Cəbrayıl növbəti sakinlərinə qovuşdu

"Biz bütün gücləri səfərbər etmişik və edəcəyik ki, qısa müddət ərzində Cəbrayılı və bütün başqa rayonlarımızı yenidən quraq, bərpa edək". Prezident İlham Əliyevin bu sözlərinin reallaşdığının, azad olunmuş ərazilərdə irimiqyaslı bərpa-quruculuq işlərinin yalnız ölkəmizin öz gücü hesabına həyata keçirilməsinin, keçmiş məcburi köçkünlərin doğma yurdlarına qayıtmasının şahidi oluruq.

Görülən işlərin nəticəsidir ki, keçmiş məcburi köçkünlərin mərhələli olaraq yurdlarına qayıtmasına başlanılıb. Doğma yurdlarına qovuşan insanların sayı günü-gündən artır. İşğaldan azad edilmiş digər şəhər və kəndlərimiz kimi, Cəbrayıl da mütəmadi olaraq qayıdış karvanlarını qarşılayır.

Daha 200 nəfər yurduna döndü

Yenidən qurulan Cəbrayıl şəhəri dünən növbəti köç karvanını qarşılayıb. Bu mərhələdə şəhərə 40 ailə - 200 nəfər qayıdıb. Uzun illərin həsrətindən sonra mərhələli olaraq dədə-baba yurdlarına qayıdan cəbrayıllıların sayı artıq 800 nəfərə çatıb.

30 ildir bu günün həsrətilə yaşayan Cəbrayıl sakini Səkinə Musayeva deyib ki, bir vaxtlar ömrünün vəfa etməyəcəyini, bu torpaqları bir də görə bilməyəcəyini düşünüb, xiffət çəkib. Amma indi başqa əhvali-ruhiyyədədir: "Şükür Allaha, torpaqlarımız geri alındı. Səbəbkarlar var olsun. Şəhidlərimizə Allah rəhmət etsin. O qədər ağır, o qədər çətin günlərimiz olub ki, dilə gətirməyə utanmışıq. Həmişə bu günü arzulamışam. Biz Cəbrayılda çox gözəl yaşayırdıq. Bundan sonrakı günlərimiz daha da gözəl olacaq. Allah kömək olsun prezidentimizə, ona ömür versin, bizə daha yaxşı günlər nəsib etsin".

Dədə-baba torpağına qovuşan keçmiş məcburi köçkün Yusif Kərimov hiss etdiyi sevinc və xoşbəxtliyi sözlə ifadə etməkdə çətinlik çəksə də deyir: "Mən Cəbrayılda anadan olmuşam. Ömrümün çoxu, uşaqlığım, gəncliyim burada keçib. Bu günü bizə nəsib edən vətən övladlarına minnətdaram. Allah şəhidlərimizə rəhmət etsin, qazilərimizə cansağlığı versin".

9000-dən çox insan torpağına qayıdıb

Dörd ildir ki, tarixi ədalət bərpa edilib, düşmənə lazımi dərs verilib. Bundan sonra Azərbaycan xalqı əbədi olaraq qalib kimi yaşayacaq. İşğaldan azad edilmiş ərazilərimizdə aparılan genişmiqyaslı bərpa-quruculuq işləri Qarabağı və Şərqi Zəngəzuru cənnətməkana çevirəcək.

Prezident İlham Əliyevin müvafiq göstərişləri ilə həyata keçirilən məqsədyönlü və genişmiqyaslı işlər sayəsində azadlığına qovuşmuş torpaqlarımızda əhalinin dayanıqlı məskunlaşması təmin edilir. Keçmiş məcburi köçkünlərin doğma yurda qayıdışı ilə bağlı qarşıya qoyulan hədəflər uğurla gerçəkləşdirilir.

Düşmənin viran qoyduğu şəhər və kəndlərimiz yenidən qurulduqca keçmiş məcburi köçkünlər torpaqlarına qovuşur. İndiyədək 2333 ailə - 9010 nəfər əzəli yurdlarına geri dönüb. 175 ailə (871 nəfər) Zəngilan rayonunun Ağalı kəndində, 20 ailə (90 nəfər) Tərtər rayonunun Talış kəndində, 570 ailə (2090 nəfər) Laçın şəhərində, 823 ailə (3136 nəfər) Füzuli şəhərində, 217 ailə (823 nəfər) Laçın rayonunun Zabux kəndində, 59 ailə (215 nəfər) Laçın rayonunun Sus kəndində, 220 ailə (823 nəfər) Şuşa şəhərində, 46 ailə (179 nəfər) Xocalı şəhərində, 203 ailə (783 nəfər) Cəbrayıl şəhərində məskunlaşıb.

2026-cı ilin sonunda Böyük qayıdışın birinci mərhələsi bitəcək. O zamana qədər Qarabağ və Şərqi Zəngəzurda 34 min 500 ailənin təhlükəsiz məskunlaşması təmin ediləcək. Qüdrətli dövlətimiz qarşısına qoyduğu bütün məqsədlərə nail olduğu kimi, bunun da öhdəsindən layiqincə gələcək.

Ülkər XASPOLADOVA,

Azərbaycan.- 2024.- 30 noyabr (№ 264).- S.4.