COP29 Azərbaycanın qlobal nüfuzunu daha da artıracaq

Milli Məclisin oktyabrın 8-də keçirilmiş iclasında qəbul olunan məsələlərdən biri "Azərbaycan Respublikası Hökuməti ilə birgə Birləşmiş Millətlər Təşkilatının İqlim Dəyişmələri üzrə Çərçivə Konvensiyasının, Kioto Protokolunun və Paris Sazişinin Katibliyi arasında Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfrasının on doqquzuncu sessiyası, Paris Sazişinin Tərəflər Görüşünün altıncı sessiyası və Köməkçi Orqanların sessiyaları haqqında Saziş"in təsdiq edilməsi barədə Azərbaycan Respublikası Qanununun layihəsidir.

Məsələ ilə bağlı "Azərbaycan" qəzetinə açıqlama verən Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov bildirib ki, bu qanun layihəsinin qəbulu Azərbaycanın BMT ilə əməkdaşlıq səylərini gücləndirmək və iqlim dəyişikliyi ilə mübarizədə qlobal öhdəliklərini yerinə yetirmək məqsədi daşıyır. BMT Baş Assambleyasının 1985-ci ildə qəbul etdiyi A/RES/40/243 saylı qətnaməyə uyğun olaraq, ev sahibi ölkələrin beynəlxalq konfransların keçirilməsi zamanı məsuliyyətləri müəyyən edilmişdir. Azərbaycan da bu tələblərə uyğun olaraq, COP29 tədbirinin keçirilməsi ilə əlaqədar təşkilati və təhlükəsizlik məsələlərini yüksək səviyyədə təmin edəcəkdir.

Komitə sədrinin sözlərinə görə, sazişdə Azərbaycan ən az inkişaf etmiş ölkələrin, inkişaf etməkdə olan kiçik ada dövlətlərinin, Afrika qrupunun, 77-lər Qrupunun və Çinin sessiyaqabağı görüşlərinin keçirilməsi və əlavə razılaşdırılmış görüşlərə evsahibliyi etmək öhdəliyini qəbul etmişdir. Sazişə əlavə edilmiş öhdəliklər çərçivəsində COP29-un təşkilində müxtəlif xidmətlər, o cümlədən media, maliyyə, iaşə, tərcümə və nəqliyyat xidmətləri də təmin olunacaq. Bu tədbir Azərbaycan üçün iqtisadi, diplomatik və ekoloji sahələrdə yeni imkanlar yaradacaq və ölkəmizin nüfuzunu daha da artıracaq.

Sadiq Qurbanov onu da qeyd edib ki, COP29 konfransı Azərbaycan üçün yalnız bir nüfuzlu beynəlxalq tədbir deyil, həm də davamlı inkişaf strategiyamızın bir hissəsi və iqlim dəyişikliyi ilə mübarizədə lider ölkələrdən biri olmaq üçün bir platformadır: "Biz ev sahibi olan ölkə kimi, bu tədbirin yüksək səviyyədə keçirilməsini təmin edəcək və qlobal səviyyədə iqlim dəyişiklikləri ilə mübarizəyə öz töhfəmizi verəcəyik. Dünyanın diqqəti bu dövrdə Bakıya yönələcək və ölkəmiz ekoloji problemlər və iqlim dəyişiklikləri ilə bağlı müzakirələrin mərkəzində dayanacaqdır".

Qeyd edək ki, bu beynəlxalq tədbirdə dünyanın müxtəlif ölkələrindən dövlət nümayəndələri, müşahidəçi təşkilatlar, beynəlxalq media, qeyri-hökumət təşkilatları, özəl sektor və digər nümayəndələr iştirak edəcəklər. Azərbaycan bu tədbir vasitəsilə iqlim dəyişikliyi ilə mübarizədə fəal rol oynadığını bir daha sübuta yetirəcək. Bu barədə danışan Sadiq Qurbanovun sözlərinə görə, COP29 konfransının Azərbaycanda keçirilməsi iqlim dəyişikliklərinə qarşı qlobal mübarizədə ölkəmizin liderliyini nümayiş etdirmək üçün əvəzsiz bir imkandır: "Ölkəmiz bir tərəfdən iqlim siyasətimizi dünyaya nümayiş etdirəcək, digər tərəfdən isə, qlobal iqlim məsələləri ilə bağlı yeni təşəbbüslərə imza atacaq. Eyni zamanda bu tədbir Azərbaycan iqtisadiyyatına və turizminə müsbət təsir göstərəcək və ölkəmizə beynəlxalq aləmin diqqətini cəlb edəcəkdir.

