaycan.-2024.- 26 noyabr (№ 260).- S.8.