COP29 beynəlxalq ictimai rəydə məmnunluq doğurdu

Bakının evsahibliyi etdiyi COP29 artıq tarixə çevrilmişdir. Dünyanın diqqət mərkəzində olan bu böyük beynəlxalq tədbir ictimai-siyasi müstəvidə qazandığı uğurlarla yanaşı, yüksək təşkilatçılıq bacarığı ilə də hələ uzun müddət xoş xatirə, habelə nümunə olaraq yaddaşlarda qalacaqdır.

BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) dünyanın 196 ölkəsindən 76000-dən çox insanın, prezident, vitse-prezident, baş nazir, eləcə də digər hökumət və dövlət adamlarının böyük coşqu ilə iştirak etdiyi bu beynəlxalq tədbir həm də müstəqil Azərbaycanın dünyaca böyük nüfuzunun təzahürü idi.

Təşkilatçılıq baxımından yüksək səviyyədə keçirilən bu mötəbər tədbirin görünən tərəflərindən biri də odur ki, ölkələr və xalqlararası əməkdaşlığın genişləndirilməsində, yeni tərəfdaşlıq əlaqələrinin qurulmasında mühüm rol oynadığı kimi, dünyanın gələcəyinə, siyasi, iqtisadi, ekoloji problemlərin araşdırılması və həlli yollarına da işıq salmış, bir sözlə, bəşəriyyətin sağlam gələcəyini, iqtisadi, sosial-mədəni tərəqqiyə inkişaf istiqamətlərini beynəlxalq aləmə bəyan etmişdir.

Azərbaycanda keçirilən COP29 tədbirinə 200 ölkənin yekdilliklə səs verməsi və bu qlobal tədbirin yüksək səviyyədə keçməsi ilk növbədə Prezident İlham Əliyevin yürütdüyü daxili və xarici siyasətin uğurlu nəticəsidir. Rəsmi Bakının hər zaman götürdüyü öhdəliklərə, müqavilələrə sadiq qalması onun beynəlxalq imicinə müsbət təsir edir və ölkəmiz etibarlı tərəfdaş kimi dünyada tanınır.

Azərbaycanın COP29 kimi mötəbər tədbirə evsahibliyi etməsi bəzi Qərb dairələrinin və erməni lobbi qruplarının narahatlığına səbəb olmuşdu. Xüsusilə, Fransa və erməni lobbisinin təsirində olan Avropa Parlamenti bütün vasitələrlə çalışırdı ki, bu mötəbər tədbiri məhdudlaşdırsınlar və s. Lakin onların bu cəhdləri fiaskoya uğradı. Tərəqqipərvər dünya ictimaiyyəti onların çağırışlarına məhəl qoymadı. Azərbaycan isə təşkilatçılıq bacarığına olan inamını bir daha təsdiqlədi. Prezident İlham Əliyev bəzi qərəzli dairələrin əsassız iddialarını faktlarla ifşa edərək, onların ucuz kampaniyalarının heç bir nəticə vermədiyini üzə çıxardı.

Gəncə şəhər sakini, təqaüdçü Qasım Əliyev redaksiyamıza ünvanlandığı məktubunda ölkəmizin COP29-a tamamilə fərqli ovqatda evsahibliyi etdiyini diqqətə çatdıraraq, məmnunluq hissi ilə bildirir ki, tarixi Zəfəri, suverenliyini tam bərpa etməsi ilə qürurlanan qalib Azərbaycan COP29-un yüksək səviyyədə keçirilməsi üçün zəruri addımlar atdı: "Dünya siyasətçilərinin diqqətlə izlədiyi bu beynəlxalq tədbirdə başda Prezident İlham Əliyev olmaqla Azərbaycan regionda davamlı sülhün bərqərar olması üçün prinsipial mövqe nümayiş etdirdi. Rəsmi Bakı sülh təşəbbüsü ilə çıxış etdi, bu istiqamətdə konkret tədbirlər irəli sürdü. Azərbaycan həm də dünyaya göstərdi ki, sülh prosesi təkcə regional deyil, həm də qlobal əməkdaşlıqda prioritetdir".

Bakının Nəsimi rayonundan Teymur İsmayılzadə COP29-un yüksək səviyyədə keçirilməsində rayon sakinlərinin də böyük əməyi olduğunu diqqətə çatdıraraq tədbir günlərində şəhərin küçə, prospekt və meydanlarında, istirahət guşələrində səliqə-sahmana xüsusi fikir verildiyini, yeni çəmənliklərin, yaşıllıq zolaqlarının salındığını, restoran və hotellərdə qonaqlara qayğıkeşliklə yanaşıldığını bildirir. T.İsmayılzadə xüsusi olaraq diqqətə çatdırır ki, şəhərimiz səliqə-sahmanına, təmizliyinə görə də dünyada seçildi: "Şəhərdə demək olar ki, tullantılara rast gəlinmədi, bu ənənəni bundan sonra da davam etdirməliyik. Hər yerdə yaşıllıqların salınması sağlam ekoloji mühit yaradıb. Düşünürəm ki, COP29 kimi beynəlxalq tədbirin ölkəmizdə yüksək təşkilatçılıqla keçirilməsi dövlətimizin nüfuzunu daha da artırdı. Azərbaycan sağlam ekoloji mühitə töhfələr verir, salınan yaşıllıqlar, alternativ, bərpaolunan enerji mənbələri ilə təmiz və sağlam gələcək formalaşdırır".

Redaksiyamıza COP29 kimi qlobal tədbirin yüksək təşkilatçılıqla başa çatdığından bəhs edən məktub və teleqramlar, internet vasitəsilə göndərilən mesajlar çoxluq təşkil edir. Görünən odur ki, ICESCO-nun baş direktoru Salim bin Məhəmməd əl-Malik Azərbaycan xalqını qürurlandıran bu məsələyə toxunaraq mətbuata açıqlamasında demişdir: "Azərbaycan dünyanın iqlim və ekoloji dəyişikliklərlə mübarizə sahəsində ən nüfuzlu tədbiri sayılan Tərəflər Konfransına (COP29) evsahibliyi edərək və təşkilatçılığı uğurla həyata keçirərək, böyük nailiyyətə imza atdı. Konfrans günlərində Azərbaycan yüksək təşkilatçılıq bacarığını, insan kapitalını və müasir texnoloji potensialını bir daha nümayiş etdirdi. Qeyd etmək istərdim ki, COP29-da 4500-dən çox gəncin könüllü kimi iştirak etməsi də beynəlxalq tədbirin yüksək səviyyədə keçirilməsinə öz töhfəsini verdi. Azərbaycanın beynəlxalq aləmdəki nüfuzlu mövqeyi onu son illərdə yüksəksəviyyəli konfranslar və beynəlxalq tədbirlər üçün əsas məkanlardan birinə çevirib.

Bakının bu mötəbər tədbirə uğurla evsahibliyi etməsi islam ölkələrinin bilik və təcrübəsinin daha da zənginləşməsinə öz töhfəsini verəcək".

Rəhman SALMANLI,

Azərbaycan.-2024.- 27 noyabr (№ 261).- S.12.