Bu konfrans Azərbaycanın ekoloji siyasətində əhəmiyyətli bir mərhələdir və biz, dövlət olaraq, bu məsuliyyəti layiqincə yerinə yetirməliyik. İqlim dəyişikliyi ilə mübarizədə beynəlxalq əməkdaşlığı daha da möhkəmləndirmək və ekoloji davamlı inkişafı təmin etmək üçün bu tədbir bizim üçün yeni imkanlar yaradacaqdır".

COP29 konfransı Azərbaycana yeni iqtisadi və diplomatik imkanlar açacaq, qlobal səviyyədə ölkəmizin nüfuzunu daha da artıracaqdır. Bu barədə qənaətlərini bölüşən Sadiq Qurbanov deyib ki, parlament bu konfransın müvəffəqiyyətlə keçirilməsi üçün lazım olan dəstəyi göstərəcəkdir: "Gələcək nəsillərimizin sağlam və təhlükəsiz mühitdə yaşaması üçün bu məsələnin əhəmiyyəti danılmazdır. İqlim dəyişikliyi təkcə ekoloji məsələ deyil, həm də iqtisadi, sosial və strateji əhəmiyyət daşıyan qlobal bir problemdir. Bu səbəbdən, Azərbaycan iqlim dəyişikliyinə qarşı mübarizəni dövlət siyasətinin prioritet istiqamətlərindən biri olaraq qəbul edir. Bu beynəlxalq tədbirin uğurla keçirilməsi üçün hökumətimiz və müvafiq qurumlar ciddi hazırlıqlar görməkdədir və parlament olaraq bu işləri dəstəkləmək bizim vəzifəmizdir".

Azərbaycanın COP-29-a evsahibliyi etdiyi müddətdə dünyanın xilası üçün çevik qərarların qəbul olunmasına öz töhfəsini verəcəyini bildirən komitə sədri əlavə edib ki, hökumətimiz bu tədbir çərçivəsində zəruri infrastrukturu və təhlükəsizlik tədbirlərini təmin edəcək. Konfrans zamanı iştirakçıların hər cür ehtiyacı, o cümlədən rabitə, media və digər təşkilati məsələlər yüksək səviyyədə təmin olunacaq. Pandemiya və ya digər qlobal sağlamlıq problemləri üçün əlavə tədbirlər nəzərdə tutulub və hər hansı fövqəladə vəziyyətə cavab verilməsi üçün bütün hazırlıqlar görülür. O cümlədən Azərbaycan hökuməti tərəfindən COP29-da iştirak üçün qeydiyyatdan keçmiş tərəflərə UNFCC onlayn qeydiyyat sistemi vasitəsilə ödənişsiz "COP29 xüsusi viza" xidmətləri təklif olunur. COP29-un xüsusi vizasını həm rəsmi elektron viza portalı, həm də Azərbaycan Respublikasının xaricdəki diplomatik nümayəndəlikləri və konsulluqları vasitəsilə əldə etmək mümkündür.

Konfrans iştirakçıları üçün münasib qiymətli hotellər və nəqliyyat xidmətləri təşkil ediləcək. İnkişaf etməkdə olan ölkələrdən gələn nümayəndələrə xüsusi güzəştlər tətbiq olunacaq. Həmçinin konfrans məkanı ilə hotellər arasında nəqliyyat xidmətləri fasiləsiz olaraq təmin ediləcək. Sessiyaqabağı görüşlər 5-10 noyabr tarixlərində baş tutacaq. COP29 konfransı isə 11-22 noyabr Bakı Olimpiya Stadionunda keçiriləcək.

Rəşad CƏFƏRLİ,

Azərbaycan.-2024.- 10 oktyabr (№ 222).- S.7.